THALAI...TLANGREL LEH SAWICHHIAT HI A PALZAM THEIH

THALAI...TLANGREL LEH SAWICHHIAT HI A PALZAM THEIH

Zonunsanga Zote

Thalai... Mi rêl leh sawichhiat hi i tawk ve tawh ngei ang tiraw? Mahse maw.. Miten an sawi laih laih, an fak emaw, an rêl emaw, an sawisel chin tawh hi chu , mi vangtlang chung an lo ni deuh chawk a;nang pwh miin an rêl che chuan, pawimawhna tak i nei a ni tih hria la, tu man ui thi sâwn chu an chhuih peih lo va, an kân thauh mai zawk thin. Mipui chung lam i niha, vantlang ngaiha 'sawisel tham' i nih chuan, lawm la, ngaisang la, inchhuang ve deuh la, mite rêl leh sawichhiatna mai mai tihbuai phakah awm duh suh.



Vantlang puipunna hmuna paikawng tahtu ang i ni tih hriain, 'khatia tih awm' hetia tih awm' an rawn ti huai huai dawn a, pafa sabengtung zuar ang maia mi sawi hlek apiang ngaihchan luat chuan i sakawr zawrh tur i chân bakah i khabe a pet hliam dah ang e.. Lui dunga lung zawng zawngin chakai delh lo mah se, lung thenkhat chu a hnuaiah chakai a awm ve bawk avangin, sawiselna tam tak zinga mahni insiam thatna atana tangkai,lungtâta hman tur a awm thin. Chungte chu ak haw la, i chem bil tah hriam nan hmang hlauh ang che. Mite fakna pawh hlobet par anga chuai hma a ni a, thlamuan phah nan leh rilru tihlawm nan hman luat a hlauhawm thin. Chutiangin kan hnung lam emaw , kan sir lam emaw, kan hma lam emaw a fakna leh sawiselna ri hi , kan nun hlimna atana foundation tling an ni lo. March thla leh April thla tir lama ni a sat vanglai chuan,ruah a sur thei tawh dawn lo ni âwm hialin



khua thiangin ro teh mahse, July thla leh August thla a lo thlen meuh chuan , ruah a surin tawp -in-tai a nei dawn lo emaw tih tur khawpin khua a cheng leh si thin. Mite min rêlna pawh nipui lai khaw tha ang mai a ni a, min fakna lah fur laia khaw chhia ang chauh bawk a ni. Min faktu an awm phawt chuan min hawtu leh min rêltu an awm ngei dawn tih pawh hre mai ila. Ni a pui hle a, khua a ro hle chuan fur ruahtui a hnai tawh thin a ni. Mihringte hi mi thatna leh vanneihna sawi aia mi chhiatna leh tlin lohna sawi nuam ti mi kan awm. Mi that lohna sawi hi kan peih em em vek a. Thawm nei miah lo chengkawl zinga khawsa kan ni lova, mihring zinga cheng kan nih avang hian, rêlna leh sawichhiatna chu kan hming lam tur a awm chhung chuan a reh lo vang