Mami Dekhenez Chawngthu
VANREMPUIA
"An inhmeh lutuk saw ka thik" ka thiannu sawina lam chu ka va en ve a, ni e, an inhmeh thlawt alawm. Kan college ah hian hmeltha leh pian nalh sawi apianga hming lang hmasa ziah chu Rosie ani a, mipa ah chuan Vanrempuia hi ani ziah bawk. Thik phak loh leh thik rual loh ni mahse ka thiannu Puii sawi ang chiah hi a ni, an inhmeh lutuk hi an thikawm!
Ka dan pangngai te in college campus thingbuk hnuaiah lehkhabu ka chhiar leh mawlh mawlh tawh a, tutenge ka bulah lokal a, lo thu tih pawh ka ngaihven hran lo. Ka piaha thute thawm ri leh hak thin chu ka ning ru kher mai,"I va chhiar tui awm ve a, ka lo thu ve thei angem?" chu aw lo chhuahna lam ka en chuan Rempuia alo ni, ka thin chu a phu zawih zawih ni berin ka hria, "A...a.. nia.. lo thu rawh" ka ti bah nak a. A nui sang a, ka zam chhe kher mai. Kum hnih chhung college kan lut ho tawh a, biak chu sawi loh, melh pawh min la melh chhin ngai lo. Hmeichhia zawng zawng ngaihzawn rawn a ni a, kei ngei pawh hian a hmeltha ka ti. Mahse chu bak engmah ka ngaihtuah ngai lo. Engengemaw a sawi a, chhanchhuaktu ka mamawh takzet, he mihring bulah hian ka pangngai lo! Ka lehkhabu chu a rawn la a, ka awmdan chu a hrethiam ang tih ka hlau lutuk chu ka thlan te hian min bualin ka hre hial,"English department ho hi chu in induh tih chuan in duh lo maithei a, in inla hrang lutuk a" atih chuan,"Awihawm loh lutuk, mi in en hrang lutuk kan lo ti ve tho asin" ka lo ti vat a. Tlem chuan ka ziaawm tawh e. A thusawi kar lakah chuan min melh leh zauh thin a, a tir ang em em erawh chuan ka zam tawh lo. An sawi ang ngawt chu ani lo, hepa hi a tawng mawh an ti thin kha ni a, tunah lah erawh a tawng siam siam a, a nelawm viau bawk si. Class ka la neih avangin ka luhsan ta a, ka duh ngai loh thil a thlen phaha, ka suangtuahna khawvel chu min neihsak ta hmak mai.
"Te, Vanrempuia hi i star ve chiang mai" lungkham neilo zetin Puii chuan a ti liam puat a, ka hmai chu a sen nghal tawn in ka hria,"Teuh lo emai a. Tun thleng hian John Keats aia duh ka la neilo" kan ti ve nghal thuai a. Awihloh hmelzetin a hmui a ti pawrh a,"Lo nih tak chu a... ngaihzawng te hi nei ve teh, nakinah i nei anga i la na dawn ania tia awm reng chu" a ti leh nghal bawrh bawrh a,"Kan hmu zo ve hleinem" ka tih chuan rang em em hian,"Ti ve ziah, Lalnuna pawh.." a hmui ka lo hup vat a,"Sawi ve ziah suh" ka lo ti hlak hlak a. Ni e, Lalnuna hi chuan kum hnih chhung ngawt min zar buai tawh, mahse ka ngainatzawng ani tlat lo a ni. Puii lah chu anui uar uar a,"Ka thian, ka ti tak tak ania aw. Hetia i single hian nuam ka ti miah lo ania, Tima thianteah ka lo zawnsak dawn che mi?" An ti zui nghal thuai thuai a. Ka chhang peih tawh lo, ka lehkhabu ka phawrh chhuaka, ka chhiarsan ta daih a. Ka inchhiar tui tan viau a, Puii chuan min lo kheuh zeuh a, ka hawi chhuaka, Rosie leh Rempuia chu an rawn in phur lut chiah a. Ka zawi nghal vek, tinge vawikhat min biak ve avang khan beiseina ka lo tihsan viau chu le, zahthlak hian.
Excursion kal tur zingah chuan ka hming alo chuang vang a, ka enkual dan dan a, Rempuia hming pawh ka hmu, nuam ka ti nghal veng veng. Hriatchhuah ka nei thut, ka va en nawn leh a, Rosie hming pawh alo chuang kalh. Beidawng zetin class lamah ka let phei leh a, ka thinlung atang hepa hi paihchhuah ka duh takmeuh ani. Ka tih theih tawk lehkha zir lamah tan ka la veleh deuh a, whatsapp a kan class group ah pawh ka active lo hle. Ka mut dawnah ka fon chu ka han bih a, whatsapp msg ka dawng nuala, no.hlang tawp chu ka han hang a, "Group ah i va reh bik ve a" tih chauh hi a ni a. Tunge ka hria mai loh vangin a dp chu ka han enchiang nghal a, Vanrempuia alo ni. Ka thin chu phu leh ta dup dup mai, tinge hepa hi hlat ka tum veleh a rawn lan zel, tlai tawh viau mah se ka chhanglo phal chuang si lo, alo la mu lo chu niin thil ho tak tak sawiin kan inbe ta hlut a, nuam ka va han ti chiang tak em!
VANREMPUIA-II
Library ah ka lehkhabu duh alo thlen thar avangin period off veleh ka kal nghal vat a, tuma chimbuai ka duh ngai loh avangin ka fon pawh ka switchoff thin. Ka thil chhiar ah chuan ka cheng bawk a, min betu an awm tih pawh ka lo hre mai lo, zawitein ka chalah min rawn pen a, ka phu chiang em em mai lehnghal, Vanrempuia chu nui var var in a lo ding a,"I fon i off vel bawk sia, kan zawng nasa che" a ti a, ka hma chair ah chuan a thu a,"Engatan nge min zawn a?" Ka tih chuan min chhang lem lo chuan ka lehkhabu chhiar lai ala a, "I inchhiar a thei tak tak dawn" min la ti zui. Tlemin nuam lo ka ti ve deuh a, ka inthlahdul ve ta deuh hlek a, kan zinchhuah a hnaih tawh avangin chulam hawi zawng chuan kan titi a, "Nang chu anuam ngawt ang, Rosie nen in kal dawn lehnghal" ka tih chuan turhverh lam a melh daih a. A thaw hak a,"Rosie nen hian kan ni tawh lo" enge ka thu hriat hi, awihawm loh lutuk,"Haha, zep kher angai mi, i thian ka nia min hrilh ve pawh a awm tho alawm" min melh kawk a, "Sawi dawn ila chu a sei viau ang, i ziak leh duh hial ang, kan college magazine vela chhuah leh tur i duh awm ropui si" tih pah chuan min han siai zauh a. Ava han hmeltha tak em! Chutia min han fiam vel chu nuam ka ti ngawih ngawih a ni. Thian ti a sawi tur hi ka nei tlem khawp mai, rual pawl ka thiam lo a,mi ngainat pawh ka hlawh hran lo. Mahse engvanginnge hepa hian min nel viau a, ka bulah te hian a awm ve fo tih chu ka hrelo, achhanchu engvang pawh nise a hmeltha a, a kianga awm anuam a ka awm theih phawt chuan awm zel ka duh.
Excursion kal turin kan inbuatsaih a, tuesday a chhuak tur kan nih avangin kan namawh tur thil buaipui nan monday chu kan hmang a. Ka thiannu Puii chu a nu damthat theih loh avangin akal thei dawn lova, hrehawm ka ti takzet. Thian dang kawm tur ka nei dawn lo lutuk chu ka huphurh hle a, Rempuia lah Rosie nen an ni anga kawm theih ani dawn si lo. Ka tah te pawh a chhuak rum rum. Ka fon ri chu ka lo hre mai lova, ka lak chuan alo tawp hman chiah a, Rempuia call anih avang chuan kan call back vat a, "Lehkhabu i chhiar leh tawh em ni?" a rawn ti nghal thawng a, "Chhiar reng bik lo" ka ti a ka nuih aza hle, englaipawha chhiar tura in ngaih te chu. Kan zin tur chungchangte sawiin ka thawmhnaw pawh kan inah min rawn laksak tur thu te a sawi a, engvanga min care viau nge maw a nih le?
Kan chuanna tur ah lutin tukverh bulah chuan ka thu a, Rempuia leh Rosie te rawn phei chu ka thlir reng a, ka sawi thiam lo ka lo hah tawp! Rempuia pawh chu a rawn lut a, mahse Rosie chu a kal daih a, mak ka ti nasa! Ka bulah chuan rawn thu in min nuih vur vur a, a ngaihna ka hrelo khawp mai. Amah zawk chuan min hrethiam ni awm tak chuan,"Rosie bawk ni maw i lo ngaihtuah leh pek.. a rawn kal ve dawn lo" a ti nghat a. Ka hrilhhai letling zawk,"Engatinge" ka tih chuan min chhang tawh lo chuan kan thiante la hman lo ho chu alo tur chhen a. Ka bengah earphone ka vuah a, ka maimitchhing ta daih a. Ka lo muthlu sek a ni ang, ka bula thu in min nghawk zeuh ah chuan ka harh a,"I muhil bik a,a nuamlo nia" a rawn ti sar sar a. Ka nui suk a, k maimitchhing leh daiha, ka kut chu la in a vuan a, ka sawithiam lo ka khur ru der der mai. Vawklehkhatah chiang takin Rosie hmel ka ngaihtuah chhuak thut a, ka kut chu ka la sawn nghal a. Mi bialpa ka lo duh ve a, chu chu thil pawi ani lo. Mahse hetia lo awmpui chu ka thei lo a ni. Ka earphone vuah lai chu la thla in a ngaithla ta daih a.
Champhai kan thleng chu kan chau tlang bawk a, tumah chhuak peih pawh kan awm lo. Rempuia chuan kawng engkimahah min ngaituah a, Rihdil tlawh tur kan nih avangin zing takah kan chhuaka, la kal ngai loh leh hmuh ngailoh hmun ani bawk a, a nuam kan tiin kan hlim tlang hle. Mitthi pal te chuan ka lung an ti leng viau a, kan thiante tuia chengho chu dil kam atang ka lo thlir reng a. Rempuia chuan a camera chu min rawn pe sawk sawk a, tuiah chuan cheng ve nghal a. A thla chu ka lo la mawlh mawlh a, nuam ka va han ti chiang tak. A tuka Vangchhia pan tur kan nih avngin Zokhawthar tourist lodge ah kan innghat a. Zanah chun pawnah mei kan chhem a, kan zai a, nuam kan ti hlawm hle. Rempuia chuan dawrah min kal pui rawh atih avangin kan chhuak a, kan thil lei haw lam chu kan thlenna piah deuh ah chuan chawl rih ang tih avang chuan kan thu a, chutia kan pahnih chauha kan awm chu ka zam thar leh ta riau ! Ka kut khur ru der der chu a hum a, ka chesawn ngam tawh lo, rin loh takin min rawn fawp ta thut mai a, mak ka ti lutuk chu ka lo dawh tawp, chutah a aia uar zawkin a rawn ti zel a, mi bialpa anihna te chu ka theihnghilh zo ta vek mai, ka thiam dan dan chuan ka lo chhang let ve a. Ka mitthlaah Rosie alo lang
zawk a, ka namsawn nghal. Mak tih hmel deuhin min en a, min kuah a tum a, ka tho nghal, ka zak a ni, min duh thu pawh a sawi lo, min fawp a, keilah chuan ka lo chhanglet lehnghal a. A rilru chun sihhnip min ti ngawt ang chu, ka mittui alo tla ringawt, thil sawi ka tum a, ka tawngchhuak mai thei lo, a lo ding ve a, min kuah ta hle hle a,"Te, tihnat che ka tum lo.ka duh che, chu chu hria la ka duh ani" "Rosie nei reng chung hian maw?" Ka thin a rim thut a, ka kal nghal a, min vuan bet tlata,"Tinge Rosie chu i sawi fo a, kan in ngaizawng lo," ka melh hrep a, "Ka ti tak tak, ka duh che" engtinnge ka rin theih ang, kan kal hma pawn a rawn thlah ani lawm ni? Duh viau pawh ni ila mi inkara tlakzeh chu ka duh teuh lo mai. Kal chu ka tum lui ta tho a, "Rosie hi a cancer" teh tawp a. Min thawng lutuk, ka va hawilet a, a mittui a lo tla a, "Engthil nge i sawi" ka aw te chu a lawi vek,"Chu chu ani lawm ni i hriat duh kha, " min rawn pan hnai a, ka dar ah a vuan a, "Chuvang chauh chuan asin ani hi ka kalsan theih loh. Ka khawngaih vang hian ka hmangaih tihna ani lo, 1st yr kan nihlai bak khan kan inkawp lo asin, thian ang chauh in kan inkawm tawh. Mahse a natna hi kei tih loh kan college ah hria an awm lo. Min thlamuanpui em em a, a unaupa leh a thian nih ka kawp a, chubak chu kan inkarah engmah a awm lo" sawi tur ka hre lo. Ka thinlung zawng zawngin Rosie chu ka khawngaih, "Te, mi zinga inthlahrung deka i awm thin te, thingbuk hnuaia i hun hman thin leh library a i hun hman thin te hi avaiin ka hria asin. Ka duh che a, chuan i rilru chu min hrilh ve thei mai lovem ni?" mak ka tih em avangin chhan nachang pawh ka hre lo, ka nui sak a,"Min duh ve tihnaah ka ngai mai dawn nia aw?" A tih chuan ka bu zauh a. Kan thiante awmna lam chu kan pan phei ta a. Ka mutnaah te chuan ka ngaihtuah reng a, engtinnge Vanrempuia hi ka bialpa alo nih tak thut theih? Ka nui var var a, Puii msg tur ka type zet na a live ngeia hrilh ka duh leh ta zawk a.
Lianchhiari lunglen tlang te, Thasiama se no neihna hmunte kan tlawh zawh chuan Aizawl lam panin kan haw leh ta a. Ka thiannu Puii hmuh hun mawlh chu ka nghakhlel, tlai thim thet thet ah in ka thleng a, ka inbual nghal a. Ka inbual lai chuan thawveng zeta Puii tawng thawm ka hria a, hmanhmawh zetin ka inbual sawk sawk a, ka room lamah rawn lut tlangin,"Ka thiannu em em, lo chhuak vat teh" a nui leh uar uar a. Henu hi chu aw, ka tan hian ava hlu tak, a tello chuan engmah ka nilo. Kan inhmu chu kan tre leh chel chul a, burma thil nepnawi ka hawn sak te leh bag nalh zet ka hawn sak chu ka pe a, a lawm leh kher mai, thil hawn man hi a awm thin ania. Kan zin chanchinte min zawt a, Rempuia nen kan chungchang ka sawi chuan a meng bial kawk a,"Ani maw... ka thian, engtin zel? Rosie kha..." "Nia, an lo ni lo a, a..aa" cancer ka ti hman tep a, mahse tuma hriat a duh lo tih ka hrechhuak a, sawi zawm ta lo chuan kan thlalak te chu ka en tir ta zawk a,"Mipa lerh deuh chu ani em lo ang tiraw? Ka thian, i nat hi ka hlau ania," ka kuah a, ka thiannu hi chuan mi hi ava ngaihtuah thin em!
Exam a hnaih tawh avangin class pawh kan kal regu tawh lo a, Rempuia nen erawh kan inhmu fo a, kan hlim thei hle. Rosie natna ka hriat atang khan amah khawngaihna ka nei thuk hle a. Rempuia pawhin a tlawh fo a, kan inkar alo hrilh tawh avangin keimah nen pawh an inah chuan kan kal thin. Hlim takin min lo be thin a, cancer natna pawhin a tihchhiat theih ka rin loh a taksa mawi leh nalh tak te, a hmeltha tak te chu ka thlir ngawih ngawih a, class pawh a kal tawh loa, a kal loh chhan erawh kei leh Rempuia chiah in kan hre thung. Exam chu a chak ve em em a, mahse phai ah in checkup tura an kal hun a nih dawn vangin a exam ve dawn ta lo. Keinipawh kan exam avang chuan thildang ka ngaihtuah hman lo a, Rempuia nen pawh exam ni ah bak kan inhmu ngai lo. Phone ah erawh kan inbe reng a, exam zawh ni chuan Rosie kan tlawh a. Phaia an kal hma ai khan alo cher deuhin ka hria, mahse a hmelthatna erawh a la chuai chuang lo. A room ah kan inkawm a, a chau deuh a, a muhil ta a. Keinipawh kan haw a, kan inah Rempuia chu alo leng kawi a, kan hlim ve hle. Kan hma hun tur te sawiin MA zawm chu ka tum tihte ka sawia, ani erawh chuan a tum tawh lem lo a, hna ka zawng tawh ang ati thung a. A pa tha chhangdawltu ber anih avangin keipawhin awm chu ka tih pui, mahse a tellova nitin University lama liam chu huphurhawm dawnin ka hria.
Kan result alo chhuah chuan first class ah ka pass a, Rempuia leh Puii pawh Second class ah an pass bawk a. Kan hlim ve hle, Puii chuan alo tum tawh dan angin Chennai ah a u te bula MA zawm a tum a, ka ngai dawn kher mai. Class tan hma chuan Rosie te inah ka tam hle, a chauh leh deuh a ka hriat avangin ka tlawh awl lo va, amah leh a chhungte pawh ka chungah an lawm hle. Movie hrang hrang ka collect a, kan en dun thin a, kan duhthusam te kan sawi dun thin. Nikhat chu a hmel a hlim lo riau in ka hria a, a room ah "A walk to remember" film chu kan en a, "Te, Rempuia hi i hmangaih em?" ka la ngaihtuah ngai lo tih ka hria,"Rosie, ka duh tih hi chu ka chiang. Ka hmangaih leh hmangaih loh chu... ka chiang bik miah lo" "A theihna zawng zawngin a hmangaih che" min hrilh ni pawn ka hre chiah lo,"I hria em, first year kan nih lai atang tawh khan" chu chu Rempuia pawn min la hrilh miah lo, amah chu ka en reng a, sawi mai tur chu ka hre lo. Thingpui laksak turin inhnuai lam ka pan ta daih a.
Ina ka haw hnu pawh chuan Rosie hmel kha ka mitthlaah a cham reng a, tinge a hmel ah khan na ti hmel ka hmuh le? Rilru nuam zan lo chuan lehkhabu ka chhiar a. Zanah Rempuia pawh alo leng a, chhun lama ka hun hman dan te min zawt a, ka hrilh chuan a nui sak a, ka chalah min fawp zauh a, "Rempui, thil pakhat zawh che ka duh a?" Min chhang lem lo chuan ka darah a lu a nghat a,"Rosie hian a hmangaih che tiraw?" A chesawn chuang lo, "Hmangaih lo ang. Chutiang te engatannge i tih a?" a tih chuan "ka zawt mai mai che" ka kut a vuan a, "Rosie chu ka thiannu ania, chuan a natna avang hian ka kalsan theilo bawk. Mahse a natna chungchang bak hi chu sawi lo ila tha lo maw, te.. ka ex ania , anuam ka ti bik miah lo ania" ka lu chu ka bu nghauh a, ka bianga min piai a,"Nang chauh hi ka duh che" a tih chuan ka rilru nuam lo te pawh chu a bo duak a. Ni e, khatia Rosie hmel ka hmuh khan ka inthiam chiah lo ni berin ka hria. A chhan chiang tak erawh ka hre mai bik lo.
Kan class bang chu ka thian thar Duhi leh Zawni te chuan min sawm tlat avangin Lammual ah inkhel chu ka en ve a, tiang vel hi ka chak zawng leh phur zawng ani lo, hetiang ai chuan mahniin room ah lehkhabu chhiar ila ka tleipui zawk, mahse boring min tih thin em avang chuan in adjust ve chu ka tum a, ka ti hram hram a ni. Kan haw tur ka tho chhuak chiah chu ka thiannu Puii bialpa Tima leh hmeichhe pakhat induh hmel taka inkuah chu ka hmu a, ka thin a rim kher mai. In ka thlen veleh Puii chu ka biaa, Tima nen an inkar that leh that loh te ka zawt a,"Tha over, ka thian, laltima hi chu ka ring bur, vawiin pawh kan inbiaa, lammualah ka thianpa nen kan kal dawn atia" a rawn tih chuan ka hinrim lutuk chu ka puakkeh lo chauh. Thil awmzia hrilh nghal rum rum chu tha lo a ka hriat avangin ka ngawi ta rih a. Rempuia bulah erawh ka thinrimzia leh mipa rinawm loh zia chu ka sermon nghek maia, a nui vur vur ka hmuh chuan ka bula lukham chuan ka vawm phei nghal a, ka bula rawn thut pahin,"Thinchhe ve reuh lutuk mai" ka hnar a piai zauh a, "Midang inkar ah hi chuan inrawlh tam loh hi a tha ber nia aw ka duat" a ti a,"Ka thian tha ber ania ani te chu, buma a awm hi ka hmu thei hleinem" "Chiang takin chu nu nen chuan an inngaizawng tih i hria mi" a ti mial a, zuai raih in"ka hre lo" ka ti a. Ka mitah tak min en a,"Thil hi a landan ang hi a ni vek lo a, enge thudik tih hriatchian hma chuan thutlukna siam loh tur" a ti dam thlapa. Ni e, a dik chiah alawm, ka ngaihdan thui takin ka kalpui nasa lutuk hi Puii pawhin min khap fo thin tak kha.
Rempuia pawh company pakhatah thawk ve in kan inhmu khat ve thei hle a. Inrinni pawh a chawlh loh avangin keimahin Rosie chu ka kan thin. Vellore lama an kal a hun leh tawh avangin an kal hma chuan ka va kan a, Rempuia erawh a kal hman ka rin loh avangin ka kal tur thu pawh ka hrilh hran lo. An in ka va thlen chuan Rempuia bike ka hmu a, kan inhmuh khat avang chuan chutia alokal ve chu ka lawm hlea, ka lut ve nghal a. Rosie nu chuan,"Tete, i va han fel tak em nang hi chu aw... Kha Rempuia pawh a awm kha room ah han chho ve rawh in eitur ka lo siam ang" alo ti zung zung a. Phur takin ka chho a, room kawngkhar chu alo inkhar phui loa, va barakhaih ila athat ka rin avang chuan zawi te in ka kala, Rosie leh Rempuia lo inkuah ngawih ngawih ka hmuh chuan ka ding chawt a. Va luta va pawh turin huaisenna ka nei lo. An mittui atla ve ve a, awmdan pawh ka thiam chiah lo. Rosie room bula pangpar huan ve ang deuh an siam ah chuan ka thu hnawk a, engthilnge ka tih dawn tih chu ka in zawt a, Rosie hian Rempuia hi a hmangaih takzet niin ka hre bawk. A damchhung hian hlim takin awm sela ka duh a, chumi tur chuan Rempuia ka thlah zalen mai dawn em niang? Mahse kei chuan ka sawichhuak ngam dawn silo. Inhnuailamaah chuan ka chhuk a, engmah boruak awm lo ang chuan ka theihtawpin ka awm lui a, Rempuia leh Rosie pawh an rawn chhuka, min hmuh chuan Rempuia chu a hrilhhai deuh in ka hria. Mahse a insiamrem vat a, Rosie nu chuan,"Hei Tetei leh Rempuia zawng in thiannu hi in hmangaih tak tak niin ka hria ka lawm khawp mai. Chhun lamah Tetein a theih ang angin a rawn kawm hlim a, zanah Rempuia alokal bawk a. Kan chunga in thatna hi kan lawm takzet ani" a tih chuan ka thinlung hi alo na veng veng. Pawn lam ka melh lui tlat a, zanah Rosie te ina akal thin vang anih chiah hi alo len hman ngai loh ka ti a. Thudik chu min hrilh ve nise ka rilru hi ana miah lo ang, ka thiannu ve tho ani a, natna khirh tak a tuar hi keipawhin ka khawngaih lutuk, ka hma ka sial in ti em? Mahse min ngaipawimawh in min han hrilh ve se ka ti mai chauh ani. Ka haw tur chu min thlah atum a, tih tur ka la neih chhuanlamin keimahin ka haw a. Mahse in lam pan lo in Duhi te in ka pan ta zawk a, ka thiannu Puii tih loh ah chuan Duhi hi ka thurawn lakna ber a ni. Ka thlen chuan keimahah dik lo a awm tih alo hre nghal a,"Rosie hi ka khawngaih emai, a natna avang chauh hian Rempuia hi a then tih ka hria. A damrei lo pawh alo ni maithei, Rempuia hi nei let leh se ka duh ani" ka ti tawp a. Duhi chuan Rempuia nen sawi tlang tur leh mahnia thutlukna siam lo turin min chah mawlh mawlh a. Ni e, a dik ang, kei chu Pathian zarah ka dam tha a, ka tuar thei zawk ang. Rosie hi a natna tuar chauh pawh hi a nat dawn nen, hmangaih chan lehzel chu a na lutuk ang. Ka mittui ka hru hul a, kan in lam panin ka haw ta a. Gate nghengin Rempuia chu alo ding reng a, min hmuh veleh min lo kai a, "Khawnge i kal a, khua a vawt ropui sia i in ha lum bawk silo, ka ngaihtuah lutuk che" a lo ti a. Ka tah mai loh nan ka hmui chu ka pet fan fan a, inchhung lamah min luhpui a. Kawrlum te ka ha a, sitting room lungngaih hmel taka lo indawm kun reng Rempuia chu ka pan a, min hmuh veleh a lo nui sak a, a hmel chu a chau ngawih ngawih tih ka hria, a bulah ka thut veleh chuan min lo kuah nghal vat a,"Te, ka kal thin tih kha ka hrilh loh che vangin tihpalh aw.. ka inthlahrun em avang in nia ka sawi ngam loh" a beng ah chuan ka pawt a,"Mawla, kei hi chutiang em em in ka rilru a te in a zim mi? Tha deuhin min hrilh la ka lawm zawk, i hria em?" Ka ti a. Min pawm thut a,"Khawvelah i tha ber, chuan ka hmangaih che, Tete, ka hmangaih lutuk che" ka nghing dawt mai. In hmangaih thu hi kan la sawi ngai lo va, min hrilh thut chu mak ka ti a ni. Keipawhin ka hmangaih tawh hepa hi, mahse ka sawi chhuak thei lo. Ka tah a chhuak tlat a, "Tahbelh si" ka hnar a piai leh zauh a, chum ka tum chu ka hmui ah min rawn fawp ta vawng vawng a.
Hun alo kal ve zel a, kalna a hlat em vang leh hostel ka chan tho avang chuan hostel ah ka awm. Sunday ah erawh ka haw chho ziah thung a. Rosie pawh ka hmu khat khawp mai, phai an kal hnu khan vawikhat chiah ka hmu a, ka inthiam chiah loh avang chuan inkhawm banah ka leng phei a. Alo muthilh avangin a khum bulah chuan ka thu a, Rempuia pawh lokal vw atum avangin ka lo nghak a. Album a dah chhawn urh chu ka la a, ka en vel a, adang lak leh tuma ka ban chuan diary ni awm tak hi ka phawrh chhuak a, mi diary chhiar ruk chu thil tih chi loh tak ni mah se enginemaw min mawlh a, ka en chak riau a, inthiamlo chung chuan ka han keu dek dek a. Ka keu chiaha ka chhiar hmasak ber chu,"Ani chu ka thinlung zawng zawngin ka hmangaih a, mahse hmangaih ber Tetei a tawng tawh a...." ka lo rindan chu a dik chiang ani. Hmeichhia chuan kan hmeichhiatpuite rilru kan hre thin. A hma chiah mi chu ka chhiar zel a, a hma lam ka en a,"Hmangaih chu ka tawng ve ngei a, Vanrempuia ani. Ka hlimna ber a ni a. Khawvel ah a aia hmangaih ka nei lo. Mahse.. ka natna ka hriat chhuah atang khan ani chu nitinin hlat ka tum a, harsa mahse atana tha zawk anih avangin ka kalsan ta" tih te, "Ka thian ani a, ka unaupa ani bawk a. A hlim hmel ka hmuh hian nuam ka ti thin. Tetei hi ka va awt thin tak m! Rempuia hmangaih ber a ni si" tih leh a tam mai. Ka chhiar zawm thei tawh lo. A room a a bathroom ah ka lut a, ka mittui a tla zawih zawih a. Rempuia min koh ri ka hriat chuan ka hmai ka phih vat a, ka chhuah chuan alo thu reng tawh. Rosie pawh alo harh tan a, min hmuh chuan a hlim ve hle. A cher em em a, ka khawngaih ngei mai. Ka rilru chu ka siam fel tawh, Rempuia hi ka pe kir leh ang. Zanah chuan inkhawm lo in Rempuia chu lo leng turin ka ti a, dar rik hnu reiloteah alo phei ve nghal a. Ka en ngawih ngawih a, thla te kan la a, a hlim hmel hi hmuhnawm ka ti. Kei min lo hmangaih vannei ka in ti bawk, "Zanin i hmel chu a dik miah lo. Lehkha i chhiar nasa mi?" Min ngaihtuah hmel takin a ti a, "A..a.. thil ka lo ngaihtuah nasa lutuk a" ka ti bah nawk nawk a. Ka chal a rawn khawih a,"Khawsik..awm lo a" "ka tha ka tih chu.. Rempui, thil sawi duh ka nei a" "eng thil nge ni ? Min then duh thu a nih loh phawt chuan ka lo ngaithla ange" a lo ti vat a. A kut chu la in ka hum vang vang a,"Rosie hnenah kir leh rawh" mak ti hmel takin min melh a, chutah a then sak a,"Te, i lung ka ti awi lo mi? I duhdan nih phawt chuan Rosie chu ka tlawh tawh ngai lo vang" aw! I va hrethiam lo em! Ka mittui alo tla sawk a,"Ni lo, chutiang ani lo. Rosie hian a hmangaih che, chuan a mamawh che asin" min chhang lo. A kut ka vawn chu a phelh a, a ding a, pawn lam a thlir vang vang a,"Tete, kei hian nangmah ka hmangaih si che a" beidawn hmel zetin a ti a,"Rempui, Rosie diary ka chhiar a, nang hi a hmangaih che. A natna pawh hi a nat dawn tehlul nen a hmangaih a chan che hi a na dawn lutuk, chuvang chuan i kir leh tur ani. Hlim takin a nun hman tir ang" ka ti a. Ka mittui chu alo tla zung zung a, hruk pawh ka tum chuang lo, rei tak kan sawi dun a, a changin kan inhnial a, ka thutlukna siam chu sawhsawn ka tum lo tih a hria, tih ngaihna ahre tawh bik loa, "Nang nena inthen tur hian ka lo la ngaihtuah chhin ngai miah lo. Mahse Te, Rosie chu ka lo duh tawh thin ngei alawm, mahse nang ka tawn hma thil a ni" a ngawi vang vang a,"Ava harsa dawn ve.. mahse i duhdan anih chuan theihtawp ka chhuah ang" a maimitchhing daih a. Ka kuah a, a awm ah ka hmai ka phum a, ka tap zawih zawih a, min rawn pawm ve thlawp a, mittui nen kan pahnih tana zan hnuhnung chu kan hmang a. A haw dawn chuan alo hawi let a, a rawn tlan let leh a, kan in pawm leh vawng vawng a. Duh reng chunga inthen hi a lo na takzet. Kan inthen hlenna tur pawh ani maithei, duh thawh takin kan in fawp vawng vawng a.
VANREMPUIA (LAST)
Rempuia nen kan inthen atang chuan hostel chu ka chhuahsan lo. Sunday ah takngial pawh ka haw ngailoa, ka chhungte chuan sunday tal chu haw turin min ti fo a. Mahse ka la zuam ngang lo a ni. Lehkha zir chu harsa ka ti thin ngei mai, mahse ka rilru la peng thei ber anih avangin ka bih lui thin. Zankhat chu ka thiannu Puii'n min rawn biaa, Tima nen an inthen thu leh alo kawp thu te, nau hial an lo pai thute sawiin min rawn tahkhum nghek a. Kan chanchin pawh kan sawichhuak a, kan dinhmun chu in ang chiah lo mahse ka hriatthiampui khawp mai. Remchang hmasa berah zin ka tum thu sawiin kan inbiakna kan titawp ta a. Ka thawl hawkin ka hre hial, harsatna te, lungngaihna te pawh hi han sawi chhauh chuan alo ziaawm thei viau alo ni.
Exam kan zo a, chawlh chhunga Chennai ah Puii bula zin ngei chu ka tum ruh hle a. Mahse ka cousin in pasal aneih dawn avangin ka kal mai thei dawn lo. Rosie chu ka rilru ah a awm reng a, mahse ka hmu ngam rih ngang si lo. Ka cousin te inneihna tur hmun Chaltlang lamah kan kal a, an inneih zawh a thla te kan lak hnu chuan in lama haw tumin ka chhuak a, Rempuia chu ka hmu hlawl mai. Ka hmuh leh vawikhatna anih avangin awmdan pawh ka thiam chiah lo, amah zawk chuan min lo biaa,"Inhmuh ava khat ve Te.. i dam maw?" "Aw dam ve zel e. Enge Rosie a an?" Ka tih chuan a chal a ti chuar nang a,"Nang i tha em tih pawh hi a awm lo" a nui hak a,"A tha viau rih e.. tinge i no.i thlak kher a" chhan ngaihna ka hrelo ka ngawi tawp a, ka cousin in min lo koh avang chuan ka kalsan ta a. Ka rilruah thil dang a leng lo, Vanrempuia chauh lo chu. Ni e ka number thlak chhan pawh engdang ani lo, a,aw ri ka hriat a, a msg ka hmuh fo chuan ka chakna te hi an bo zo ang tih ka hlau a ni; ka thutlukna lo siam tawh ah khan inchhir chang ka ngah si a.
Ka lo tum lawk tawh angin ka thiannu Puii awmna Chennai lam chu ka pan ta a. Ka thiannu nen kan inhmu chiah chu kan au chel chul a, U Zaia(Puii u) nuih aza leh hle. Naupanlai atanga inkawm chho char char, school pawh lut tlang a college thlenga kal tlang kan ni bawk a. Thian dang kawm thin mah ila kan pahnih inhmangaihna ang hi a awm ve tak tak lo. Mi hlim thei tak leh mahni thil tawn apianga lungawi thin ani bawk a, Tima nen an inkar pawh a pawm thiam leh vek tawh a, a nuih pui leh uar uar thei tawh. Kei ve thung hi, thil tha ti a inhria in ka na ru tlat si. Chu chu ka thiannu hian a hmuh hmaih hauh lo, ka kianga a awm hi chuan ka rilru hahna te pawh a zia sawt thin reng a ni. Beach ah te kalin kan hun neih chu a hlim thei ang bera hman ka tum a. Ka rilru pawh a hahdam tan viau. Rosie kha ka hrereng a, a hmangaih ber kiangah a awm a, hlim sela, ka inpumpekna hi ti thlawn lul lo se ka duh a ni. Karhnih lai ka cham hnu in ngai leh thlahlel tak chungin ka thiannu chu ka haw san leh ta a.
Hun alo liam ve zel a, thlasik chu nipuiin a rawn thlak a, nipui chu fur in a rawn thlak leh a, ka thinlunga ruak awm erawh hnawhkhattu an la awm lo a, Vanrempuia thlak thei tu ka la tawng lo. Min beisei leh min duh der tu te chu awm thin mah se tumah ka ngaihsak lo va. Ka nundan hmasa ah kirin mipa aiah ka lehkhabu te chu ka kuah tam zawk. Ka thiannu Duhi an khaw lama a haw dawn avangin ka thlah a, ka haw chuan ka room ah ka lut tlang nghal a, Rosie chu alo thu reng a, ka phu nasa kher mai. Chuti taka ka phu nasa chu a nuih aza em em a, mittui tla phungin a nui a, a tawpah chuan a insum thei ta hram a. A thutna ep chiah a ka thu a, ka chezia chu min chik hle in ka hria,"Te, tinge ilokal ngai tawh loh?" a hmaa hlim taka a nuihna kha hre ang pawhin a awm leh tawh lo, "A..a.. nia, ka tihpalh, ka buai ve lutuk a" ka ti bah niai a. Ka mitah chiang takin min en a,"Tihpalh aw...?" "Engvangin maw?" Ka ti let ha a, ka kut chu la in a hum vang vang a, "Ka mamawh lai taka Rempuia min pek kir avangin" a mittui chu a hru zauh a, "Min hlat hian hrehawm ka ti, Te, ahma ang khan awm leh ang, i thian nih kha ka duh" a ti a. Ni e engvanginnge kei hian min thlahlel ve ngawih ngawih tu hi bihruksan ka tum fo, hetiang taka dawihzep hi maw ka lo nih? Ka kuah a, "Rosie tihpalh aw.. ka rilru kha ala pangngai reng ania, i thian ka la ni reng alawm. Keima buaina chiah ka lo ngaihtuah a, tun atang chuan i thian tha tak kha ka ni leh ang" ka ti a. Hlim takin a haw ta a.
Ka hman chang in Rosie pawh ka tlawh leh tan a, a nun chu a hlim sarh reng a, a taksa erawh a chaklo tial tial niin ka hre thung. Rempuia pawhin theihtawp chhuahin tihhlim a tum ve hle tih ka hria, a tha lo deuha ka hriata ka kal nghal pawhin Rempuia chu alo awm leh hman reng tawh thin a. A inpe zo takzet a ni. Rosie leh a chhungte pawhin an thlamuanpui a, an fanu hian a hmangaihzia an hria a, a chang chuan an inthlahrunzia ka hnenah an sawi thin. Mahse inthlahrunawm turin Rempuia hi a awm ngailo a, chhuang takin ka lo thlir fo thin. kan pahniha kan awm tlan pawhin Rosie tan hmuh hrehawm turin kan awm ngailoa, thian innel tak satliah ang bakin kan awm ngai lo. In checkup tura Vellore an kal leh dawn pawhin Rempuia chuan hruai a tum tlat a, a chhungte chu an inthlahrun em avangin an han hnial a, mahse Rosie hlimna tur anih avangin a tawp thlenga buaipui chu a tum a ni. Vellore pan an tum tlai chuan Rosie chu a luak reng a, a chau em em a, kal pui chi rual anih loh avangin damdawiin lam an pan pui a, Rempuian min rawn fon vat avangin ka nu nen kan kal nghal a. Ka rilru in ka tawngtai mawlh mawlh a, chan ka duh lo, engtik atang khan nge amah ngaihtuah reng renga hun ka lo hman tak ka hre lo, mahse a dam tur a ni.
Kan va thlen chuan a lo ziaawm leh tawh a, biak pawh a hre tawh an ti a, ka thaw huai mai. Min lo hmuh chuan min lo nuih var var a, rilru tawngtaina neiin lawmthu ka sawi nghal mawlh mawlh a. A bulah thu in a kut ka vuana, ka mittui chu alo tla leh pur tawh,"Ka hlauhthawnzia hi i hria em ?Tiang khan min ti hlauthawng tawh suh" ka ti a. Tawng a tum a,"I la chau emai, titi na hun kan la ngah dawn alawm" tiin ka lo khap vat a, hahdam hmel takin a maimitchhing vang vang a. Zanah chuan Rempuia nen min riahpui rawh se atih tlat avangin midang chu an haw ta vek a. Tlai atang a muhil char char a, a muthilh chhung chuan movie kan en vel mai mai a, dar 9 vel ah a muhil chu rawn harhin Rempuian a chalah alo fawp zauh a. A nui ver ver a, a riltam leh tam loh ka zawh chuan ala ei chak lo tih a sawi a. Rempuia bulah chuan a khum chu ti kang turin a han ti a, a tih zawh chuan a bulah min thut tir ve ve a, "Ka tan in hlutzia hi in in hre lo ang tih ka hlau, khawvelah hian thian ti a ka sawi ngam chu nangni chauh hi in ni" Rempuia a en a,"Ka tan tun thlengin i awm reng thin a, tunah chuan i tana nung ve tawh turin ka duh che a, i hmangaih ber Tetei nen hian hlim takin awm ang che u aw" tawng tumin ka ang zuau hman a,"Engmah lo sawi ve ka la phal lo nia" min nuih sak a, a sawizawm leh ta a,"Ka damlai ngei hian innei ang che u, ngenna nilo in order anih chu" a ti leh a. Rempuia chuan a kutah alo chelh vat a, "Rosie, i dam reng dawn alawm, ka nei ang che tih pawh ka tiam vek che kha, i thi dawn lo" alo ti dam thlap a. Keipawh chuan,"Ni e Rosie, Rempuia nen chuan kan innei thei lo vang. Ka duh tawh hleinem" nuih pahin ka va melh zeuh a,"College kan kal lai khan a lar a, ka duh ve mai mai alawm" kan ti lehnghal zat a. A maimitchhing vang vang a, a rawn mwn leh chuan,"Dawt in sawi thiam lo emai, ka thu chu awih ula ka thil duh hnuhnung ber min tihhlawhtlinsak angai ang. Tete, Rempuia hian a hmangaih takzet che. Ka natna avanga inhmangaih tak te pawt thentu nih hi ka duh lo, chutiang chu min nihtir lul suh u. Enteh, i hming hi vawi tam tak a tawngvaih laiin a lam thin asin, mahni hmasial vangin ka haider thei lo ani" a mittui chu a far zawih zawih a,"Te, nangpawhin i hmangaih tih ka hria, tun thlengin midang tumah ila kawp theih bik loh hi, a derin nung tawh lo ang u" a ti a, hahdam hmel takin a thaw hawk a. Sawi tur ka hre lo kher mai, ka kun reng a, Rempuia pawhin a hre bik lo aniang a ngawi ve reng a. Amah Rosie bawk chu a rawn tawngchhuak a, "Ka chhungte pawh engkim ka hrilh vek tawh, in chungah an lawm takzet a ni. Ka taksa hi a that lai ngei
hian innei ula ka duh a ni, inchhir tak chungin ka khawvel hun hi min hman zawhtir lo hram ang che u" a ti leh a. A tawng tam deuh vang chuan a chau deuh a, a muhil ta a. Pawnah thlifim dawngin ka thu a, Rosie ka hmuh hmasak ber na chu kan college canteen ah a ni a, Rempuia nen inhmatawn in an thu a, an titi karah an nui leh har har thin a. Ka en a, ka en reng a, hetiang taka hmeltha hian Siamtu hian alo duang bik chu thikawm rum rum ka ti. Ka en reng lai chuan min rawn melh a, a nui sak a, a ha var rual siau te, a vun paw sen nalh tak leh a sam kir chiat te chu a inhmeh tak meuh ani. Ka thian ni turin ka suangtuah pha ngailoa, a bialpa lo ngaihzawn ve phei chu hla tak a ni. Mahse ni theilo tura ka ngaih chu alo thleng vek si. Ka bulah Rempuia alo thu ve tih pawh ka lo hre mai lova, a khuh ri ka hriat chuan ka ngaihtuahna khawvel atang ka let leh chiah,"I va ngaihtuah nasa vung vung ve" a ti dat a, "Ni e thil tam tak ka lo ngaihtuah alawm mawle" kan boruak chu rit ka ti. Rempuia neih let leh hi ka lo ngaihtuah ngai miah lo, kumkhua atan ka lo thlah tawh a, ama hmangaih em em tu Rosie hnenah, mahse tunah hetiang hi ani leh si a. Awmdan thiam a har a, engtinnge ani kan lo chhan ang? Boruak chu a hip vang vanga, "Te..." "um" ka va melh zawk a, ka mitah tak chuan min en a,"Rosie thusawi kha enge i ngaihdan?" A ti a, "Ka ngaihtuah phak loh thil a ni. Chhan mai dan tur paw ka hrelo" ka darah min vuan a,"Midang i nei tawh mi?" "Aih.. a.. nei lo. Chutiang lam pawh ni chiah lo" ka lo ti vat a. Ani chuan"Ka theihtawp chu ka chhuah ve in ka hria. Te, ilaka ka rilru chu ala pangngai reng, mahse i lo danglam tawh a nih chuan..." a ngawi ta daih a. A ding a, Aizawl khawpui eng phe uarh chu a thlir a, abulah chuan ding ve in,"Ka rilru chu lo danglam ta se?" "Na chu ka ti ngawt ang, mahe.. i hlimna tur hi ka duh ber zel fo vang" rilru nat hmel takin min melh a,"Rempui, ka hmangaih che. Englaimahin ka theihnghilh ngai lo che" ka ti a. Lawm hmel takin min en a,"Tunah khan enge i sawi, han sawi tha leh teh.." "ka hmangaih che" ka lo ti nawn sap a,"Ka hmangaih lutuk che Tete... Inchhirna tur nei miah lo in tunah chuan kan awmdun thei tawh ang, Rosie chuan ka hmangaih ber nang min pe kir si a" hlim avanga mittui nen kan inpawm vawng vawng a.
Palai hmel pawh hmu in inneih hun atan April ni 10 kan ruat a, thla khat chhung inbuatsaihna hun kan la nei a, Puii pawh ka bula a din dawn avangin alo haw vang vang a. Kan inneih tur thu alo hriat chuan Rosie pawh a hlim hle a, mipui punkhawmna a zawh vak loh avangin a chhuak ngai lo a. Kan inneih ni erawh kal a tum ruh hle a, kawr pawh a thuitir hial a ni. Kan inneih hun atan kar khat chiah a awm tawh a, Rempuia chu lo leng in zan rei tak thleng kan meng a, dar 11 velah a haw a, a haw fel chiah tih in Rosie nu chuan min rawn fon a, Rosie a chau thut a lo tlan phei ula ka rilruah in lo lang hmasa ber a tia. Rempuia chu ka call nghal a, ani pawh lo tlan letin min rawn hruai a, an in kan va thlen chuan an lo tap truau hlawm tawh a. Room ah ka tlan lut a, a kut ka dawm chiah min rawn melh a, Rempuia a melh leh a, hlim hmel tak pu chungin a maimitchhing a, a rawn meng leh ta lo. A natna hrehawm tak ata a zalen kumkhua dawn ta. Mahse a chhungte leh a thuante erawhin kan thlahlel a, kan ngai takzet a ni. Kan inneih hun a nghahhlelh em em pawh min hmanpui hman ta silo. Kan hun ruat chu tih danglam theih ani tawh silo a, ka huphurh takmeuh a ni.
Kan inneih ni pawh alo thleng dawn tawh a, a thlen hma tlaiah Rempuia nen chuan Rosie thlanah chuan kan kal a, lei vung la thar lam tak chu ka tham a, ka mittui chu alo tla zawih zawih a. Rempuia pawh a bang bik lo, reife kan awm hnu chuan kan hawsan dawn ta, ka thingthi rawp a, "Rosie, i nghahhlelh em em kan inneih hun pawh naktuk mai hi ani tawh asin, tinge min kalsan leh daih si. Min ti hrilhhai takzet a ni. Mahse ka hmangaih ber min pek let avang hian ka lawm e. A hnen i pan tak Lalpa hnenah chuan hlim taka kan inneih a, fanau malsawmna kan dawn theih nan min han dilsak ang che aw... Rosie mangtha aw" tiin thlanmual chu kan chhuahsan ta a. Ka kianga ding ka pasal ni mai tur, inpumpeknaa khat Vanrempuia chu chhuang taka melhin motor ah ka lut a, in lam pan in kan haw ta vang vang a.
~The end~
(ka tui na ani tih hriaa min phur pui a, min tui pui tu ka thiante tan ka hlan e)
VANREMPUIA
"An inhmeh lutuk saw ka thik" ka thiannu sawina lam chu ka va en ve a, ni e, an inhmeh thlawt alawm. Kan college ah hian hmeltha leh pian nalh sawi apianga hming lang hmasa ziah chu Rosie ani a, mipa ah chuan Vanrempuia hi ani ziah bawk. Thik phak loh leh thik rual loh ni mahse ka thiannu Puii sawi ang chiah hi a ni, an inhmeh lutuk hi an thikawm!
Ka dan pangngai te in college campus thingbuk hnuaiah lehkhabu ka chhiar leh mawlh mawlh tawh a, tutenge ka bulah lokal a, lo thu tih pawh ka ngaihven hran lo. Ka piaha thute thawm ri leh hak thin chu ka ning ru kher mai,"I va chhiar tui awm ve a, ka lo thu ve thei angem?" chu aw lo chhuahna lam ka en chuan Rempuia alo ni, ka thin chu a phu zawih zawih ni berin ka hria, "A...a.. nia.. lo thu rawh" ka ti bah nak a. A nui sang a, ka zam chhe kher mai. Kum hnih chhung college kan lut ho tawh a, biak chu sawi loh, melh pawh min la melh chhin ngai lo. Hmeichhia zawng zawng ngaihzawn rawn a ni a, kei ngei pawh hian a hmeltha ka ti. Mahse chu bak engmah ka ngaihtuah ngai lo. Engengemaw a sawi a, chhanchhuaktu ka mamawh takzet, he mihring bulah hian ka pangngai lo! Ka lehkhabu chu a rawn la a, ka awmdan chu a hrethiam ang tih ka hlau lutuk chu ka thlan te hian min bualin ka hre hial,"English department ho hi chu in induh tih chuan in duh lo maithei a, in inla hrang lutuk a" atih chuan,"Awihawm loh lutuk, mi in en hrang lutuk kan lo ti ve tho asin" ka lo ti vat a. Tlem chuan ka ziaawm tawh e. A thusawi kar lakah chuan min melh leh zauh thin a, a tir ang em em erawh chuan ka zam tawh lo. An sawi ang ngawt chu ani lo, hepa hi a tawng mawh an ti thin kha ni a, tunah lah erawh a tawng siam siam a, a nelawm viau bawk si. Class ka la neih avangin ka luhsan ta a, ka duh ngai loh thil a thlen phaha, ka suangtuahna khawvel chu min neihsak ta hmak mai.
"Te, Vanrempuia hi i star ve chiang mai" lungkham neilo zetin Puii chuan a ti liam puat a, ka hmai chu a sen nghal tawn in ka hria,"Teuh lo emai a. Tun thleng hian John Keats aia duh ka la neilo" kan ti ve nghal thuai a. Awihloh hmelzetin a hmui a ti pawrh a,"Lo nih tak chu a... ngaihzawng te hi nei ve teh, nakinah i nei anga i la na dawn ania tia awm reng chu" a ti leh nghal bawrh bawrh a,"Kan hmu zo ve hleinem" ka tih chuan rang em em hian,"Ti ve ziah, Lalnuna pawh.." a hmui ka lo hup vat a,"Sawi ve ziah suh" ka lo ti hlak hlak a. Ni e, Lalnuna hi chuan kum hnih chhung ngawt min zar buai tawh, mahse ka ngainatzawng ani tlat lo a ni. Puii lah chu anui uar uar a,"Ka thian, ka ti tak tak ania aw. Hetia i single hian nuam ka ti miah lo ania, Tima thianteah ka lo zawnsak dawn che mi?" An ti zui nghal thuai thuai a. Ka chhang peih tawh lo, ka lehkhabu ka phawrh chhuaka, ka chhiarsan ta daih a. Ka inchhiar tui tan viau a, Puii chuan min lo kheuh zeuh a, ka hawi chhuaka, Rosie leh Rempuia chu an rawn in phur lut chiah a. Ka zawi nghal vek, tinge vawikhat min biak ve avang khan beiseina ka lo tihsan viau chu le, zahthlak hian.
Excursion kal tur zingah chuan ka hming alo chuang vang a, ka enkual dan dan a, Rempuia hming pawh ka hmu, nuam ka ti nghal veng veng. Hriatchhuah ka nei thut, ka va en nawn leh a, Rosie hming pawh alo chuang kalh. Beidawng zetin class lamah ka let phei leh a, ka thinlung atang hepa hi paihchhuah ka duh takmeuh ani. Ka tih theih tawk lehkha zir lamah tan ka la veleh deuh a, whatsapp a kan class group ah pawh ka active lo hle. Ka mut dawnah ka fon chu ka han bih a, whatsapp msg ka dawng nuala, no.hlang tawp chu ka han hang a, "Group ah i va reh bik ve a" tih chauh hi a ni a. Tunge ka hria mai loh vangin a dp chu ka han enchiang nghal a, Vanrempuia alo ni. Ka thin chu phu leh ta dup dup mai, tinge hepa hi hlat ka tum veleh a rawn lan zel, tlai tawh viau mah se ka chhanglo phal chuang si lo, alo la mu lo chu niin thil ho tak tak sawiin kan inbe ta hlut a, nuam ka va han ti chiang tak em!
VANREMPUIA-II
Library ah ka lehkhabu duh alo thlen thar avangin period off veleh ka kal nghal vat a, tuma chimbuai ka duh ngai loh avangin ka fon pawh ka switchoff thin. Ka thil chhiar ah chuan ka cheng bawk a, min betu an awm tih pawh ka lo hre mai lo, zawitein ka chalah min rawn pen a, ka phu chiang em em mai lehnghal, Vanrempuia chu nui var var in a lo ding a,"I fon i off vel bawk sia, kan zawng nasa che" a ti a, ka hma chair ah chuan a thu a,"Engatan nge min zawn a?" Ka tih chuan min chhang lem lo chuan ka lehkhabu chhiar lai ala a, "I inchhiar a thei tak tak dawn" min la ti zui. Tlemin nuam lo ka ti ve deuh a, ka inthlahdul ve ta deuh hlek a, kan zinchhuah a hnaih tawh avangin chulam hawi zawng chuan kan titi a, "Nang chu anuam ngawt ang, Rosie nen in kal dawn lehnghal" ka tih chuan turhverh lam a melh daih a. A thaw hak a,"Rosie nen hian kan ni tawh lo" enge ka thu hriat hi, awihawm loh lutuk,"Haha, zep kher angai mi, i thian ka nia min hrilh ve pawh a awm tho alawm" min melh kawk a, "Sawi dawn ila chu a sei viau ang, i ziak leh duh hial ang, kan college magazine vela chhuah leh tur i duh awm ropui si" tih pah chuan min han siai zauh a. Ava han hmeltha tak em! Chutia min han fiam vel chu nuam ka ti ngawih ngawih a ni. Thian ti a sawi tur hi ka nei tlem khawp mai, rual pawl ka thiam lo a,mi ngainat pawh ka hlawh hran lo. Mahse engvanginnge hepa hian min nel viau a, ka bulah te hian a awm ve fo tih chu ka hrelo, achhanchu engvang pawh nise a hmeltha a, a kianga awm anuam a ka awm theih phawt chuan awm zel ka duh.
Excursion kal turin kan inbuatsaih a, tuesday a chhuak tur kan nih avangin kan namawh tur thil buaipui nan monday chu kan hmang a. Ka thiannu Puii chu a nu damthat theih loh avangin akal thei dawn lova, hrehawm ka ti takzet. Thian dang kawm tur ka nei dawn lo lutuk chu ka huphurh hle a, Rempuia lah Rosie nen an ni anga kawm theih ani dawn si lo. Ka tah te pawh a chhuak rum rum. Ka fon ri chu ka lo hre mai lova, ka lak chuan alo tawp hman chiah a, Rempuia call anih avang chuan kan call back vat a, "Lehkhabu i chhiar leh tawh em ni?" a rawn ti nghal thawng a, "Chhiar reng bik lo" ka ti a ka nuih aza hle, englaipawha chhiar tura in ngaih te chu. Kan zin tur chungchangte sawiin ka thawmhnaw pawh kan inah min rawn laksak tur thu te a sawi a, engvanga min care viau nge maw a nih le?
Kan chuanna tur ah lutin tukverh bulah chuan ka thu a, Rempuia leh Rosie te rawn phei chu ka thlir reng a, ka sawi thiam lo ka lo hah tawp! Rempuia pawh chu a rawn lut a, mahse Rosie chu a kal daih a, mak ka ti nasa! Ka bulah chuan rawn thu in min nuih vur vur a, a ngaihna ka hrelo khawp mai. Amah zawk chuan min hrethiam ni awm tak chuan,"Rosie bawk ni maw i lo ngaihtuah leh pek.. a rawn kal ve dawn lo" a ti nghat a. Ka hrilhhai letling zawk,"Engatinge" ka tih chuan min chhang tawh lo chuan kan thiante la hman lo ho chu alo tur chhen a. Ka bengah earphone ka vuah a, ka maimitchhing ta daih a. Ka lo muthlu sek a ni ang, ka bula thu in min nghawk zeuh ah chuan ka harh a,"I muhil bik a,a nuamlo nia" a rawn ti sar sar a. Ka nui suk a, k maimitchhing leh daiha, ka kut chu la in a vuan a, ka sawithiam lo ka khur ru der der mai. Vawklehkhatah chiang takin Rosie hmel ka ngaihtuah chhuak thut a, ka kut chu ka la sawn nghal a. Mi bialpa ka lo duh ve a, chu chu thil pawi ani lo. Mahse hetia lo awmpui chu ka thei lo a ni. Ka earphone vuah lai chu la thla in a ngaithla ta daih a.
Champhai kan thleng chu kan chau tlang bawk a, tumah chhuak peih pawh kan awm lo. Rempuia chuan kawng engkimahah min ngaituah a, Rihdil tlawh tur kan nih avangin zing takah kan chhuaka, la kal ngai loh leh hmuh ngailoh hmun ani bawk a, a nuam kan tiin kan hlim tlang hle. Mitthi pal te chuan ka lung an ti leng viau a, kan thiante tuia chengho chu dil kam atang ka lo thlir reng a. Rempuia chuan a camera chu min rawn pe sawk sawk a, tuiah chuan cheng ve nghal a. A thla chu ka lo la mawlh mawlh a, nuam ka va han ti chiang tak. A tuka Vangchhia pan tur kan nih avngin Zokhawthar tourist lodge ah kan innghat a. Zanah chun pawnah mei kan chhem a, kan zai a, nuam kan ti hlawm hle. Rempuia chuan dawrah min kal pui rawh atih avangin kan chhuak a, kan thil lei haw lam chu kan thlenna piah deuh ah chuan chawl rih ang tih avang chuan kan thu a, chutia kan pahnih chauha kan awm chu ka zam thar leh ta riau ! Ka kut khur ru der der chu a hum a, ka chesawn ngam tawh lo, rin loh takin min rawn fawp ta thut mai a, mak ka ti lutuk chu ka lo dawh tawp, chutah a aia uar zawkin a rawn ti zel a, mi bialpa anihna te chu ka theihnghilh zo ta vek mai, ka thiam dan dan chuan ka lo chhang let ve a. Ka mitthlaah Rosie alo lang
zawk a, ka namsawn nghal. Mak tih hmel deuhin min en a, min kuah a tum a, ka tho nghal, ka zak a ni, min duh thu pawh a sawi lo, min fawp a, keilah chuan ka lo chhanglet lehnghal a. A rilru chun sihhnip min ti ngawt ang chu, ka mittui alo tla ringawt, thil sawi ka tum a, ka tawngchhuak mai thei lo, a lo ding ve a, min kuah ta hle hle a,"Te, tihnat che ka tum lo.ka duh che, chu chu hria la ka duh ani" "Rosie nei reng chung hian maw?" Ka thin a rim thut a, ka kal nghal a, min vuan bet tlata,"Tinge Rosie chu i sawi fo a, kan in ngaizawng lo," ka melh hrep a, "Ka ti tak tak, ka duh che" engtinnge ka rin theih ang, kan kal hma pawn a rawn thlah ani lawm ni? Duh viau pawh ni ila mi inkara tlakzeh chu ka duh teuh lo mai. Kal chu ka tum lui ta tho a, "Rosie hi a cancer" teh tawp a. Min thawng lutuk, ka va hawilet a, a mittui a lo tla a, "Engthil nge i sawi" ka aw te chu a lawi vek,"Chu chu ani lawm ni i hriat duh kha, " min rawn pan hnai a, ka dar ah a vuan a, "Chuvang chauh chuan asin ani hi ka kalsan theih loh. Ka khawngaih vang hian ka hmangaih tihna ani lo, 1st yr kan nihlai bak khan kan inkawp lo asin, thian ang chauh in kan inkawm tawh. Mahse a natna hi kei tih loh kan college ah hria an awm lo. Min thlamuanpui em em a, a unaupa leh a thian nih ka kawp a, chubak chu kan inkarah engmah a awm lo" sawi tur ka hre lo. Ka thinlung zawng zawngin Rosie chu ka khawngaih, "Te, mi zinga inthlahrung deka i awm thin te, thingbuk hnuaia i hun hman thin leh library a i hun hman thin te hi avaiin ka hria asin. Ka duh che a, chuan i rilru chu min hrilh ve thei mai lovem ni?" mak ka tih em avangin chhan nachang pawh ka hre lo, ka nui sak a,"Min duh ve tihnaah ka ngai mai dawn nia aw?" A tih chuan ka bu zauh a. Kan thiante awmna lam chu kan pan phei ta a. Ka mutnaah te chuan ka ngaihtuah reng a, engtinnge Vanrempuia hi ka bialpa alo nih tak thut theih? Ka nui var var a, Puii msg tur ka type zet na a live ngeia hrilh ka duh leh ta zawk a.
Lianchhiari lunglen tlang te, Thasiama se no neihna hmunte kan tlawh zawh chuan Aizawl lam panin kan haw leh ta a. Ka thiannu Puii hmuh hun mawlh chu ka nghakhlel, tlai thim thet thet ah in ka thleng a, ka inbual nghal a. Ka inbual lai chuan thawveng zeta Puii tawng thawm ka hria a, hmanhmawh zetin ka inbual sawk sawk a, ka room lamah rawn lut tlangin,"Ka thiannu em em, lo chhuak vat teh" a nui leh uar uar a. Henu hi chu aw, ka tan hian ava hlu tak, a tello chuan engmah ka nilo. Kan inhmu chu kan tre leh chel chul a, burma thil nepnawi ka hawn sak te leh bag nalh zet ka hawn sak chu ka pe a, a lawm leh kher mai, thil hawn man hi a awm thin ania. Kan zin chanchinte min zawt a, Rempuia nen kan chungchang ka sawi chuan a meng bial kawk a,"Ani maw... ka thian, engtin zel? Rosie kha..." "Nia, an lo ni lo a, a..aa" cancer ka ti hman tep a, mahse tuma hriat a duh lo tih ka hrechhuak a, sawi zawm ta lo chuan kan thlalak te chu ka en tir ta zawk a,"Mipa lerh deuh chu ani em lo ang tiraw? Ka thian, i nat hi ka hlau ania," ka kuah a, ka thiannu hi chuan mi hi ava ngaihtuah thin em!
Exam a hnaih tawh avangin class pawh kan kal regu tawh lo a, Rempuia nen erawh kan inhmu fo a, kan hlim thei hle. Rosie natna ka hriat atang khan amah khawngaihna ka nei thuk hle a. Rempuia pawhin a tlawh fo a, kan inkar alo hrilh tawh avangin keimah nen pawh an inah chuan kan kal thin. Hlim takin min lo be thin a, cancer natna pawhin a tihchhiat theih ka rin loh a taksa mawi leh nalh tak te, a hmeltha tak te chu ka thlir ngawih ngawih a, class pawh a kal tawh loa, a kal loh chhan erawh kei leh Rempuia chiah in kan hre thung. Exam chu a chak ve em em a, mahse phai ah in checkup tura an kal hun a nih dawn vangin a exam ve dawn ta lo. Keinipawh kan exam avang chuan thildang ka ngaihtuah hman lo a, Rempuia nen pawh exam ni ah bak kan inhmu ngai lo. Phone ah erawh kan inbe reng a, exam zawh ni chuan Rosie kan tlawh a. Phaia an kal hma ai khan alo cher deuhin ka hria, mahse a hmelthatna erawh a la chuai chuang lo. A room ah kan inkawm a, a chau deuh a, a muhil ta a. Keinipawh kan haw a, kan inah Rempuia chu alo leng kawi a, kan hlim ve hle. Kan hma hun tur te sawiin MA zawm chu ka tum tihte ka sawia, ani erawh chuan a tum tawh lem lo a, hna ka zawng tawh ang ati thung a. A pa tha chhangdawltu ber anih avangin keipawhin awm chu ka tih pui, mahse a tellova nitin University lama liam chu huphurhawm dawnin ka hria.
Kan result alo chhuah chuan first class ah ka pass a, Rempuia leh Puii pawh Second class ah an pass bawk a. Kan hlim ve hle, Puii chuan alo tum tawh dan angin Chennai ah a u te bula MA zawm a tum a, ka ngai dawn kher mai. Class tan hma chuan Rosie te inah ka tam hle, a chauh leh deuh a ka hriat avangin ka tlawh awl lo va, amah leh a chhungte pawh ka chungah an lawm hle. Movie hrang hrang ka collect a, kan en dun thin a, kan duhthusam te kan sawi dun thin. Nikhat chu a hmel a hlim lo riau in ka hria a, a room ah "A walk to remember" film chu kan en a, "Te, Rempuia hi i hmangaih em?" ka la ngaihtuah ngai lo tih ka hria,"Rosie, ka duh tih hi chu ka chiang. Ka hmangaih leh hmangaih loh chu... ka chiang bik miah lo" "A theihna zawng zawngin a hmangaih che" min hrilh ni pawn ka hre chiah lo,"I hria em, first year kan nih lai atang tawh khan" chu chu Rempuia pawn min la hrilh miah lo, amah chu ka en reng a, sawi mai tur chu ka hre lo. Thingpui laksak turin inhnuai lam ka pan ta daih a.
Ina ka haw hnu pawh chuan Rosie hmel kha ka mitthlaah a cham reng a, tinge a hmel ah khan na ti hmel ka hmuh le? Rilru nuam zan lo chuan lehkhabu ka chhiar a. Zanah Rempuia pawh alo leng a, chhun lama ka hun hman dan te min zawt a, ka hrilh chuan a nui sak a, ka chalah min fawp zauh a, "Rempui, thil pakhat zawh che ka duh a?" Min chhang lem lo chuan ka darah a lu a nghat a,"Rosie hian a hmangaih che tiraw?" A chesawn chuang lo, "Hmangaih lo ang. Chutiang te engatannge i tih a?" a tih chuan "ka zawt mai mai che" ka kut a vuan a, "Rosie chu ka thiannu ania, chuan a natna avang hian ka kalsan theilo bawk. Mahse a natna chungchang bak hi chu sawi lo ila tha lo maw, te.. ka ex ania , anuam ka ti bik miah lo ania" ka lu chu ka bu nghauh a, ka bianga min piai a,"Nang chauh hi ka duh che" a tih chuan ka rilru nuam lo te pawh chu a bo duak a. Ni e, khatia Rosie hmel ka hmuh khan ka inthiam chiah lo ni berin ka hria. A chhan chiang tak erawh ka hre mai bik lo.
Kan class bang chu ka thian thar Duhi leh Zawni te chuan min sawm tlat avangin Lammual ah inkhel chu ka en ve a, tiang vel hi ka chak zawng leh phur zawng ani lo, hetiang ai chuan mahniin room ah lehkhabu chhiar ila ka tleipui zawk, mahse boring min tih thin em avang chuan in adjust ve chu ka tum a, ka ti hram hram a ni. Kan haw tur ka tho chhuak chiah chu ka thiannu Puii bialpa Tima leh hmeichhe pakhat induh hmel taka inkuah chu ka hmu a, ka thin a rim kher mai. In ka thlen veleh Puii chu ka biaa, Tima nen an inkar that leh that loh te ka zawt a,"Tha over, ka thian, laltima hi chu ka ring bur, vawiin pawh kan inbiaa, lammualah ka thianpa nen kan kal dawn atia" a rawn tih chuan ka hinrim lutuk chu ka puakkeh lo chauh. Thil awmzia hrilh nghal rum rum chu tha lo a ka hriat avangin ka ngawi ta rih a. Rempuia bulah erawh ka thinrimzia leh mipa rinawm loh zia chu ka sermon nghek maia, a nui vur vur ka hmuh chuan ka bula lukham chuan ka vawm phei nghal a, ka bula rawn thut pahin,"Thinchhe ve reuh lutuk mai" ka hnar a piai zauh a, "Midang inkar ah hi chuan inrawlh tam loh hi a tha ber nia aw ka duat" a ti a,"Ka thian tha ber ania ani te chu, buma a awm hi ka hmu thei hleinem" "Chiang takin chu nu nen chuan an inngaizawng tih i hria mi" a ti mial a, zuai raih in"ka hre lo" ka ti a. Ka mitah tak min en a,"Thil hi a landan ang hi a ni vek lo a, enge thudik tih hriatchian hma chuan thutlukna siam loh tur" a ti dam thlapa. Ni e, a dik chiah alawm, ka ngaihdan thui takin ka kalpui nasa lutuk hi Puii pawhin min khap fo thin tak kha.
Rempuia pawh company pakhatah thawk ve in kan inhmu khat ve thei hle a. Inrinni pawh a chawlh loh avangin keimahin Rosie chu ka kan thin. Vellore lama an kal a hun leh tawh avangin an kal hma chuan ka va kan a, Rempuia erawh a kal hman ka rin loh avangin ka kal tur thu pawh ka hrilh hran lo. An in ka va thlen chuan Rempuia bike ka hmu a, kan inhmuh khat avang chuan chutia alokal ve chu ka lawm hlea, ka lut ve nghal a. Rosie nu chuan,"Tete, i va han fel tak em nang hi chu aw... Kha Rempuia pawh a awm kha room ah han chho ve rawh in eitur ka lo siam ang" alo ti zung zung a. Phur takin ka chho a, room kawngkhar chu alo inkhar phui loa, va barakhaih ila athat ka rin avang chuan zawi te in ka kala, Rosie leh Rempuia lo inkuah ngawih ngawih ka hmuh chuan ka ding chawt a. Va luta va pawh turin huaisenna ka nei lo. An mittui atla ve ve a, awmdan pawh ka thiam chiah lo. Rosie room bula pangpar huan ve ang deuh an siam ah chuan ka thu hnawk a, engthilnge ka tih dawn tih chu ka in zawt a, Rosie hian Rempuia hi a hmangaih takzet niin ka hre bawk. A damchhung hian hlim takin awm sela ka duh a, chumi tur chuan Rempuia ka thlah zalen mai dawn em niang? Mahse kei chuan ka sawichhuak ngam dawn silo. Inhnuailamaah chuan ka chhuk a, engmah boruak awm lo ang chuan ka theihtawpin ka awm lui a, Rempuia leh Rosie pawh an rawn chhuka, min hmuh chuan Rempuia chu a hrilhhai deuh in ka hria. Mahse a insiamrem vat a, Rosie nu chuan,"Hei Tetei leh Rempuia zawng in thiannu hi in hmangaih tak tak niin ka hria ka lawm khawp mai. Chhun lamah Tetein a theih ang angin a rawn kawm hlim a, zanah Rempuia alokal bawk a. Kan chunga in thatna hi kan lawm takzet ani" a tih chuan ka thinlung hi alo na veng veng. Pawn lam ka melh lui tlat a, zanah Rosie te ina akal thin vang anih chiah hi alo len hman ngai loh ka ti a. Thudik chu min hrilh ve nise ka rilru hi ana miah lo ang, ka thiannu ve tho ani a, natna khirh tak a tuar hi keipawhin ka khawngaih lutuk, ka hma ka sial in ti em? Mahse min ngaipawimawh in min han hrilh ve se ka ti mai chauh ani. Ka haw tur chu min thlah atum a, tih tur ka la neih chhuanlamin keimahin ka haw a. Mahse in lam pan lo in Duhi te in ka pan ta zawk a, ka thiannu Puii tih loh ah chuan Duhi hi ka thurawn lakna ber a ni. Ka thlen chuan keimahah dik lo a awm tih alo hre nghal a,"Rosie hi ka khawngaih emai, a natna avang chauh hian Rempuia hi a then tih ka hria. A damrei lo pawh alo ni maithei, Rempuia hi nei let leh se ka duh ani" ka ti tawp a. Duhi chuan Rempuia nen sawi tlang tur leh mahnia thutlukna siam lo turin min chah mawlh mawlh a. Ni e, a dik ang, kei chu Pathian zarah ka dam tha a, ka tuar thei zawk ang. Rosie hi a natna tuar chauh pawh hi a nat dawn nen, hmangaih chan lehzel chu a na lutuk ang. Ka mittui ka hru hul a, kan in lam panin ka haw ta a. Gate nghengin Rempuia chu alo ding reng a, min hmuh veleh min lo kai a, "Khawnge i kal a, khua a vawt ropui sia i in ha lum bawk silo, ka ngaihtuah lutuk che" a lo ti a. Ka tah mai loh nan ka hmui chu ka pet fan fan a, inchhung lamah min luhpui a. Kawrlum te ka ha a, sitting room lungngaih hmel taka lo indawm kun reng Rempuia chu ka pan a, min hmuh veleh a lo nui sak a, a hmel chu a chau ngawih ngawih tih ka hria, a bulah ka thut veleh chuan min lo kuah nghal vat a,"Te, ka kal thin tih kha ka hrilh loh che vangin tihpalh aw.. ka inthlahrun em avang in nia ka sawi ngam loh" a beng ah chuan ka pawt a,"Mawla, kei hi chutiang em em in ka rilru a te in a zim mi? Tha deuhin min hrilh la ka lawm zawk, i hria em?" Ka ti a. Min pawm thut a,"Khawvelah i tha ber, chuan ka hmangaih che, Tete, ka hmangaih lutuk che" ka nghing dawt mai. In hmangaih thu hi kan la sawi ngai lo va, min hrilh thut chu mak ka ti a ni. Keipawhin ka hmangaih tawh hepa hi, mahse ka sawi chhuak thei lo. Ka tah a chhuak tlat a, "Tahbelh si" ka hnar a piai leh zauh a, chum ka tum chu ka hmui ah min rawn fawp ta vawng vawng a.
Hun alo kal ve zel a, kalna a hlat em vang leh hostel ka chan tho avang chuan hostel ah ka awm. Sunday ah erawh ka haw chho ziah thung a. Rosie pawh ka hmu khat khawp mai, phai an kal hnu khan vawikhat chiah ka hmu a, ka inthiam chiah loh avang chuan inkhawm banah ka leng phei a. Alo muthilh avangin a khum bulah chuan ka thu a, Rempuia pawh lokal vw atum avangin ka lo nghak a. Album a dah chhawn urh chu ka la a, ka en vel a, adang lak leh tuma ka ban chuan diary ni awm tak hi ka phawrh chhuak a, mi diary chhiar ruk chu thil tih chi loh tak ni mah se enginemaw min mawlh a, ka en chak riau a, inthiamlo chung chuan ka han keu dek dek a. Ka keu chiaha ka chhiar hmasak ber chu,"Ani chu ka thinlung zawng zawngin ka hmangaih a, mahse hmangaih ber Tetei a tawng tawh a...." ka lo rindan chu a dik chiang ani. Hmeichhia chuan kan hmeichhiatpuite rilru kan hre thin. A hma chiah mi chu ka chhiar zel a, a hma lam ka en a,"Hmangaih chu ka tawng ve ngei a, Vanrempuia ani. Ka hlimna ber a ni a. Khawvel ah a aia hmangaih ka nei lo. Mahse.. ka natna ka hriat chhuah atang khan ani chu nitinin hlat ka tum a, harsa mahse atana tha zawk anih avangin ka kalsan ta" tih te, "Ka thian ani a, ka unaupa ani bawk a. A hlim hmel ka hmuh hian nuam ka ti thin. Tetei hi ka va awt thin tak m! Rempuia hmangaih ber a ni si" tih leh a tam mai. Ka chhiar zawm thei tawh lo. A room a a bathroom ah ka lut a, ka mittui a tla zawih zawih a. Rempuia min koh ri ka hriat chuan ka hmai ka phih vat a, ka chhuah chuan alo thu reng tawh. Rosie pawh alo harh tan a, min hmuh chuan a hlim ve hle. A cher em em a, ka khawngaih ngei mai. Ka rilru chu ka siam fel tawh, Rempuia hi ka pe kir leh ang. Zanah chuan inkhawm lo in Rempuia chu lo leng turin ka ti a, dar rik hnu reiloteah alo phei ve nghal a. Ka en ngawih ngawih a, thla te kan la a, a hlim hmel hi hmuhnawm ka ti. Kei min lo hmangaih vannei ka in ti bawk, "Zanin i hmel chu a dik miah lo. Lehkha i chhiar nasa mi?" Min ngaihtuah hmel takin a ti a, "A..a.. thil ka lo ngaihtuah nasa lutuk a" ka ti bah nawk nawk a. Ka chal a rawn khawih a,"Khawsik..awm lo a" "ka tha ka tih chu.. Rempui, thil sawi duh ka nei a" "eng thil nge ni ? Min then duh thu a nih loh phawt chuan ka lo ngaithla ange" a lo ti vat a. A kut chu la in ka hum vang vang a,"Rosie hnenah kir leh rawh" mak ti hmel takin min melh a, chutah a then sak a,"Te, i lung ka ti awi lo mi? I duhdan nih phawt chuan Rosie chu ka tlawh tawh ngai lo vang" aw! I va hrethiam lo em! Ka mittui alo tla sawk a,"Ni lo, chutiang ani lo. Rosie hian a hmangaih che, chuan a mamawh che asin" min chhang lo. A kut ka vawn chu a phelh a, a ding a, pawn lam a thlir vang vang a,"Tete, kei hian nangmah ka hmangaih si che a" beidawn hmel zetin a ti a,"Rempui, Rosie diary ka chhiar a, nang hi a hmangaih che. A natna pawh hi a nat dawn tehlul nen a hmangaih a chan che hi a na dawn lutuk, chuvang chuan i kir leh tur ani. Hlim takin a nun hman tir ang" ka ti a. Ka mittui chu alo tla zung zung a, hruk pawh ka tum chuang lo, rei tak kan sawi dun a, a changin kan inhnial a, ka thutlukna siam chu sawhsawn ka tum lo tih a hria, tih ngaihna ahre tawh bik loa, "Nang nena inthen tur hian ka lo la ngaihtuah chhin ngai miah lo. Mahse Te, Rosie chu ka lo duh tawh thin ngei alawm, mahse nang ka tawn hma thil a ni" a ngawi vang vang a,"Ava harsa dawn ve.. mahse i duhdan anih chuan theihtawp ka chhuah ang" a maimitchhing daih a. Ka kuah a, a awm ah ka hmai ka phum a, ka tap zawih zawih a, min rawn pawm ve thlawp a, mittui nen kan pahnih tana zan hnuhnung chu kan hmang a. A haw dawn chuan alo hawi let a, a rawn tlan let leh a, kan in pawm leh vawng vawng a. Duh reng chunga inthen hi a lo na takzet. Kan inthen hlenna tur pawh ani maithei, duh thawh takin kan in fawp vawng vawng a.
VANREMPUIA (LAST)
Rempuia nen kan inthen atang chuan hostel chu ka chhuahsan lo. Sunday ah takngial pawh ka haw ngailoa, ka chhungte chuan sunday tal chu haw turin min ti fo a. Mahse ka la zuam ngang lo a ni. Lehkha zir chu harsa ka ti thin ngei mai, mahse ka rilru la peng thei ber anih avangin ka bih lui thin. Zankhat chu ka thiannu Puii'n min rawn biaa, Tima nen an inthen thu leh alo kawp thu te, nau hial an lo pai thute sawiin min rawn tahkhum nghek a. Kan chanchin pawh kan sawichhuak a, kan dinhmun chu in ang chiah lo mahse ka hriatthiampui khawp mai. Remchang hmasa berah zin ka tum thu sawiin kan inbiakna kan titawp ta a. Ka thawl hawkin ka hre hial, harsatna te, lungngaihna te pawh hi han sawi chhauh chuan alo ziaawm thei viau alo ni.
Exam kan zo a, chawlh chhunga Chennai ah Puii bula zin ngei chu ka tum ruh hle a. Mahse ka cousin in pasal aneih dawn avangin ka kal mai thei dawn lo. Rosie chu ka rilru ah a awm reng a, mahse ka hmu ngam rih ngang si lo. Ka cousin te inneihna tur hmun Chaltlang lamah kan kal a, an inneih zawh a thla te kan lak hnu chuan in lama haw tumin ka chhuak a, Rempuia chu ka hmu hlawl mai. Ka hmuh leh vawikhatna anih avangin awmdan pawh ka thiam chiah lo, amah zawk chuan min lo biaa,"Inhmuh ava khat ve Te.. i dam maw?" "Aw dam ve zel e. Enge Rosie a an?" Ka tih chuan a chal a ti chuar nang a,"Nang i tha em tih pawh hi a awm lo" a nui hak a,"A tha viau rih e.. tinge i no.i thlak kher a" chhan ngaihna ka hrelo ka ngawi tawp a, ka cousin in min lo koh avang chuan ka kalsan ta a. Ka rilruah thil dang a leng lo, Vanrempuia chauh lo chu. Ni e ka number thlak chhan pawh engdang ani lo, a,aw ri ka hriat a, a msg ka hmuh fo chuan ka chakna te hi an bo zo ang tih ka hlau a ni; ka thutlukna lo siam tawh ah khan inchhir chang ka ngah si a.
Ka lo tum lawk tawh angin ka thiannu Puii awmna Chennai lam chu ka pan ta a. Ka thiannu nen kan inhmu chiah chu kan au chel chul a, U Zaia(Puii u) nuih aza leh hle. Naupanlai atanga inkawm chho char char, school pawh lut tlang a college thlenga kal tlang kan ni bawk a. Thian dang kawm thin mah ila kan pahnih inhmangaihna ang hi a awm ve tak tak lo. Mi hlim thei tak leh mahni thil tawn apianga lungawi thin ani bawk a, Tima nen an inkar pawh a pawm thiam leh vek tawh a, a nuih pui leh uar uar thei tawh. Kei ve thung hi, thil tha ti a inhria in ka na ru tlat si. Chu chu ka thiannu hian a hmuh hmaih hauh lo, ka kianga a awm hi chuan ka rilru hahna te pawh a zia sawt thin reng a ni. Beach ah te kalin kan hun neih chu a hlim thei ang bera hman ka tum a. Ka rilru pawh a hahdam tan viau. Rosie kha ka hrereng a, a hmangaih ber kiangah a awm a, hlim sela, ka inpumpekna hi ti thlawn lul lo se ka duh a ni. Karhnih lai ka cham hnu in ngai leh thlahlel tak chungin ka thiannu chu ka haw san leh ta a.
Hun alo liam ve zel a, thlasik chu nipuiin a rawn thlak a, nipui chu fur in a rawn thlak leh a, ka thinlunga ruak awm erawh hnawhkhattu an la awm lo a, Vanrempuia thlak thei tu ka la tawng lo. Min beisei leh min duh der tu te chu awm thin mah se tumah ka ngaihsak lo va. Ka nundan hmasa ah kirin mipa aiah ka lehkhabu te chu ka kuah tam zawk. Ka thiannu Duhi an khaw lama a haw dawn avangin ka thlah a, ka haw chuan ka room ah ka lut tlang nghal a, Rosie chu alo thu reng a, ka phu nasa kher mai. Chuti taka ka phu nasa chu a nuih aza em em a, mittui tla phungin a nui a, a tawpah chuan a insum thei ta hram a. A thutna ep chiah a ka thu a, ka chezia chu min chik hle in ka hria,"Te, tinge ilokal ngai tawh loh?" a hmaa hlim taka a nuihna kha hre ang pawhin a awm leh tawh lo, "A..a.. nia, ka tihpalh, ka buai ve lutuk a" ka ti bah niai a. Ka mitah chiang takin min en a,"Tihpalh aw...?" "Engvangin maw?" Ka ti let ha a, ka kut chu la in a hum vang vang a, "Ka mamawh lai taka Rempuia min pek kir avangin" a mittui chu a hru zauh a, "Min hlat hian hrehawm ka ti, Te, ahma ang khan awm leh ang, i thian nih kha ka duh" a ti a. Ni e engvanginnge kei hian min thlahlel ve ngawih ngawih tu hi bihruksan ka tum fo, hetiang taka dawihzep hi maw ka lo nih? Ka kuah a, "Rosie tihpalh aw.. ka rilru kha ala pangngai reng ania, i thian ka la ni reng alawm. Keima buaina chiah ka lo ngaihtuah a, tun atang chuan i thian tha tak kha ka ni leh ang" ka ti a. Hlim takin a haw ta a.
Ka hman chang in Rosie pawh ka tlawh leh tan a, a nun chu a hlim sarh reng a, a taksa erawh a chaklo tial tial niin ka hre thung. Rempuia pawhin theihtawp chhuahin tihhlim a tum ve hle tih ka hria, a tha lo deuha ka hriata ka kal nghal pawhin Rempuia chu alo awm leh hman reng tawh thin a. A inpe zo takzet a ni. Rosie leh a chhungte pawhin an thlamuanpui a, an fanu hian a hmangaihzia an hria a, a chang chuan an inthlahrunzia ka hnenah an sawi thin. Mahse inthlahrunawm turin Rempuia hi a awm ngailo a, chhuang takin ka lo thlir fo thin. kan pahniha kan awm tlan pawhin Rosie tan hmuh hrehawm turin kan awm ngailoa, thian innel tak satliah ang bakin kan awm ngai lo. In checkup tura Vellore an kal leh dawn pawhin Rempuia chuan hruai a tum tlat a, a chhungte chu an inthlahrun em avangin an han hnial a, mahse Rosie hlimna tur anih avangin a tawp thlenga buaipui chu a tum a ni. Vellore pan an tum tlai chuan Rosie chu a luak reng a, a chau em em a, kal pui chi rual anih loh avangin damdawiin lam an pan pui a, Rempuian min rawn fon vat avangin ka nu nen kan kal nghal a. Ka rilru in ka tawngtai mawlh mawlh a, chan ka duh lo, engtik atang khan nge amah ngaihtuah reng renga hun ka lo hman tak ka hre lo, mahse a dam tur a ni.
Kan va thlen chuan a lo ziaawm leh tawh a, biak pawh a hre tawh an ti a, ka thaw huai mai. Min lo hmuh chuan min lo nuih var var a, rilru tawngtaina neiin lawmthu ka sawi nghal mawlh mawlh a. A bulah thu in a kut ka vuana, ka mittui chu alo tla leh pur tawh,"Ka hlauhthawnzia hi i hria em ?Tiang khan min ti hlauthawng tawh suh" ka ti a. Tawng a tum a,"I la chau emai, titi na hun kan la ngah dawn alawm" tiin ka lo khap vat a, hahdam hmel takin a maimitchhing vang vang a. Zanah chuan Rempuia nen min riahpui rawh se atih tlat avangin midang chu an haw ta vek a. Tlai atang a muhil char char a, a muthilh chhung chuan movie kan en vel mai mai a, dar 9 vel ah a muhil chu rawn harhin Rempuian a chalah alo fawp zauh a. A nui ver ver a, a riltam leh tam loh ka zawh chuan ala ei chak lo tih a sawi a. Rempuia bulah chuan a khum chu ti kang turin a han ti a, a tih zawh chuan a bulah min thut tir ve ve a, "Ka tan in hlutzia hi in in hre lo ang tih ka hlau, khawvelah hian thian ti a ka sawi ngam chu nangni chauh hi in ni" Rempuia a en a,"Ka tan tun thlengin i awm reng thin a, tunah chuan i tana nung ve tawh turin ka duh che a, i hmangaih ber Tetei nen hian hlim takin awm ang che u aw" tawng tumin ka ang zuau hman a,"Engmah lo sawi ve ka la phal lo nia" min nuih sak a, a sawizawm leh ta a,"Ka damlai ngei hian innei ang che u, ngenna nilo in order anih chu" a ti leh a. Rempuia chuan a kutah alo chelh vat a, "Rosie, i dam reng dawn alawm, ka nei ang che tih pawh ka tiam vek che kha, i thi dawn lo" alo ti dam thlap a. Keipawh chuan,"Ni e Rosie, Rempuia nen chuan kan innei thei lo vang. Ka duh tawh hleinem" nuih pahin ka va melh zeuh a,"College kan kal lai khan a lar a, ka duh ve mai mai alawm" kan ti lehnghal zat a. A maimitchhing vang vang a, a rawn mwn leh chuan,"Dawt in sawi thiam lo emai, ka thu chu awih ula ka thil duh hnuhnung ber min tihhlawhtlinsak angai ang. Tete, Rempuia hian a hmangaih takzet che. Ka natna avanga inhmangaih tak te pawt thentu nih hi ka duh lo, chutiang chu min nihtir lul suh u. Enteh, i hming hi vawi tam tak a tawngvaih laiin a lam thin asin, mahni hmasial vangin ka haider thei lo ani" a mittui chu a far zawih zawih a,"Te, nangpawhin i hmangaih tih ka hria, tun thlengin midang tumah ila kawp theih bik loh hi, a derin nung tawh lo ang u" a ti a, hahdam hmel takin a thaw hawk a. Sawi tur ka hre lo kher mai, ka kun reng a, Rempuia pawhin a hre bik lo aniang a ngawi ve reng a. Amah Rosie bawk chu a rawn tawngchhuak a, "Ka chhungte pawh engkim ka hrilh vek tawh, in chungah an lawm takzet a ni. Ka taksa hi a that lai ngei
hian innei ula ka duh a ni, inchhir tak chungin ka khawvel hun hi min hman zawhtir lo hram ang che u" a ti leh a. A tawng tam deuh vang chuan a chau deuh a, a muhil ta a. Pawnah thlifim dawngin ka thu a, Rosie ka hmuh hmasak ber na chu kan college canteen ah a ni a, Rempuia nen inhmatawn in an thu a, an titi karah an nui leh har har thin a. Ka en a, ka en reng a, hetiang taka hmeltha hian Siamtu hian alo duang bik chu thikawm rum rum ka ti. Ka en reng lai chuan min rawn melh a, a nui sak a, a ha var rual siau te, a vun paw sen nalh tak leh a sam kir chiat te chu a inhmeh tak meuh ani. Ka thian ni turin ka suangtuah pha ngailoa, a bialpa lo ngaihzawn ve phei chu hla tak a ni. Mahse ni theilo tura ka ngaih chu alo thleng vek si. Ka bulah Rempuia alo thu ve tih pawh ka lo hre mai lova, a khuh ri ka hriat chuan ka ngaihtuahna khawvel atang ka let leh chiah,"I va ngaihtuah nasa vung vung ve" a ti dat a, "Ni e thil tam tak ka lo ngaihtuah alawm mawle" kan boruak chu rit ka ti. Rempuia neih let leh hi ka lo ngaihtuah ngai miah lo, kumkhua atan ka lo thlah tawh a, ama hmangaih em em tu Rosie hnenah, mahse tunah hetiang hi ani leh si a. Awmdan thiam a har a, engtinnge ani kan lo chhan ang? Boruak chu a hip vang vanga, "Te..." "um" ka va melh zawk a, ka mitah tak chuan min en a,"Rosie thusawi kha enge i ngaihdan?" A ti a, "Ka ngaihtuah phak loh thil a ni. Chhan mai dan tur paw ka hrelo" ka darah min vuan a,"Midang i nei tawh mi?" "Aih.. a.. nei lo. Chutiang lam pawh ni chiah lo" ka lo ti vat a. Ani chuan"Ka theihtawp chu ka chhuah ve in ka hria. Te, ilaka ka rilru chu ala pangngai reng, mahse i lo danglam tawh a nih chuan..." a ngawi ta daih a. A ding a, Aizawl khawpui eng phe uarh chu a thlir a, abulah chuan ding ve in,"Ka rilru chu lo danglam ta se?" "Na chu ka ti ngawt ang, mahe.. i hlimna tur hi ka duh ber zel fo vang" rilru nat hmel takin min melh a,"Rempui, ka hmangaih che. Englaimahin ka theihnghilh ngai lo che" ka ti a. Lawm hmel takin min en a,"Tunah khan enge i sawi, han sawi tha leh teh.." "ka hmangaih che" ka lo ti nawn sap a,"Ka hmangaih lutuk che Tete... Inchhirna tur nei miah lo in tunah chuan kan awmdun thei tawh ang, Rosie chuan ka hmangaih ber nang min pe kir si a" hlim avanga mittui nen kan inpawm vawng vawng a.
Palai hmel pawh hmu in inneih hun atan April ni 10 kan ruat a, thla khat chhung inbuatsaihna hun kan la nei a, Puii pawh ka bula a din dawn avangin alo haw vang vang a. Kan inneih tur thu alo hriat chuan Rosie pawh a hlim hle a, mipui punkhawmna a zawh vak loh avangin a chhuak ngai lo a. Kan inneih ni erawh kal a tum ruh hle a, kawr pawh a thuitir hial a ni. Kan inneih hun atan kar khat chiah a awm tawh a, Rempuia chu lo leng in zan rei tak thleng kan meng a, dar 11 velah a haw a, a haw fel chiah tih in Rosie nu chuan min rawn fon a, Rosie a chau thut a lo tlan phei ula ka rilruah in lo lang hmasa ber a tia. Rempuia chu ka call nghal a, ani pawh lo tlan letin min rawn hruai a, an in kan va thlen chuan an lo tap truau hlawm tawh a. Room ah ka tlan lut a, a kut ka dawm chiah min rawn melh a, Rempuia a melh leh a, hlim hmel tak pu chungin a maimitchhing a, a rawn meng leh ta lo. A natna hrehawm tak ata a zalen kumkhua dawn ta. Mahse a chhungte leh a thuante erawhin kan thlahlel a, kan ngai takzet a ni. Kan inneih hun a nghahhlelh em em pawh min hmanpui hman ta silo. Kan hun ruat chu tih danglam theih ani tawh silo a, ka huphurh takmeuh a ni.
Kan inneih ni pawh alo thleng dawn tawh a, a thlen hma tlaiah Rempuia nen chuan Rosie thlanah chuan kan kal a, lei vung la thar lam tak chu ka tham a, ka mittui chu alo tla zawih zawih a. Rempuia pawh a bang bik lo, reife kan awm hnu chuan kan hawsan dawn ta, ka thingthi rawp a, "Rosie, i nghahhlelh em em kan inneih hun pawh naktuk mai hi ani tawh asin, tinge min kalsan leh daih si. Min ti hrilhhai takzet a ni. Mahse ka hmangaih ber min pek let avang hian ka lawm e. A hnen i pan tak Lalpa hnenah chuan hlim taka kan inneih a, fanau malsawmna kan dawn theih nan min han dilsak ang che aw... Rosie mangtha aw" tiin thlanmual chu kan chhuahsan ta a. Ka kianga ding ka pasal ni mai tur, inpumpeknaa khat Vanrempuia chu chhuang taka melhin motor ah ka lut a, in lam pan in kan haw ta vang vang a.
~The end~
(ka tui na ani tih hriaa min phur pui a, min tui pui tu ka thiante tan ka hlan e)
No comments:
Post a Comment