THUCHAH HNUHNUNG (Part - 16 )

THUCHAH HNUHNUNG (Part - 16 )


    Hun liam zung zung mai chuan ni leh thla tam a herliampui ve ta a, keipawhin ka lo tum ngar ngar thin MCS officer ka lo ni ve ta, kei chu Serchhip ah min dah a, Notei chu la sen hle in kum la tling rih lo mahse Serchhip lamah chuan kan chhungkuain kan in sawn phei ve ta rawih mai a. kan insawn tirh chuan awmdan kan thiam lo hle, mahse Kan nu Sawmzeli pa te hi Serchhip khawchhuak an lo ni hlauh a, Kan nu tan chuan mahni chhuahna lam a kir leh ang mai a ni, a pi leh pu te zawng zawng pawh an la awm a, keipawh mahni khua a haw ang mai kani.


                    CHRISTMAS HNUHNUNG BER

    Hun leh nite a liam a, kan vanglaini te zawng pawh zamual an liam zo ta, Chuailoparin chuaini anei a, Kumtluangpar meuh pawn Kumtluang a daih hek lo, hriatloh hlan in kan lo upa ve ta hle mai.

  

 


    “Kan nghahhlel Krismas eng a lo zam thar leh ta” tih hla an sak te chuan Lal pian champha chu a hnai ta hle tih a hriat theih a,  Vawikhat chu thenawmte in ah ka leng a, kan nuih ho deuh dar dar lai chuan kan nau pakhat hi hmanhmawh hmel tak a a rawn tlan lai hi tukverh atang chuan ka hmu a, inleng ka neih avang a min ko tur ah ka lo ngai nghal a, mahse rin loh leh beisei loh zawng tak a, Kan Nu nikhaw hre lo a a tluk thu min hrilh rual chuan hmanhmawh takin in lam pan chuan kan tlan ta nghal a, a taksa khawng vek rei ial mai kan hmeh sak a   tuilum hmang te a kan han chul hnu chuan ngai rawn awh chho in a harhchhuak ve leh ta hram a, chuti chuan hmanhmawh takin damdawiin lam kan pan pui ta ani.



    Test chi hrang hrang a paltlang hnu ah leh Xray te an han tih zawh hnu chuan Doctor  in hmunpui lam panpui tur a min tih avang chuan ngaihtha lo tak chungin chhungkhat laina te nen kan han in rawn khawm a hmunpui lam chu kan pan pui ta a ni. Phai a Doctor te pawh chuan beiseina an neih san tawh loh thu leh Kan nu natna hrik chuan a taksa a lo luah hneh tawh avangin tih dam sak lam ai mah a rei theih ang ber a nunna chelh sak chauh an tih theih tawk a nih tawh thu min hrilh ta zawk mai si a, ka hnuk a ulh nasa mai mahse ka mittui far tur erawh ka dang hram hram thung.



    Ka nupui an dah na pindan chhungah chuan ka lut a, Tukverh atang chuan pawn lam zau takin a hmuh theih a, Tlaini tla tur chuan vairam a inchhawng sang pui pui te chu a chhun sen put mai a, in sang tak tak karah chawngzawng leh Parva nupa in thlawh pel suau suau te chu a hmuh em em mai bawk a, Tukverh tang a thlifim rawn thaw lut chuan chau zawi tak a khua chuan mek ka Nupui biang vuai tawh tak chu a chhem heuh heuh a, a sam te chu a leng siau siau bawk, a sam dum tle sar thin chu rawn tuak zo tawh mahse a mawipui dan erawh a ngai reng.

    Ka thawm hria in ka lam a rawn hawi nghal vat a, thenawm khawveng te a ngaih thu min hrilh a, a lungleng chu a van ruai mai ani, Vairam chu hreawm a ti a, damdawiin chu a ning em em bawk a damrei theih nan a pui tu Doctor leh nurse rual te chu a haw em em a, an chiau chang te hian a ang nasa thei ve hle ani, mahse a tawng engmah an hriatthiam loh avang leh an fel em avang chuan duat takin an enkawl thung a, an test na result min zawt a, a dam vat tur thu leh lungngai lo tur in ka thiam ang tawk chuan hrilh mahila ka awrawl ah chuan ka thla a phang tih a hrethiam mai, beidawng leh hnual hmel tak hian lehlam a hawi sawn a, pawn lam a thlir ngawih ngawih a, a ngaihtuah thui hmel khawp mai.



    Ka duat zawh pauh leh thil awm dan chu a pangngai lo tih a hre nghal mai a, Hmelhriat lo awm ve ten an rawn awmpui chang a han nui ve thin pawh hi thinlung chhungril tak tang a rawn nuichhuak ani lo tih ka hria, kan nulat tlangval lai a kan college kal ho lai te, a tello a nikhat pawh ka tlei theih loh thin zia ka ngaihtuah let leh thin a, kha tih hunlai a kan rilru put thin ngei kha a thar in a rawn in lumlet leh ni hian ka hria, ka en in ka khawngaih tak zet a, kei ka in ngaihtuahin ka in khawngaih em em bawk, hman a kan lo nuih pui bawrh bawrh thin te chuan min ti nui zo ta lo a, tah na chuan a zui ta zel si, kan hun hlui a kan hlimna te chu min ti lungngai tu an ni  ta zawk a, harsatna kan lo tawh thin te pawh kan dinhmun ah chuan sawi nuam an ni ta zawk a. Chutia kan beidawn em em lai leh hun harsa tak kan hmachhawn lai chuan khawvel erawh  Lal krista pianni champha lawm turin an in puahchah mup mup thung si.



    Kan fa hmasa zawk n kum 2 mi lek a nih lai a kan Christmas hmang ka la theihnghilh thei lo,  duat pawh a hlawh na rawh. Chumi tum chuan kan nu in, inchhung cheina a lei teuh a, mami ta tur thil thar tam tak kan lei sak a, kan u leh naute hnenah thilpek kan pe vek bawk, Fahrah enkawlna home a ka awm thin na naupangte tan kawr thar kan leisak vek bawk a, kan chhungkua in ka naupanai a ka awm thinna Fahrah enkawlna home ah chuan christmas kan hmang a, thawmhnaw thar nalh tak nen Christmas ni a Biakin a thusawi kha chu Christmas khan ka tan awmzia a nei hle, tunah erawh chuan ngaihtuahna vakvel in kiltin kiltang a hrut vel a, nu leh pa nei lo chanhai fahrah te tan Christmas hi eng tak ni ang maw.? kannu tan ve thung hian eng nge a an tak ang, kei a tan hian eng nge ni ve ta ang le..



    kan nu hian min hmangaih em em a ni tih ka hria, kan inneih tirh a a chung a ka rilru put thin zawng zawng te chu min ngaidam vek a, a tuar hram hram thin. ka lungnih loh deuh chang te hian min tih lungawi a thiam em em a, min duat a thiam bawk a, a bul a awm chu nuam dangdai thin tak ani. Ka arsi ka damchhung a ka tan a eng reng thin chu amah ngei ani tih ka hriat hmaih lo, mual min liamsan ta reng pawh nise ka thinlung thuk tak chhungah hian a eng tawp thei ngai lo ang.


    Kum tamtak liamta a kannu tawngkam ka theihnghilh theih ngai loh chu, “ Thlasik a lo herhchhuah tawh hi chuan ka thil hriattheihna zawng zawng hian a au thin che asin” ti a min ngaih zia thu lehkha a min rawn thawn kha ani, Thuziak sei tak nilo mah se ka tan chuan awmzia a nei thui hle. Christmas thla nen hian a inrem kati thei em em a, thiante hian min awt thei hle, Pathian in ka phu loh nupui hmeltha leh fal hawihawm tak min pek avangin lawmthu ka sawi mawlh mawlh thin.



    A natna in thatlam ai mah a zual lam a pan zel tak si ah chuan in lam a a thih hun nghak turin Vairam atang chuan kan haw ta zawk a, han hnial nasa teh mahila kan nu berin haw a duh tlat avang chuan ka ti lui duh bik lo, ka hrechiang a mi chak tak ani tih ka hria, a nunna chuan rei a daih tawh dawn loh tih hi a pawm thiam thlap ani, kei erawh chuan pawm harsa kati hle thung.


    A natna chu tihdam theih ani ta loa, ngai a chelhdin theih lah ani ta hek lo, December 25 zingkar ka tho chu, tukverh ka hawng a ni chu a lo sang tawh hle a, kan nu hmel ka zu en leh chuan a lo harh daih tawh chu lo ni in, ka mutui lai min tih harh buai a duh lo hi a lo ani a. tui ka chhuang lum vat a kan nu chu tuilum chuan puante hmangin a taksa te chu ka hrukfai sak in thawmhnaw nalh tak ka bel tir bawk a, kei leh midangte pawh insilfai in kan thawmhnaw neih that ber ber te kan in bel a, kan in peihfel hnu chuan kan mutna pindan lam kan pan khawm dial a, chhung inkhawm nei tur kan ni.

  
    Kan nu Bible chang thlan ngei chu ka chhiar a, Luka 2:10-11 “Hlau suh ulang ngai rawh u, mi tin ta tur CHANCHIN LAWMAWM EM EM ka rawn thlen che u ani, Vawiinah hian in tan Davida khua ah Chhandamtu a piang ta, LAL Krista chu”. kan nu lo huaisen zia hi mak kati khawp mai, ka mittui a tla a, kan nu erawh chu ka en ngam ngang lo, ka mittui tla lai a hmuh hi ka duh ngai lo, ka tah zawm hlau in thudang ka sawi ta zawk a, kan nu hian min peih lo san hnu pawh a hlim turin min duh a, a Bible chang thlan pawh ropui kati hle, keini chhungkua thihna kotlang a ding, ka nupui ka duat ngawih ngawih boral mai thei, chutiang chhungkua tan, Chanchin lawmawm em em chu, Lal Krista lo piang ngei hi anih zia kan nu hian a hrechiang hle a, chu ngei chu hrethiam turin min duh bawk ani.



    Ka mittui tla chu ka hru mawlh mawlh a, kan nu chu ka en ngam lo, a biang a mittui far chuan min ti tap zual sauh ang tih ka hria, zai hun a lo ni ta a, hla han sak te pawh a harsa hle mai thei leh thei lo in kan han sa a, a thunawn “ Tap leh rum a lungngaihna khawvel a ka chen lai in, lungrualna zion tlang a len hun ka nghakhlel” kan sak lai chuan tiam lawk ang mai in kan tawp rual thap a kan sak zawm thei lo, kan nu in hmun hla tak a min kalsan tur chu ka phal thei lul lo, ka ngaihtuah ringawt pawh hian ka hlau ani. thlan hmukhat ah arual a zal a, lungrualna zion khawpui a hlim tak a lendun chu a let tamtak in ka thlang daih zawk ani, thih chu duh hle mahila ka thu ani silo.


  
    Kan nu chuan tawngtaina chu keiman ka nei ang e a tih avang in khumah chuan kan han thut rem tir ta a, lehkhaphekah tawngtaina thu a ziah chu a cousin Hriati chuan a chhiar chhuak ta a. ‘” Aw Lalpa ka pasal leh ka fanu hi kalsan ka va ngam lo teh lul em, ka ngai ngawih ngawih hlawm ani tih i hria e, Pa i remruatna chu sawisel thei kani silo a, ka kalsan hnu ah pawh nangman i enkawl zui dawn a nih tih ka hriat avangin ka thla a muang em em a, Pa vawiin atang hi chuan he khawvel a kan lungngaih leh beidawnna te hi min lak bo sak la, Chanchintha lawmawm em em hi kan chhungkua ta ang hrim a, lawm tak a chu chanchintha chu kan lo dawn ve theih nan kan rilru min sawi danglam sak ang che”  tiin.


    Mittui tih thlak a nuam ta lo a, khauh tak leh nghet tak  a ding reng turin min duh tih ka hre ta, inti  pachang tak a naute Christmas chibai buk chu tul niin ka hria a, Kan nu chuan a puan tha dah that te chu min lak chhuah tir a, tha tak a tuamin Christmas thilpek a tan min sem tir ta a( Kan nu hriatreng nan He Christmas hi kumdang ang lo takin hman kan tum ani, keini ai a pa chhe zawk leh keini ai a vanduai zawk tam tak an awm tih kan hre si a) a chhungah eng te nge awm tih pawh an hriat hma hauh pawhin an lawm thiam ve hle a, a chhung a mi an hmuh hnu phei chuan an lawm hle,a chhan chu kan duh lai ngawih ngawih kei ni pawh in a kan la hak phal loh te an ni hlawm a. In a ka haw chu kan nu chu a lo hlim hle a kei pawh ka hlim em em ani. kan naute thenkhat leh kan Fanu note-i  erawh chu nalh tak a incheiin biaklam lam panin an thiante an zui a, chutichuan Christmas chu lungawi takin kan hmang liamta.


    A tuk chawhma dar 11 vel ah kan nu chuan min boralsan ta a, zankhua a lo thim chuan mitthi sun khawhar thutpui turin thenawm khawveng tlawmngai an rawn kal khawm a, Kannu tello a hun leh ni ka hmang dawn tih ka han hriatchhuah chuan ka hriat loh hlan hian ka mittui a lo tla leh hman teuh hi a lo ni a. Thalai ten hla an han sa a, a thunawn “ Hla tak a rammawi ah chuan kan tan lunghlu kawngkhar chu hawn mek ani, Rangkachak khawpui mawi ah kan leng dawn e, Fakin au rawh u he lei ram mi kan ni lo”. Lairil a fan in rilru a na ngei mai, tah tur nge nuih tur tih pawh ka hrethiam lo hial a. Kan nu bul a thlen hlan chu ka nghakhlel em em ani.


    Ka suangtuahna mitthla ah te chuan kan in tawh leh hun tur ka hmu a, hmuh hlan mawlh mai ka nghakhlel ani, mi an haw zawh hnu chuan pawn ah ka chhuak a, van lam ka han hawi chho a kan chung zawnah tak chuan Siruk a hmuh theih a, kawlkil a ARSI eng tha em em mai ka hmu bawk a, ka en reng a, min rawn en let ve ngei ni a hriatna ka nei tlat bawk a, chu ngei chu kan nu nitur ah ka ngai ani, nuisang chung hian inchhungah ka lut a, ka fanu te chu a lo muttui tawh hle kei pawh ka khum ah ka muzal ve ta a.



    “Kan nunhlui liamta te ka dawn kir a lung a leng hle ka hriatloh hlanin ka mittui a lo far zung zung a,kan nu in min boralsan na pawh kum tam a liam ve ta reng mai, Kan nu in “ Thlasik a lo herhchhuah tawh hi chuan ka thil hriattheihna zawng zawng hian a au thin che asin””  a tih kha ka theihnghilh thei lo, Thlasik chu vawitam tak a herliam ta a, kan nu erawh chu a lo kir leh tawh lo. April par  pawh vawi tamtak a par nawn a, kan college luhna hlui a April par hnuai a thutna pawh kha zirlai eng emaw zatin an rawn luah ve tawh thin anga, kan thawnthu te hre silo hian an vanglaini chu an chen ve awm si a. Sawmzeli nen a kan thutdun thin na “Bil tree” hnuai leh April Par” hnuai ah te khan Batch engzat tak nge lo thu ve tawh ang le. Library chu a la ngai reng ang a. kan class room te erawh a danglam ve tawh ta ve ang.


    Ka nupui a boral hnu reilote ah chuan Serchhip tangin Aizawlah Education Department ah Under Secretary turin min sawn phei a, kan nu lu nghahna chhuahsan chu ka hreh hle thu neitu te leh CM hial ka biak hnu pawh chuan awmzia a nei ta silo a, kan mamawh che a lawm  bakah nangni ang officer tha te chu Aizawlah in awm ngei ngei a ngai ram tan chhawr tangkai theih in awm hi a tha “ tiin min transfer lui ta tlat a, ka lung a ni lo hle Aizawl chauh hi mizoram a ni lo, tihte ka rilru ah a awm neuh neuh a Mahse kawng lehlamah chuan mahni hmasial lutuk tepawn ka in hre ve deuh bawk si kan nu lunghahna hmun nih vang ringawt a chhuahsan hreh ka ang ve lawi bawk a.


    Serchhip tang chuan phurna nei map loin Aizawlah ka insawn chho ta a, Note-i leh kei chauh kan nih vang chuan ka khua a har ru thri hle, a chang changin Sawmzeli nu chuan min rawn awmpui thin a mahse a ni pawh in lam ngaihtuah a ngaih ve tho vangin kan mamawh ang a tam ang hu erawh chaun min awmpui thei lo, Sawmzelinu in min rawn awmpui chang chuan ka thla a muangin ka lunglen pawh a hnem thei hle a, mahse a haw chang hi chuan kan khua a har hle thung. lo theih lohin awmpui kan la a, nula fel takin min awmpui a Note-i pawn a ngaina hle. Sawmzeli unaute an rawn haw chang hian kan in ah chuan an awm chawt bawk a, kum khat vel kha chu ka lunglen pawh a hnem khawp mai mahse min rawn awmpui reng thei bik lo a, an hna vang leh zirna vangin min Phailamah min chhukthlaksan leh zel a, kum khatah thlakhat pumhlum pawh an awm hman meuh lo, chutihlai chuan ka khua a har thei hle a mahni a zu in keuh keuh ka ching tan ta a.


    Chutia zu lem keuh keuh ka chin tak ah chuan Notei-nu ka ngaihna leh ka lunglenna chu zu hmang a hnem ka tum ta fo a, a damlai a ka lo duat tawk lo kha ka inchhir a, ka indem a, ka inhua a, nun chu hreawm kati takzet ani. engkim hi a khawhar thlak a, khawvel hi a ruak huai hian ka hria a ni, inkhawm loh ka ching tan a, office ah ka tlem em em a, hna ka thawk tha thei lo a, Ka fanu ngei pawh chu ka ngaihtuah hman thin lo, School a la kal thei lo deuh a, kum 2 mi lek a la ni, Ka Fanu chuan min mamawh em em ani tih ka hria, engkimah min ring a keimah ah chuan a rinna zawng zawng chu a nghat tih pawh ka hei lo mahse keimah takngial pawh chu ka inringtawk tawh silo. mahni pawh a in ngaihtuah zo tawh lo chuan ka fanu chu engtin nge ka buaipui theih tehlul ang.


    Zankhat ka zurui chu ka Note-i chuan min rawn tiharh a, “A pa ka ril a tam” hi a rawn ti a, “Bawihte.. tlaichaw i ei lo mi..?” kati a. “Aw a pa chaw i ei lo a, keipawh ka ei duh lo”.. “Note kei chu ka ril a tam hleinem.. ngati nge chaw ka ei lo vang ngawt a chaw i ei loh a. ka siam sak ang che  ei rawh aw..” kati a. “A pa min ei pui rawh “ a ti tlat a. eng ang in zu in in rui thin mahila ka Fanu chu ka la hria, a lungawi nan chuan tiin zantlai tawh hnu ah chuan kan awmpui nula pawh chu kaitho chuang lo chuan choka ah eitur kan dap a, Note-i chu chaw ka ei pui ve ta a,. Chaw kan eikham a ka seng zawh hnu chuan khum lam chu kan pan leh ta a. khumah chuan kan thu dun ta a.


    Ka fanu hi min mamawh ang a tam a bulah ka awm lo tih ka hria, ka pawm a ka tangah chuan thlamuang takin a bei hle hle a, a khua a har in a lung a leng ngawih ngawih a ni ka hai lo. “Pa.. a nu i ngai ve em..?” chu thu chu zawh na chang a hria ang tih pawh ka ngaihtuah ngailo hrim hrim, a nu a lo ngai ve he dawn a nih hi, a khua a har in a lung a van leng ve thin dawn tehlul em..? kum khat leh chanve tehmeuh a liam tawh chuti chung chuan a nu hi a la hre reng a nih chu kum 3 mi lek tan chuan chu zawhna chu a ril mah mah ani, ka hrilh a hai hle. engtin nge ka chhan tak ang. ka ngailo kati dawn em ni, nge ka ngai lutuk tiin ka fanu rilru no tak chu ka tih no belhchhah tak ang, “Bwihte..  a nu pawn kan pahnih hian min ngai lutuk a lawm..” chu thu sawi ringawt pawh harsa kati tawh muhil tawh se ka va ti tehlul em, min zawh belh chuan ka tap chhuak thei hial ang. “A pa a nu in zu in a phal lo asin..” “Note mu tawh ila  a tlai tawh si a, mu tawh ang aw..”


    Note-i muthilh hnu chuan Bathroomah ka lut a tah rin hlau takin ka ka ka hup a ka tap ta hawm hawm a, Malsawmzel i fanu hian engkimah a chhun che a nih hi, kan inneih tirh a ka lo tih hreawm zia che leh keimah vang a i tah nasat zia kha engtikahmah ka in ngaidam thei tawh tawp lo ang, ka tan a i tawngtai nasat thin zia leh zu ka sim theih nan a Pathia i auh nasat thin zia kha ka hria sin, ka zurui chatthla luchungah kut nghat a min tawngtai lai pawh ka hre thin, mahse min ngaidam ang che ka ngai em che tin ni, engmah hian min hnem thei silo a, zu ka in hian ka chahthlak in engmah ka hre lo thin a chu chu nuam kati a ni, harhfim a ka awm chuan ka ngai em em che tin ni.


    Zu chu sim ka duh a, mahse zu in ka thisen a chiah hneh tawh em vang chuan keimah mai chuan ka sim thei tawh lo, min tanpui a hmangaih tak a min kilkawi reng tu awm sela chuan ka sim thei ngei ang, mahse keimah chauh chuan ka sim thei ta lo, Pathian hnenah pawh ka tawngtai fo “Ka pa zu ka nghei theihnan min pui rawh” tiin eng ang in tum nasa teh mah ila zu ngawlvei ka nih tawh miau vang chuan sim a hnekin zual lam ka pan zel si. ka thisen in zu a hmuh loh chuan ka tlu ta fo a, ka thih phah hial dawn thin.


    Ka fanu pawh chuan min hlau ta a, ka kiangah thlamuang takin a awm thei ta meuh lo, ka hna tang chuan suspend kani a, ka sum neih zawng zawng pawh ka chen ral ta, Ka Fanu khawvel a ka neihchhun pawh chu ka seilenna Fahrah enkawlna Home ah ngei khan Tlawmngai pawl ten an dah a, Keimah ang bawk a Fahrahin nun a hmang chho ve dawn ta anih chu. zu hrilh k ngaihtuah vang leh ka ruih reng vang chuan ka fanu chuan min hlau a ka hmuh pawh min phalsak tawh lo, tichuan kei chu zu vang a thih hmabakin ka awm ve ta a lo ni a.


    Tumkhat chu ka lung a leng hle a, Malsawmzeli nen a ka hun hman tawh na zawng zawng te ka fangkual a, April Par hnuai a thutna te, Bil tree” te, College Bus leh Library zawng zawng te nen, ka lungleng chu ka tapchhuak hiala, ka haw kawngah chuan ka rui hle a, chak takin Motor ka lo khalh hi a lo ni a, Vai Truck in min su a, nikhawhreloin ka awm zui ta a, engmah ka hre zui ta lo.


    Ni 7 zet mai nikhawhrelo a ka mut hnu leh ka thi emaw an tih hial hnu chuan ka harchhuak leh ta hlawl mai a, chutia ka han harhchhuah meuh chuan Damdawiin ah ka lo mu reng mai hi a lo ni a, ka mang a ang in mak kati a, pawi pawh kati hle ni sarih zet zu in lo a ka lo mut reng tawh vang chuan zu chakna pawh ka nei leh ta lo a, mahse ka ke dinglam tliak vang erawh chuan rei tak chhung chu ke in ka la kal thei dawn lo a, ka kal theih hnu ah pawh tiang hawl a ngai ngei dawn tih thu te ke hre leh ta zel a, Pathianin min zilhhau dan leh ka tawngtaina a chhan dan chu mak kati in lawmawm pawh kati hle.


    Ka harchhuah hma hret chuan mumang ka nei a, ka mumangah chuan Malsawmzeli ka lo hmu a, a lo hlim em em mai a, khati ang reng reng a a hlim kha ka la hmu ngai lo, a lawmna chu a famkim a a thlamuang hliah hliah ni ber hian ka hria. chutia “April Par” hnuai a kan thut reng lai chuan ka hmuiah duhthawh tak hian min lo fawp a, a nui ver ver a, minkuah a, min ngai ngawih ngawih a ni tih ka hria, min kuah nghet em vang chuan ka thaw a chham dawn hial a, “Bawihi . ka thaw a chham dawn nia ..” kati a.. min thlah a.. ka thaw chhuak a..” hmangaih luatah Min rek hlum dawn alawm,” kati a.. a lawm a ni tih ka hria, lawm avang a mittui far zawih zawih chung chuan min kuah leh a. tichuan Damdawiin ah kha ka rawn harhchhuak ta a nih kha.


    Kha ka mumang kha ka ngaihtuahlet pawh hian awmzia ka hrethiam loin mak kati thei hle, chutia damdawiin a ka harh ta chu ka bulah Doctor kawr ha hi ka khum bulah ah hian bawkin a lo muhil reng mai a, nurese rawn lut chuan ka harh tih a rawn hmu a, ka bul a thu Doctor muthlu chu a hrilh vat a, min buaipui nghal char char a, ka chauh em vang chua ka meng fiah lo ruai a, min buaipuitu doctor hmel pawh chu ka hmu fiah thei lo.


    Thlakhat zet damdawiin a ka awm hnu chuan ka keruh tliak pawh chu an zawm leh thei tawh a, ka taksa pawh a lo chak chho in ka tisa pawh a inhnawh khat ve ta a, hmel panngai ka lo pu ve leh thei ta, ka Car an suk chhiat vek tawh chu Insuarance lamin a tharin min thlak sak a, ka in enkawlna lamah ka Pawisa te chu kam hawk mahse Kan nu khan pawisa hman a thiam em vangin min lo khawl hnem sak hle hi a lo ni a. thiante leh thawhpuite tanpuina zawng zawng nen ka in enkawl senso chu ka pawisa khawl chu a che aih lo ang a ni.


    Min enkawltu Doctor chu Lalmawizuali a ni a, nikhawhrelo a ka awm chhung zawng leh Damdawiin khum a ka mut chhung zawng chuan a mah chuan min lo buaipui vek a, chhugkhat laina pun tur neilo ta fam chu ka accident tih pawh chu hria angaihventu pawh ka lo neilo hi a ni a, Ambulance in Damdawiin a min dahluh zan chu a Duty zan a lo ni hlauh a,  a mah chuan engkimah mawhphurhna a lo la nghal vek a lo ni a, ka lawm kher mai.ka thiante pawh a lo hrilh kual a, Sawmzeli chhungte pawh a lo hrilh a, a tir tak phei chuan ka thaw a tawp ti tih a, dam a ka chhuah leh theih pawh an ring tawh lo, mahse ka chungah Mawizuali beiseina a la neih tlat vang chuan darkarkhat zet ka lungphu a tawp hnu in ka thaw leh hlawl mai a mak pawh an ti tlang hle. a doctor puite sawi dan phei chuan tap chungin min lo au lawm lawm hi a lo ni a.


    Chutia ka han leikan ve deuh hnu chuan damdawiin a awm reng pawh chu ka ning ve ta bawk a, chhuah chu ka tum ve ta ani, ka chhuah dawn ni chuan Mawizuali chu amah chauhin ka khumah a rawn kal a, a in a haw ve mai turin min sawm a, mahse Mawizuali chung a ka inthlahrun em vang leh hmangaih tlak ni a ka inhriat tawh loh vang chuan ka hnar a, ka in haw zawk mai chu ka duh thu ka hrilh ta zawk a. mahse min hrilh leh dan chuan in ka lo nei tawh lo hi a lo ni a, ka inluah lai chu midangin an luah tawh a, ka bungrua tepawh ka Lawyer (Mawizuali min li rawih sak) in hmun himah min lo dahthat sak vek tawh hi a lo ni a. duhthlan tur ka neih loh vang chuan Mawizuali in lam a haw mai loh chu tih tur ka nei ta lo. khtaia a zirchhuah hnu khan a in indang ve a, mahni a in nei in clinic a hawng ve a, Doctor lar tak a lo ni tawh hi a lo ni a. mahni buai buai i kan buai a chanchin engmah ka lo hre lo a, mahse a ni chuan ka chanchin a lo ngaihven reng thin.


    Mawizuali inah chuan mikhual takin ka lawi lut ve ta a, Wheelchair a thu ngang ka nih si vang chuan chu mi ni chu awmdan thiam harsa ka ti ngang mai, Pasal neilo in a lo la leng char char hi a lo ni a, ngaihzawng te chu han nei ve lawp lawp thin mahse tumah thinlung takin a hmangaih thei lo a, chuvang chuan Pasal pawh a la nei lo, Nula hausa tak hi a lo ni ringawt mai a ni. chhun velah chuan Hmeichhe naupang uniform ha hi an awmpui nula nen chuan an rawn inzui lut bem bem a, chu hmeichhe naupang chu ka lo en reng a, a hmeltha in a felfai reuh ngei mai, Mawizuali chuan “Tu nge ka mikhualpa hi han en tehle a hmeltha em” a han ti a, chutah chu naupang te chuan min en reng a, tichuan ka lam hawi in a rawn tlan a, min kuah chawt a, “A pa tiin a tap ta hawm hawm a..” Ka fanu Note-i lo nirengin.


    Mawizuali chuan home tangin Note-i chu a lo lachhuak a, a fanu ang tak takin a lo enkawl hi a lo ni a, school te a lo kai tir a, nu hmangaihna chu a lo dawn tir reng thin. Mawizuali`n ka phatsatna min chhanlet dan chu ropui kati a, phulo pawh ka inti. ka chunga thatchhuah a la bansan miah lo leh ka tan a a la in pumpek thei hi hriatthiam har kati a, ka indem takzet ani.


    Zu ka nghei theih tak hnu chua ka hna zawm leh dan tur te ka gaihtuah a, mahse ka ke a ka la kal thei rih loh vang chuan chetsawn pawh harsa kati hle, ka ke chuan that lam a pan ve zel a, ka nun pawn awmzia rawn nei chho in mumal takin hun ka hmang chho zel a, in ah awm tlawk tlawk bak tih theih ka la nei rih si loh vang chuan ehkhabu chhiar lamah leh Lehkhabu ziah lamah te tan ka la ta zawk a, Computer hma ah thu in Facebook te chu ka kawm chawt a, Lehkhabu pawh kum khat chhungin Pathum zet ka tichhuak ve hman ta. “A tak ngei a ka tawn Hmangaihna thawnthu “April Par” tih te, Raltlan” leh “Pindan Khawhar” tih chu ka ziak zo ve hman a ni.


    Kum khat tehmeuh Mawizuali in a ka awm hnu chuan ka ke pawh chu a pangngai chho ve ta a, mahni in ka kal ve thei ta chutia ka han kal thei ta chu Mawizuali in a awm reng chu ka inthlahrung ve tawh bawk nen in indang ka tum ve ta a, chu thu ka hrilh chuan Mawizuali chu a ngui ruai mai a, “i thu thu lawm, i tih dan dan a ni mai” tih te chauhin min chhang a, a roomah a lut nghal daih a, chumi zan chu zankhua in a rawn chhuak leh tawh lo, zingah pawh chuan kan thawh ve hma in a Clinic ah a lo kal daih a, zing dangah chuti em em a a kal hma ngai pawh kan hre silo. a lungawi lo hle tih ka hria, mahse a lungawi loh chhan tur ka hre lo, kum khat tehmeuh kan awmchilh in kan tibuai nasa a a tan hnawksak mai pawh kan ni thin tunah chuan ngaihtuahawm pawn ka awm tawh lo a, rul dawn i la a sum zawng chuan dam a kan awm a nih chuan kan rul thei mai ang mahse a mi duhsakna leh a hmangaihna zozai te hi zawng kan rul let thei dawn hauh lo.


    Zanah chuan dar 10 ah a rawn haw a, a rawn rui haw deuh bawk a, nidang a a awm dan nen a in an loh em vang leh tet te tang a zu in ngai lo leh Fel famkim a an sawi thin rilru thianghlim em em in zu a in ve ta mai chu mak kati in ka hrilhhai hle. a  room ah a lut a khumah chuan a bawk nghal thlawp a, a tap nghal hawm hawm a, Note-i chu a mu tawh a Mawizauli khmun bulah chuan ngawi reng in ka thu a.