Mami Dekhenez Chawngthu
UNCONDITIONAL LOVE
" Kan nghak chhuak leh dawn chuang lo aniang. Tun ang khawchhe hnuaiah lehnghal engtinnge i beisei le?" ka partner Ajay chuan a ti nuah nuah a, "Minute 20 tal i nghak leh chhin reng reng ang" ka tih chuan a lawm loh hmel takzet tawh. Darkar chanve dawn a liam leh tawh,"I duh chuan lo nghak rawh, ka kal" tih le thawh a rual a, chhang let tawh chuanglo chuan ka thil ei lai chu ka ei chhunzawm a. Helai hmunah hian thu thar hriat tur pawimawh tak kan nei a, kan interview neih tur pa erawh nghah chhuah tur a awm dawn lo niin a lang. Pawn boruak chu kan thlir vel a, ruah sur hnua ni chhuak chu a mawi ngei mai. Ei man ka pek zawh chuan ka nihliap chu ka la a, office lam ka pan ta nal nal a.
Ka hnaah ka tui a, journalist ni tura ka zinkawng erawh a bumboh hle. He hna ka thlan avanga ka chhungte nena kan inkar tha lo zawng zawng te sawi lang kher lo mai ila, hei erawh kan zep tel hram teh ang. Ka pa hian doctor min nih tir a tum em em a, mahse vawikhat pawh nih ka tum ngai lo thung. Chhungte duhdan line a kal lovin mahni thu ngata ka tuina ber kawng hi zawh ka ni a. Symbiosis Institute of Media & Communication, Pune atang journalism ah master degree ka zo a, ka zir zawh rual chiah hian vanneihthlak takin chanchinbu lian tak pakhatah journalist hna ka thawk nghal a ni.
Nikhat chu thil pawimawh tiin Mizoram house ah ka kal a, rin loh deuh maiin ka classmate hlui ka hmu a, a fapa damloh na avanga helama rawn kal an nih thute chu a sawi a, fa pawh pahnih lai an nei tah nghe nghe. Chutia fa pahnih lai alo nei tawh tih ka hriat chuan ka lo naupang tawh vak lo ani tih ka in hrechhuak nghal zat a! Mahse, nulat tluka nuam hi a awm chuang lo. Ni e, ngaihzawng chu neilo ka ni ngai bik lo, mahse he ka hna ka thawh atang erawh pangngai taka ngaihzawn ka nei ta miah lo. A chang chuan nun ruak riaua inhriat changte ka nei ve thin a, khawhar ru taka hun hman chang pawh ka nei ve fo tho mai.
Ka partner Ajay chu nupui a neih dawn avangin an khua Patiala ah a haw a, nitin inhnial in inngeih lo viau mah ila hun lo hmang ho reng chu rin aiin kan lo in ngai duh khawp mai. An inneih ni ah pawh kal ngei ngei turin min sawm a, card mai duhtawk lo in a nupui hual Geeta nen ka in ah an lokal leh ngat ani. Ka kal lo anih chuan kumtluanin a sawi leh ngei dawn a, chu ai chuan ni 4 chawlh a an inneihnaa kal chu ka thlang zawk reng reng e. Ka kal un turte ka hrilh fel chuan min rawn hruai leh thlap a, he Ajay mi laktlak loh tak thina hi a nupui nei tur chu a phur viau anih hmel. Friday a innei tur an ni a, chawlh hahdam pahin an inneih hma nihnih chu an khua fan kual vel chu ka tum ani. An khuaah chuan Ajay te chu a nei pawl tak an ni a, an ram chu a zau tha in a lei pawh a tha em em a. Thlai chi hrang hrang an ching a, a enkawltu ringawt pawh mi 30 chuang an awm a ni. Ka camera ka keng chhuak a, Ajay nu bulah chuan an huan ka fan kual tur thu ka sawi a, an awmpui pakhat chu min kalpui turin a ti a, keimaha kal ka duh zawk thu sawiin ka chhuak ta nghal a. Ka kal a, ka kal zel a, ka camera pawh a rim malh malh kher mai, sava nupa thingkunga fu chu an thla lak tumin theihtawp in ka veh a, uluk taka lak ka tum chiah chu mi pakhat lo lang thut in min ti phu nasa lutuk a, an thlawk bo ta daih a, ka thin a rim kher mai. Chuti taka ka lo phu dawrh mai chu ani lah a hrilhhai hmel hlea, inthiamlo tak chungin thupha a chawi a, a kal dawn chiah tih chuan, "Ka va ngei reuh e" ka ti sap a. A ai phawk lehzual chuan min en a,"Mizo i ni tiraw?" a rawn ti thut mai a, Vai tlangvalin chutia Mizo tawng pai hauh siloa min bia chu mak ka ti lutuk a, chhan mai nachang pawh ka hre lo, a lo nui var var a, a nui mawi ngang mai. Ka harhchhuak thut a,"Ni e, ka ni alawm" ka ti a, chutiang hmuna mahni tawng ngeia biak theih an awm chu ka hahdam sawt in ka hria. Min chibai pah chuan,"Daniel-a ka nia, Danny emaw Dan, tiin min ko thin, nice to meet u" "keipawh ka lawm e.. Emily ka nia" ka ti ve nghal a. Uluk takin a hmel chu ka en a, engemaw ti tak chuan Mizo te pawh a ang in ka hria, a mitmeng erawh a vai hliah hliah a, ngo nalh tawk tak sam kir chiat mai, lian mawi tawk tak ani tih chu second reilote chhungin ka hre nghal vek. Lungpui chungah chuan kan thu a, a chanchin zawh chu ka chak ru khawp mai, aman a sawi anih loh chuan vawikhat inhmuhnaa han inzawh tawp chu ka ngam bik silo. Ka lam hawiin a then sak a,"Helai hi ka kal chakna a rei tawh lutuk a, Ludhiana ah kan awm a" hriatbelh chak takin ka lo en a, amah vek chuan,"Ka pa pawh hi Mizo ani a, ka nu nen hian Delhi University ah an kal tlang thin a, chutatang chuan an inngaizawng chho a, ka nu nu leh pate hi mi khirh tak mai tak an ni a, ka nu leh pa chanchin chu an lo hre vat a, ka nu tan pasal tur an zawng nghal rum rum mai ani awm e, college an zawh rual a innei turin engkim an lo peih fel vek mai a. Mahse ka nu khan ka pa alo hmangaih ve si a, Mizoram lamah a zui haw ve ta tawp a, ka nu sawidan chuan ka pa chhungte pawh an lo lawm lo hle a, an inah pawh awm theilo in thingtlang khaw pakhatah an awm a. Ka pa pawh chuan ka nu chu a hmangaih em em a, nitin inhlawh chawpin a chawm a, hrehawm ati ngai lo" a sana chu a bih zeuh a,"Naktuk enge i tih ang?" A ti ta daih a,"Helai hmun hi ka la fang zo lo a, ka kal leh ang chu ka tia" ka tih chuan a dar a chhin ak a,"Rem i tih chuan kan inhmu leh thei angem?" a ti leh a, harsatna dang ka nei anih loh chuan ka theih tur thu hrilh a. Ajay te in lan theihna thleng min thlah a, ni chu a kir leh ta a. Kum tam tak hnuah mipa ka suangtuah zui hmasa ber ani leh ta.
Ka muthmunah te chuan a hmel ngainatawm tak, hmeltha leh zaidam thlap chu ka mitthlaah a cham reng a, tiang hian vawikhat inhmuhnaah ka la awm ngai lo. Zinglamah chuan ka lo chhing sek a, rimawi bengchheng zet chuan min ti harh chiang kher mai. Phak chapin ka tho a, a tuk atana inbuatsaihna chu an lo tan der alo ni a, Ajay-an min lo hmuh veleh nui sangin min lo hui a, bathroom lam ka pan san ta zawk a. Ka inphihfai a, ka ha te ka nawh zawh chuan Ajay te awmna lam chu ka pan a, ka theih ang angin an thil chei chu ka va pui ve a. Nimin lama thil thleng ka mi tawn thar chungchang chu Ajay hrilh ka duh viau na sawina remchang ka hmu mai loa, amah zawk chuan,"Babe, nimin lama tlangval rawn thlah haw tu che kha tunge?" Nui vur vur chuan a ti a. Min lo hmu leh reng tawh nih dawn hi,"Ka thian thar anih kha, Ajay, naktukah ka sawm ve dawn nia kawm tur ka nei silo a" ka tih chuan min lo phur pui khawp mai. Chhun atang chuan ka inchei a, nidanga awlsam taka in siam mai thin kha vawiin ni zawng a dan a dang tlat. Kha Daniel- mit kha lak ka tum ta viau nge ka hre lo, uluk taka darthlalang hmaa ka din tak reng chu. Ka chhuah dawn chuan Ajay leh aunty chuan meng bial kawkin min lo melh a, aunty chuan,"Bawihi, tiang taka nalh kha em ni ilo nih a?" a tih chuan ka lawm kher mai, Ajay pawh chuan,"oh my god!" alo ti vei chul a. Nuam ka tiin ka confi lehzual sawt! Aunty chuan tiffin min siam sak reng chu niin, min pe a, ka bag ah chuan ak in ka chhuak ta nghal a.
Kan inhmuhna tur hmun lam chu ka thleng phei a, phul hring dupleh luite luang ri karh karh te chuan ka mit an ti tlai hle a, pangpar hmun par hrang hrang inpawlh nuai te, sava hram chiah chiah te chuan ka ngaihtuahna an ti thui hle mai. Mizorama haw chang te hian sava hmuh tur van tawh zia te, ram kan tih chereu nasatzia te ka ngaihtuaha, ringlo mi kan tih te ramah heti tak hian sava te an ngampa a, kan bul ah ngampa takin an rawn tla mai mai ani si a tihte chu ka ngaihtuah kual ta mai mai a. Darkar khat dawn ka thut hnu pawh in Danny hmel reng reng chu alo lang thei lo. Tawngkam mawi ah a sawi ve mai mai anih te ka ring a, chutiang ni turin ka ring chiah si lo. Ka thutna atang chuan ka tho chhuak chiaha, anhmawh em em a rawn tlan hi ka hmu a, alo hnai zel a, ka mi nghah ngei chu a ni. Ka bul arawn thlen chuan hah vangin a thaw hlawp hlawp a, a tlai avang chuan thupha a chawi mawlh mawlh bawk a. A camera chu min pe a, tui awmna lam chu a pan a, a hmai te phih in a va in sil dai a, a thla lak te chu ka lo ensak a, a nalh hlawm ngang mai. Ramhnuai thla alak te chu ka en a, a thla lak dan atang professional tak ani tih chu ka hre nghal. Ka en zel a, ka thlalak ka hmu ve tlat, sava thla lak tuma ka veh lai chu alo hmet nual a, nimin pawh khan tihpalh thil nilo in min lo hmuh sa avanga min rawn pan ani tih ka chiang ve tlat.
Nuam lo atih ka hlauh avang chuan ka dah ta daih a, ani pawh a rawn chho ve nghal bawk a. A nui sang reng mai chu hmuhnawm ka ti, ka eitur pai chu ka phawrh a, kan ei a. Akhat tawkin kan mit leh mit chu a in tawng leh sak zel a, rei ka en ngam tlat lo. Kan ei zawh chuan a nu leh pa chanchin chu sawi zawm turin ka han ti a, ani pawh chu phur takin athu tha a,"I ngaihthlak peih ka ring tawh lo a" a han ti hmasa a,chutah,"Kum khat an inneihnu in kei hi ka lo piang ve ta a. Ka nu leh pa pawh an lawm em em a, chuan ka nu in ka hmingah Daniel Lalawmpuia Sailo tih a sa a, e ka lo sawi hmaih a, ka pa hi Sailo hnam a ni a, ka pu pu leh te hi Sailo lal an ni awm e. Ka pa in hnam dang an nei chu an hrethiam theiloa, an hnawtchhuak tawp mai a ni. Ka nu pawh chu mi inzir mi tak ani a, Mizo tawng pawa thiam ve ta vat a, a pai erawh chu a pai tho a, keipawh chuan kan inchhungah chuan Mizo tawng lo chu tawng dang ka hre ngailo. Kum 8 ka lo tlin chuan naupang thangduang tak mai ka ni a, ka lian tawh viau a ni. Nikhat chu kan khuaah chuan ka nu pa ka pu leh midang panga vel hi an lo kal thut mai a. Ka la naupan deuh avangin chiang tak chuan ka hre tawh lo, karkhat hnu vela ka nu nen an motor rawn ken a min chuan tir leh tap zawih zawih a chhungkua kan inthen chu ka hriat ani mai. Tun hnua ka nu sawi dan chuan khatia ka pute rawn kal khan dawt in ka nu an bum a, ka pi thi tepa a awm thu leh haw lawk a, ka pa bula kal leh turin an lo thlem alo ni a.ka nu erawhin ka pa tello chuan khawiahmah kal a tum lo. Mahse ka pa chuan chutia a hringtunu thichhawnga awm reng chu a ngaihtuah em em a, ka nu bulah a pa thu awih mai turin a ti ta a, an inthenna hlenna tur anih reng an ring lo. Kan haw thlak hnu chuan ka nu chu khuahkhirhna na tak hnuaiah an dah a, chhuah leh phone hman reng reng an phal lo. Keipawh chu sikul tha ber berah min kal tir a. Ka pa chu zan tin deuh thaw kan kalsan atanga kumkhat chhung chu ka mumangah ka hmu thin . Ka ngai em em a, ramhnuaia min hruai laite ka ngaihtuah a, ka tap nasa thei hle. Kum khat hnu chuan ka nu pawh tlem chuan an khuahkhirh ta lo va, nikhat chu ka sikul bang ka haw chuan ka nu chu kan phone bulah alo tap tlawk tlawk a, ka va kal chuan min kuah a, "Bawiha pa i nei ta lo" a ti a. A ngaihna ka hre lo hle. Chiang
zawkin min hrilh leh a, ka pa chu Khawsikpui in a thi, Aizawla an inah a ruang an laa, ka pa nu in ka nu chu a lo bia alo ni a. Ka pa in a diary ah heta kan in number hi alo chhinchhiah hlauh a, chuvanga rawn be thei chu an lo ni. Ka nu chuan chaw a ei theilo a, a mu thei loa, chutiang reng renga a awm avang chuan a taksa a chhe chak hle a. Ka pi leh ka pu pawh an mangang takzet a, damdawiinah te dah lutin thlakhat zet ka nu chu a awm a ni. Chutatang chuan a pangngai tak tak thei ta lova, a rilru na lutuk in a nghawng anih thu doctor te chuan an sawi a, ka pi leh ka pute chu an thiltih avang chuan an inchhir em em a, chutatang chuan ka nu rilru tihnat chu an hlauh ber a lo ni ta a, ka hming an lo thlak tawh pawh sut lehin Daniel L.Sailo tih chu ka pu nghet ta ani" ka mittui ka lo hru leh zauh thin a, Danny nu leh pa inhmangaihna chu a ropui ka ti a, ka khaangaih bawk si. Ti hian ahan sawi zawm leh a,"Ka nu chuan mizo tawng hlirin min biaa, ka theihnghilh a hlau ani ber. Pawl sawm ka pass te chuan ka nu chu a lungchhe em em a, ka pa hming lamin a tap tlaivar thak a ni. Ka pu hi Christian chu a ni naa a inkhawm ngailo thung. Fapa a neih loh avangin kei hi min siam puitlin a tum em em a, sumdawng mi nih tir min tum thei hle. Mahse kei erawh chuan thlalak hi ka tui em em a, photographer nih ka tum thung. Ka pu chuan min nawr lui duh ta lova, ka tuina ber kawng zawh chu min phalsak ta a. Osmania University, Hyderabad atang degree course zovin London ah thla thum chhung ka zir belh leh a, tun ah ka lo chhuak chho leh chiah a ni" a ti a. Chiang zetin ka mitah chuan min en a,"Niminah thla la turin henglai ram vel hi a mawi ka ring a, ka rawn kal a, helai hmuna ka hmuh che khan belhchian che ka chak ta em em a, tiang khan ka rawn pawh ta mai che anih kha" a tih zawm leh nghal a. A kianga hun hman chu a nuamin a khamawm loh hle a, naktuka Ajay te inneih tur chu hrechhuak thutin sawm ka rilruk a,"Danny, engtik thleng nge hetah i cham dawn?" ka ti a,"Saturday hian let ka tum deuh a, chuan, i chanchin hi engmah ila sawi ve lo a" a ti a. Ni dawn tak e, ka chanchin tlangpui chu tawi kim takin ka han hrilh ve a, helai hmuna ka kal chhan te chu sawiin lokal ve ngei turin ka sawm a, a han tang viau na a ka sawm lui tlat avangin a aw ve ta hram a. Ka sana chu ka han bih zauh a, alo tlai tawh hle a, Danny zawk chuan ka chezia a man thiam nghal mai a, "Ka thlah haw tawh ang che. Naktukah kan inhmu leh dawn tho a, a ni lawm ni?" a nui sang a, lo nuih let ve sak pah chuan,"I thulh leh thut anih loh chuan ka beisei" ka ti a. In lam pan chuan kan haw ta a.
Zingkar atang nilengin Ajay te inneihnaah kan buai a, Danny pawh a remchan danang angin alo che ve,a, a hmel hlim sarh reng chu en nin a har takzet. A khat tawkin min rawn melh leh zeuh thin a, nuam ka va han ti tak. Inneihna hun te kan hman zawh chuan kan chau tlang hle a, Ajay te chhung pawh ka chungah an lawm ve hle a, zanah chuan huan lamah Danny te nen kan leng a, khua a thiang in thla a eng bawk a, a nuam takzet a ni. Danny chuan ka kut chu vuan in min kai a, thutna hmun nuam tak an siamah chuan kan thu a, van lam chu ka han hawi a, Siamtu themthiamzia chu ka ngaihtuah neuh neuh a, ka bula thu pawh ka lo hrechang lo hial a,"Van lam khi i thlir zankhua mai dawn em ni?" Danny-an a tih chuan ka harh chhuak zawk a, kan nui dun hak hak a, "Danny, Siamtu kutchhuak ropuizia khi ka lo thlir a" ka tih chuan a han hawi kual ve a, boruak chu a hip vang vang a,"Ni e tiraw Emily" k mitah tak chuan min en a,"Naktukah chuan kan nang i awmna lamah i kir anga, kei ka haw bawk anga. Ka huphurh takzet ani. I kianga ka hun hman te kha nuam ka ti a, chuan ka hlim em em bawk. Engtikah emaw chuan kan inhmuh leh ngei hi ka ring tlat a ni" a aw chu a inthlahna aw ki ruih a, "Emily ka rawn zin vat ang, min lo mikhual duh angem?" a ti a. Ka ngai dawn hle tih ka hria,"Tehreng mai, ilo kal phawt chuan rawn thleng ngei ngei ang che" ka lo ti a. Darkar thum dawn kan awm hnu chuan haw zai kan rel ve ta a, ka kuta min kaih pah chuan pendrive min pe a,"Delhi i thlen hunah chauh en ang che" a ti a, ka lu chu ka bu zauh a. Gate kan thlen chuan kal hmasa turin ka ti a, lut hmasa tura min tih tlat avang chuan luh ka tum a, ka kal dawn chiah chuan ka chalah min rawn fawp zeuh a. A sa hat in ka hria, ka luhsan ta. Ka khua a har nghal vawng vawng mai. Thian tha ang chauh chuan ka lo en ve lo a lo ni, ani erawh chuan chutiang bakin min en si lo. Ka rilru ang hi a pu ve lo a ni tih ka hriat chuan keipawhin ka rilru atang hnawt bo tur a ni. A pendrive min pek chu ka purse ah ka dahtha a, Danny ngaihtuah reng chung chuan ka lo muhil ve ta siai siai a.
Thla thum lai a liam leh tawh a, chanchinthar mak tak tak avangin keipawh lungleng hman lo in ka khawsa leh tawh a, hei hi ka nuna nuam ka tih ber thin chu ani reng a ni. Nikhat chu Ajay nen kan chhuak a, tlai lamah office ah kan kir leh hman chauh a, ka thiannu Kavitha chuan chhunah min hmu turin mipa pakhat alokal thu chu min hrilh a, hetiang neuh neuh hi an awm ve fo avangin ka rilru ala lem lo, kal paha Daniel a inti in ka hria a tih zeuh ah chuan ka thin chu a phu zawih zawih a ni ber. Ka ngaihtuahna zawng zawng chu luah lo mah se ka la theihnghilh bik lo. In ka haw veleh hriatchhuah ka nei a, pendrive min pek kha. Ka haw hnu khan purse thar ka neih avangin ka dahna kha ka hmang ta ngailoa, ka lo hre chang tawh lo a ni. Ka laptop chu la chhuak in ka han en nghal a, ka thlalak hrang hrang mawi tak tak chu alo dah a. Ka hriat loh a lak alo ngah hle a, note pakhat hi alo dah a, hei hi a lo inziak a-
"Emily, "the Queen of my heart"
I thinlung luahtu han ni ve tehreng ila aw...."
tih hi, a mobile no.chu alo dah bawk a. Min ngaihtuahna nei ve miahlo ang khan ka lo ngai a, min lo duh reng maw? Mak ka ti a, ka lawm bawk si. Ka doorbell ri ka hriat chuan ka va hawng vat a, ka in ah, ka hmaah Danny chu a lo ding reng a. Ka mak ti hmel chuan a tihrilhhai ve deuhin ka hria, "How are you, Emily" ka va kuah tawp a, "Dan.. " ani pawh chuan min kuah let ve a. Ka beisei loh thil lo thleng avang chuan awmngaihna pawh ka hre lo. Inchhung lamah kan inzui lut a, "Engtinnge ka in luah hi i hriat theih a?" Ka tih chuan ti fuh in tih hmel takin min melh a,"I hnathawhna hming ka hriat chuan zawn chhuah nan che a tawk viau in ka hria" ka chum a,"Tinge i va rawn kal har si ve?" "I call ka nghak reng a, min lo call si lo a, hmuh che ka ngam tawh lo alawm. Ka thilpek che kha i en anga, ka rilru ang i lo pu ve lo anih ka ring a" a ti a. Ka rilru te chu hrilh ve in kan dawihzep luatah hrehawm kan lo ti tuar dun reng alo ni. Kan va han hlimdun tak em!
Ka ina thleng tura ka tih chuan phur takin a bungrua ava la a, a rawn insawn phei a. Ka in chu zau tak ni lem lo mahse a nuam tawk viau mai. Room pahnih a awm a, mikhual neih paehin a tawk ve viau. Chhunah ka awm hman ngai loh avangin zan lam hi kan inkawm ve theih hun ani mai a, rei tak thleng mengin hlim takin kan inkawm thin. Inngaizawng a in thlahlel tak te pahnih tan chuan lungchim taka han infawh vawng vawng te pawh kan nei a, chu ai thui kan kal ngai lo. Ni li chauh a rawn cham theih avang chuan a haw alo hun leh ta der a, a haw dawn zan chuan kan huphurh duh kher mai. Dar insi rialin kan thu a, akhat tawkin kan tawng zeuh zeuh a, ka kut chu a hum tlat a, haw chu a huphurh ve hle tih ka hria. Danny mizia ka hriatbelh leh chu hmeichhia te hi a zah a, a care bawk. Tin, ngaihzawng hi a la ngah lo viau in ka ring a, ka ring sual lo hle tih a hnu ah ka hria. Ka maimitchhing a kan inhmuh hmasak ber ni te chu ka ngaihtuah a, ka biangah chuan min rawn fawp zeuh a, "Hetah hian hna ka zawng dawn, ka hmuh chuan kan inhmu go thei anga" a ti a. Keipawh chu ka phur ve ta khawp mai. Ka lo ngaihven pui ang che ka tih chuan a lu a thing a, mahni ngeia zawn hmuh a duh thu a sawi a. Ka rin sa anih avang chuan ka nui hak a, a nui ve mai a. Zingkara a chhuah dawn avangin kan mu ta a.
Reiloteah Danny pawh chuan hna chu a hmu ta vat a, in hmu reng theilo mah ila khawkhata awm chuan thla a muang ve hrim hrim. Weekend ah chuan inhmuh hram kan tum thin a, hetiang tak hian tu mipa lakah mah ka la luangliam ngai lo. Ka kiangah a awm chuan him hliah hliah in ka inhre thin. Ajay te nupa pawh an in la zei thei khawp mai a, kan tan thian tha tak an ni. An inah kan va leng ve fo a, chawei loa haw an phal ngai lo. Nikhat chu Danny nu in min lo be hlawl mai a, ka zam ve hle mai. A fapa in ka hming a sawi ngun zia leh min hmuh a chak zia te rawn sawiin hun remchang hmasa berah tlawh turin min rawn ngen a, keipawh chuan ka hunawl hmasa bera kal ngei turin ka in tiam a. A huphurhawm hle chuan ka hria. Kan hun neih danin a zir lo a, Danny nu in min rawn biak atanga thlakhat naah hun tha a rawn in her ve thei chauh a, an chhungkaw chanchin tlangpui chu kawngah min hrilh a, a pi leh pute chuan engtiang takin nge min lo dasn saan ang ka hre lo a, zam tak hi ka ni.
Darkar riat dawn kan tlan hnuah Ludhiana chu kan thleng ta, Danny te in lam panin kan tlan lehnghal a, hmun hrang hrangah kal tawh thin mah ila he hmun hi ka vawikhat kalna a ni a. A boruak chu nuam ka tiin ka ngaina nghal ngawt a! Minute 10 vel kan tlan leh hnu chuan in ropui tak mai hi kan thleng a, Danny chuan an in kan thlen thu a sawi nghal a. Mi hausa tak an ni ang tih chu lo ring lawk mah ila hetiang taka an haisak hi ka ring pha ngai lo. A compound zau leh fai tak chu ka rah zawngte chuan khawvel chu tawp mai turah kan dah vel a. Kan thleng tih hriain Danny nu chu alo tlan chhuak vat a, min hmuh chuan min lo kuah nghal a, "Emily, ka lo lawm a che" a ti a. Danny nen an in kuah leh a. Nu ngainataam tak anih ka ring nghal. An inchhung kan han lut a, pui tak hi ani ringawt. Hetiang taka hausa tupa hian kei ve mai hi engtia min duh ngawt nge anih zawk ka ti rilru vawng vawng a. Ka room turah chuan min hruai a, tv, sofa, engkim mai chu felfai takin alo awm bek a. Kan in tak a ka room nen ka khaikhin a, pui tak hi a ni. Thawmhnaw te ka dah fel hnuah ka inbual a, inbual zawh ah a pi leh pute chu kan hmu dawn a ni. Chu tak chu ka huphurh lai ber chu a ni. Ka inbual zawh chuan inhnuai lamah ka chhuk a, an living room ah Danny chuan min lo nghak reng tawh a, min hmuh chuan a nui sak a, "Darling, i chhelo takzet. Zam miah suh aw.." a ti a. Ka chil ka lem ri khulh a, ka lu chu kaan bu ve nghauh a. A pi leh pu room kan thlen chuan ka thlan a tla leh hman! Zahna chibai kan buk a, thu tura min tih hnu chuan kan thu a. A pu chuan ka chhip atanga ka ke ler thlengin chiang takin min en a, ka khur ru der der thei nia. Chutah ka hnathawh leh ka awmna te chu min zawt a, tha takin ka chhang a, a pi leh a nu chuan min en a, min lo nuih ver ver a. Ka chanchin tlangpuite ka sawi hnu chuan a pu chuan,"Awle ka mitah chuan i tling tawk e. Ka tunu, ka tupa hi duat takin enkawl ang che" a ti ta a. Ka thaw huai mai, kan boruak rit tak chu kan pel fel ta. A pi chuan min kuah a, duat takin a tunu ang maiin ani min kuah ni. Kan zan hmasa ber chu nilenga motor kan chuan avangin hma takah kan mu a. Ka thla angam nghal zan mai chu keipawhin mak ka ti. Ka lo mu tui hle aniang ka harh meuh chuan dar 9 alo ri dawn reng mai a, hmanhmawh takin ka tho a, ka in phih fai a, inhnuai lamah chuan ka chhuk thla a. Choka ah chuan Danny te nufa chu an lo awm a, min hmuh veleh zjnglam chibai min lo buk a, breakfast kan ei ta nghal a. Hun kan ngah loh em avangin ka hmun tlawh chak tak tak pawh kan tlawh hman dawn lo va, mahse Nehru Rose Garden erawh kal hram ka duh a, Danny bula ka sawi chuan min lo phur pui viau a. A nu bulah kan hun hman tum dante hrilh in kan chhuak ta a. A hmun kan va thleng chu thlalak a ka hmuh ai a let engemawzatin a mawi a, a nuam bawk. Ka lo suangtuah fo thin chu atakin ka hmu a, ka hlim hmel chuan Danny pawh a ti lawm ve hle. Ludhiana ka kal chak chhan ber pakhat ani ve tlat a. He hmun ah hian chhungkuaa kal hmuh tur pawh an tam thei hle a, nula leh tlangval inngaizawng hmuh tur pawh an tam hle. Danny pawhin a camera a hmet mawlh mawlh a, ka duh ber nen he hmun ka tlawh thei hi ka lawm a ni.
Thingbuk hnuai ah chuan insi rialin kan thu a, engdangmah kan ngai bik lo. Danny chuan,"Emily ka chhungte chu enge i hmuh dan?" a ti a. Kei chuan fel ka tihzia leh nuam ka tihzia te chu ka hrilh a, "I chhungte hian min pawm ve angem tih hi ka ngaihtuah a ni. Min lo pawm lo ta se engtinnge niang?" a han ti leh a. Ka la ngaihtuah miah lo tih ka hria,"An pawm ngei ang che tih ka ring" ka ti a. Duat takin min kuah a, ka mitah chiang takin min melh a,"Emily ka hmangaih che" "Danny keipawhin ka hmangaih che" ka ti let ve a, kan in fawp ta vawng vawng a. Zanah chuan Danny nu chu ka room ah alo kal a, a tuk mai chu Delhi kama kan let leh hun anih avangin thawmhnaw ka lo inrem mawlh mawlh a. Ka hmuh veleh ka lo ko vat a, ka bulah chuan rawn thu in ka kutah a vuan a,"Bawihi, ka fapa hi i hmangaih ve tiraw?" a ti a, keichuan ka hmangaih thu te chu ka hrilh a,"Danny hian a hmangaih takzet che tih ka hria. Apa nen kan chanchin chu a hrilh vek tawh che a, keini lam atang chuan in pahnih hian kan pawm thlap cheu a, i chhungte rilru chu hre lo mah ila nang hi ka monu ni thei ngei la ka duh hle a nk. Ka hmuh tirh atang che khan thinlung takin ka pawm chea, kan inzawm nghal thlapin ka hria ani. Hlim takin awm ang che u" tiin duhsakna min hlan chungin a chhuak ta a. Keipawhin an chhungkua hi ka ngaina tak meuh a ni. A tukah chuan ngai tak chungin kan inthen leh ta a.
"Emily, i awmdan ka pa puian a hre thawi ania aw" fon atang ka cousin Hriati chuan a rawn ti a, "Engtinnge ka awm vak a" ka lo ti a, ani chuan,"Hnam dang mi i ngaizawng a ni lawm ni? Pa puia thin i ti rim ang tih ka hlau ania, lo then vat rawh" a rawn tih zawm leh nghal a. Chiang taka Hriati chu hrilh tul ka tih avangin Danny chanchin chu ka hrilh ta vek a,"Chu pawh nise a nu vai ani tho a, a dang chuang lo" a la ti fan a. Ka ngaihtuah chhunzawm nasa hle. Ka pa chuan awlsam tak chuan apawm hauh lo ang tih ka hria. Hrilh dawt dan erawh ka bangbo hle a, anmahni sawi chhuah hun ka nghak ani ber. Hun akal ve zel a, Danny nen kan inkar pawh a tha a, inhmuhthiam lohna em em kan nei ngai lo. Han inhnial ve zauh chang erawh neilo kan ni bik lo. Zankhat chu ka pa in min rawn fon a, rawn zin a tum thu a sawi chuan ngaihdan ka lo nei thiam ve mai a. Danny nen kan chungchang chu hmaichhanah min sawipui a tum tih ka hria. Alo thlen zanah ka rindan chu a dik tih ka hre nghal bawk. Ka hna atang ka ban hma lem loh avangin ka pa chuan rawng alo bawl a, mizo chawhmeh a rawn hawn nual avangin ka chawei pawh a tui hle a. Kan in lam chanchin te min hrilh pah a, chaw kan eikham chuan ka huphurh ber hun kan thleng ta. Kan tv en lai chu a hmet tawp a, "Bawihi, ka lo kal chhan chu rin dan i nei thiam tho in ka ring. Pasal neilo a awm tur hian kan duh miah lo che, mahse mizo dik tak nise kan duh a ni" a ti charh charh a. A sawi zawm leh a,"Tuna mi nen hian engang takin nge in lo inkawp tih chu ka hre lo a, mahse in inkar hi ti tawp turin ka ngen che ani" "Ka pa, enge a rem lohna? Danny pa chu Mizo ani tho a. Enge a danglam vakna awm?" Ka mittui a parawl nghal der. Ka pa chu a chek tlak tlak a,"Ka fanu hian pasal anei dawn anih chuan a mona tur chu Mizo chhungkuaah ngei ani tur ani. I naupanlai ata tawh ka thu hi i zawm ngai loa, englai mahin ka duhna i la tihhlawhtling ngailo. Doctor ni tura ka tih lai che in tuna mi hi i thlang a, khatih lai khan ka rilru hi ana lo in i ring em ni? Ka fanu neihchhun i ni a, i hlim loh hi ka hlau ber thin. Ka rilru natna pawh ka ti lang ngailo anih kha. Tunah tal hi chuan khawngaih takin ka thu hi zawm ve hram ang che" a mittui alo luang ngiai a. Ka pa mittui a tla; keimah vangin.
Ka ngaihtuah nasat pauh leh ka pa sawi chu a dik ka ti. Ka tuina ber ka zawh theihna turin ka pa chuan rilru na tak chungin min zirtir a. A duhna hmuna lut tura min tih laiin kei erawh chuan hmun dang ka thlang a, ka pa duhzawng hrim hrim kha ka kalh emaw tih mai tur ka ni thin. Ka pa thu ka zawm dawn chuan ka hmangaih ber ka kalsan a ngai dawn si. Ka rilru ipik lutuk chu ka muhil thei loa, tumah chan ka duh lo. Mahse thil theih ani bawk silo, Danny leh ka chhungte buk chuan ka chhungte buk chu a rit zawk si. Engtinnge ni ta ang? Ka tal ka tal a, chhin khat mah ka chhing lo a, ka tlaivar chiang hle. Hnaa ka chawlh avangin nilengin ka inkhung a, thil tam tak ka ngaihtuah hnuah Danny nen kan inkar chu tihtawp ka tum ta. Danny chu bia in hmuh ka duh thu ka hrilh a, lokal vat a tum thu in min chhang a. Ka huphurh luatah ka khua te chu a sik in ka hre rum rum. Tlaiah chuan hlim deuhin Danny chu alo kal a, tuna a hlim hmel hi engtin tak nge a inthlak ang tih ka hre lo. Ka awmdan atang chuan kan borual chu a hrethiam ve deuh chuan a lang a, tjildang min sawi pui a, a chet chhiatna te chu sawiin min tih hlim a tum ve hle. Atawp atawpah chuan ka sawi duh chu min zawt ta a, ka pa nena kan sawi zawng zawng chu ka hrilh chhawng a, atawpah,"Danny, ka hmangaih che a, ka chhungte pawh ka hmangaih. Ka chan phal lo chea chutiang bawkin ka chhungte pawh, mahse chu chu a theih si loh. Ka pa rilru hi ka ti na thei tawh lo ani, kan inkar hi kan tihtawp mai a ngai ani" ka mittui chu tla lo turin ka dang hram hram a, Danny chuan engmah a sawi lo. Ka inchhung chu a reh tlawk tlawk a, a hrehawm takzet a ni. Minute 5 vel aliam hnu chuan a ding a, "Emily min hrethiam rawh aw. Engmah sawi tur ka neilo ani" tiin a chhuak ta nghal a. Ka room ah lutin ka tap ta hawm hawm a. A tukah chuan hma takah Danny chuan min rawn call a,"Emily... ka lo nghak reng ang che. Pasal i neih hma chuan ka beidawng lovang.. emily, ka hmangaih che" tiin fon a dah nghal a, keipawhin ka hmangaih che ka ti sap a, mahse a hre pha ve ta lo.
Mi hlim thei tak ni thin kha ka lo danglam zo a, englaimahin Danny kha ka theihnghilh ngai lo. Mizoramah haw in ka chhungte kiangah hun ka hmang a, mahse ka hlim zo chuang lo. Engmah hian ka rilru an la peng thei lo ani ber. Ka chhungte pawhin min khawngaih tih ka hria, ka pa thu an hnial ngam bik silo. Ka tuar tlawk tlawk a, engtikah emaw chuan k la tuar chhuak ve maithei asin. Ka chawlh neih chu ka hmang zo a, ka kir leh a hun tawh. Nidanga phur taka awm thin kha ka ngui bar a, ka u te chuan airport thleng min thlah a, min khawngaih hlawm hle tih ka hria. Tih theih erawh an nei bik silo. Ka theihtawp chhuaha tha taka awm tura intiam chungin ka ngaih em em thin ka u te chu ka thlawh liam san ta.
Ka lunglenna leh hrehawmna te chuan min kiansan vek lo mahse mahni chunga alo tlak chuan alo tlak chuan tuar dan te pawh alo awm ve zel a. Khuareiah heng min delhtu lunglen khawharna te hi chu ala kiang ve mahna le! Ka chawhmeh lei avangin ka bawr hle a, ka kawngka hawn ka tum pawh chuan ka ti fuh maitheilo, vawilehkhtah Danny alo lang thut a, ka thil ken te chu min lak thlak sak a, kawng chu ka hawng sawk sawk a, ka chawhmeh ho chu lak tumin ka ban a, mahse alo phal lo. Inchhung luh pah chuan,"Min va hmu peih lo awm ve aw... ka hmuh chak tehlul che nen" a ti a,"Chutiang pawh a ni chuang lo" ka ti a. Chutih lai tak chuan ka fon a rawn ri a, ka en chuan ka pa alo ni, ka han la vat a,"Bawihi.. Danny chu alo thleng tawh em?" enge thil awmzia hi ni ngai,"Ka pa.." zawhna aw ki tih a hai lo,"I hlimna hi ka duh ber ka fanu, hlim takin awm rawh. Danny chu i nei fawn nia" ka mittui chu a tla zawih zawih a, tun tum erawh chu lawm avang ani thung. Danny chuan min lo kuah vat a,thil awmzia ka zawh chuan,"Kan khuaah ka haw a, ka nu bulah engkim ka hrilh a. Ka nu chuan i chhungte hmu tur leh theihtawp chhuaha nanghi nei ngei tur chein min ti a, i address chu Ajay-an alo zawh che kha" ni tak e, min zawt ngei alawm. A chhan erawh a sawi duh miah lo anih kha. Amah vek chuan,"I chhungte chu ka hmu ta a, atir chuan a harsa khawp mai. Mahse i pa kha thinlung sak tak anilo tih ka hre tawh a, chuvangin thinlung takin nang hi ka dil ngawih ngawih a. I hlim lohzia te min hrilha, hlim takin ka dah ngei ang che tih min intiam tir a. Chuan thil pakhat ka intiam bawk a" "Enge" ka lo ti vat a. A ni chuan,"Eng dinhmunah pawh lo ding la, ka hmangaih reng ang che. Chhan awm in ka hmangaih ngai lo chea, ka hmangaih em avang chauh che hian ani nang hi ka thlan chea, ka hmangaih che. I chhungte leh nang hi hrehawm ka tuar tir lo ang che u tih ka intiam a ni" a ti a. Kan in pawm vawng vawng a, "keipawh hian engdang vang mah nilo in ka hmangaihna avang chauh hian ka hmangaih che anga, eng dinhmunah pawh ding la, ka hmangaih reng ang che" ka ti a. Hmangaihna mitmeng mawi taka in melh ralh in kan hma hun chu kan thlir dun thei leh ta a.
~the end~
UNCONDITIONAL LOVE
" Kan nghak chhuak leh dawn chuang lo aniang. Tun ang khawchhe hnuaiah lehnghal engtinnge i beisei le?" ka partner Ajay chuan a ti nuah nuah a, "Minute 20 tal i nghak leh chhin reng reng ang" ka tih chuan a lawm loh hmel takzet tawh. Darkar chanve dawn a liam leh tawh,"I duh chuan lo nghak rawh, ka kal" tih le thawh a rual a, chhang let tawh chuanglo chuan ka thil ei lai chu ka ei chhunzawm a. Helai hmunah hian thu thar hriat tur pawimawh tak kan nei a, kan interview neih tur pa erawh nghah chhuah tur a awm dawn lo niin a lang. Pawn boruak chu kan thlir vel a, ruah sur hnua ni chhuak chu a mawi ngei mai. Ei man ka pek zawh chuan ka nihliap chu ka la a, office lam ka pan ta nal nal a.
Ka hnaah ka tui a, journalist ni tura ka zinkawng erawh a bumboh hle. He hna ka thlan avanga ka chhungte nena kan inkar tha lo zawng zawng te sawi lang kher lo mai ila, hei erawh kan zep tel hram teh ang. Ka pa hian doctor min nih tir a tum em em a, mahse vawikhat pawh nih ka tum ngai lo thung. Chhungte duhdan line a kal lovin mahni thu ngata ka tuina ber kawng hi zawh ka ni a. Symbiosis Institute of Media & Communication, Pune atang journalism ah master degree ka zo a, ka zir zawh rual chiah hian vanneihthlak takin chanchinbu lian tak pakhatah journalist hna ka thawk nghal a ni.
Nikhat chu thil pawimawh tiin Mizoram house ah ka kal a, rin loh deuh maiin ka classmate hlui ka hmu a, a fapa damloh na avanga helama rawn kal an nih thute chu a sawi a, fa pawh pahnih lai an nei tah nghe nghe. Chutia fa pahnih lai alo nei tawh tih ka hriat chuan ka lo naupang tawh vak lo ani tih ka in hrechhuak nghal zat a! Mahse, nulat tluka nuam hi a awm chuang lo. Ni e, ngaihzawng chu neilo ka ni ngai bik lo, mahse he ka hna ka thawh atang erawh pangngai taka ngaihzawn ka nei ta miah lo. A chang chuan nun ruak riaua inhriat changte ka nei ve thin a, khawhar ru taka hun hman chang pawh ka nei ve fo tho mai.
Ka partner Ajay chu nupui a neih dawn avangin an khua Patiala ah a haw a, nitin inhnial in inngeih lo viau mah ila hun lo hmang ho reng chu rin aiin kan lo in ngai duh khawp mai. An inneih ni ah pawh kal ngei ngei turin min sawm a, card mai duhtawk lo in a nupui hual Geeta nen ka in ah an lokal leh ngat ani. Ka kal lo anih chuan kumtluanin a sawi leh ngei dawn a, chu ai chuan ni 4 chawlh a an inneihnaa kal chu ka thlang zawk reng reng e. Ka kal un turte ka hrilh fel chuan min rawn hruai leh thlap a, he Ajay mi laktlak loh tak thina hi a nupui nei tur chu a phur viau anih hmel. Friday a innei tur an ni a, chawlh hahdam pahin an inneih hma nihnih chu an khua fan kual vel chu ka tum ani. An khuaah chuan Ajay te chu a nei pawl tak an ni a, an ram chu a zau tha in a lei pawh a tha em em a. Thlai chi hrang hrang an ching a, a enkawltu ringawt pawh mi 30 chuang an awm a ni. Ka camera ka keng chhuak a, Ajay nu bulah chuan an huan ka fan kual tur thu ka sawi a, an awmpui pakhat chu min kalpui turin a ti a, keimaha kal ka duh zawk thu sawiin ka chhuak ta nghal a. Ka kal a, ka kal zel a, ka camera pawh a rim malh malh kher mai, sava nupa thingkunga fu chu an thla lak tumin theihtawp in ka veh a, uluk taka lak ka tum chiah chu mi pakhat lo lang thut in min ti phu nasa lutuk a, an thlawk bo ta daih a, ka thin a rim kher mai. Chuti taka ka lo phu dawrh mai chu ani lah a hrilhhai hmel hlea, inthiamlo tak chungin thupha a chawi a, a kal dawn chiah tih chuan, "Ka va ngei reuh e" ka ti sap a. A ai phawk lehzual chuan min en a,"Mizo i ni tiraw?" a rawn ti thut mai a, Vai tlangvalin chutia Mizo tawng pai hauh siloa min bia chu mak ka ti lutuk a, chhan mai nachang pawh ka hre lo, a lo nui var var a, a nui mawi ngang mai. Ka harhchhuak thut a,"Ni e, ka ni alawm" ka ti a, chutiang hmuna mahni tawng ngeia biak theih an awm chu ka hahdam sawt in ka hria. Min chibai pah chuan,"Daniel-a ka nia, Danny emaw Dan, tiin min ko thin, nice to meet u" "keipawh ka lawm e.. Emily ka nia" ka ti ve nghal a. Uluk takin a hmel chu ka en a, engemaw ti tak chuan Mizo te pawh a ang in ka hria, a mitmeng erawh a vai hliah hliah a, ngo nalh tawk tak sam kir chiat mai, lian mawi tawk tak ani tih chu second reilote chhungin ka hre nghal vek. Lungpui chungah chuan kan thu a, a chanchin zawh chu ka chak ru khawp mai, aman a sawi anih loh chuan vawikhat inhmuhnaa han inzawh tawp chu ka ngam bik silo. Ka lam hawiin a then sak a,"Helai hi ka kal chakna a rei tawh lutuk a, Ludhiana ah kan awm a" hriatbelh chak takin ka lo en a, amah vek chuan,"Ka pa pawh hi Mizo ani a, ka nu nen hian Delhi University ah an kal tlang thin a, chutatang chuan an inngaizawng chho a, ka nu nu leh pate hi mi khirh tak mai tak an ni a, ka nu leh pa chanchin chu an lo hre vat a, ka nu tan pasal tur an zawng nghal rum rum mai ani awm e, college an zawh rual a innei turin engkim an lo peih fel vek mai a. Mahse ka nu khan ka pa alo hmangaih ve si a, Mizoram lamah a zui haw ve ta tawp a, ka nu sawidan chuan ka pa chhungte pawh an lo lawm lo hle a, an inah pawh awm theilo in thingtlang khaw pakhatah an awm a. Ka pa pawh chuan ka nu chu a hmangaih em em a, nitin inhlawh chawpin a chawm a, hrehawm ati ngai lo" a sana chu a bih zeuh a,"Naktuk enge i tih ang?" A ti ta daih a,"Helai hmun hi ka la fang zo lo a, ka kal leh ang chu ka tia" ka tih chuan a dar a chhin ak a,"Rem i tih chuan kan inhmu leh thei angem?" a ti leh a, harsatna dang ka nei anih loh chuan ka theih tur thu hrilh a. Ajay te in lan theihna thleng min thlah a, ni chu a kir leh ta a. Kum tam tak hnuah mipa ka suangtuah zui hmasa ber ani leh ta.
Ka muthmunah te chuan a hmel ngainatawm tak, hmeltha leh zaidam thlap chu ka mitthlaah a cham reng a, tiang hian vawikhat inhmuhnaah ka la awm ngai lo. Zinglamah chuan ka lo chhing sek a, rimawi bengchheng zet chuan min ti harh chiang kher mai. Phak chapin ka tho a, a tuk atana inbuatsaihna chu an lo tan der alo ni a, Ajay-an min lo hmuh veleh nui sangin min lo hui a, bathroom lam ka pan san ta zawk a. Ka inphihfai a, ka ha te ka nawh zawh chuan Ajay te awmna lam chu ka pan a, ka theih ang angin an thil chei chu ka va pui ve a. Nimin lama thil thleng ka mi tawn thar chungchang chu Ajay hrilh ka duh viau na sawina remchang ka hmu mai loa, amah zawk chuan,"Babe, nimin lama tlangval rawn thlah haw tu che kha tunge?" Nui vur vur chuan a ti a. Min lo hmu leh reng tawh nih dawn hi,"Ka thian thar anih kha, Ajay, naktukah ka sawm ve dawn nia kawm tur ka nei silo a" ka tih chuan min lo phur pui khawp mai. Chhun atang chuan ka inchei a, nidanga awlsam taka in siam mai thin kha vawiin ni zawng a dan a dang tlat. Kha Daniel- mit kha lak ka tum ta viau nge ka hre lo, uluk taka darthlalang hmaa ka din tak reng chu. Ka chhuah dawn chuan Ajay leh aunty chuan meng bial kawkin min lo melh a, aunty chuan,"Bawihi, tiang taka nalh kha em ni ilo nih a?" a tih chuan ka lawm kher mai, Ajay pawh chuan,"oh my god!" alo ti vei chul a. Nuam ka tiin ka confi lehzual sawt! Aunty chuan tiffin min siam sak reng chu niin, min pe a, ka bag ah chuan ak in ka chhuak ta nghal a.
Kan inhmuhna tur hmun lam chu ka thleng phei a, phul hring dupleh luite luang ri karh karh te chuan ka mit an ti tlai hle a, pangpar hmun par hrang hrang inpawlh nuai te, sava hram chiah chiah te chuan ka ngaihtuahna an ti thui hle mai. Mizorama haw chang te hian sava hmuh tur van tawh zia te, ram kan tih chereu nasatzia te ka ngaihtuaha, ringlo mi kan tih te ramah heti tak hian sava te an ngampa a, kan bul ah ngampa takin an rawn tla mai mai ani si a tihte chu ka ngaihtuah kual ta mai mai a. Darkar khat dawn ka thut hnu pawh in Danny hmel reng reng chu alo lang thei lo. Tawngkam mawi ah a sawi ve mai mai anih te ka ring a, chutiang ni turin ka ring chiah si lo. Ka thutna atang chuan ka tho chhuak chiaha, anhmawh em em a rawn tlan hi ka hmu a, alo hnai zel a, ka mi nghah ngei chu a ni. Ka bul arawn thlen chuan hah vangin a thaw hlawp hlawp a, a tlai avang chuan thupha a chawi mawlh mawlh bawk a. A camera chu min pe a, tui awmna lam chu a pan a, a hmai te phih in a va in sil dai a, a thla lak te chu ka lo ensak a, a nalh hlawm ngang mai. Ramhnuai thla alak te chu ka en a, a thla lak dan atang professional tak ani tih chu ka hre nghal. Ka en zel a, ka thlalak ka hmu ve tlat, sava thla lak tuma ka veh lai chu alo hmet nual a, nimin pawh khan tihpalh thil nilo in min lo hmuh sa avanga min rawn pan ani tih ka chiang ve tlat.
Nuam lo atih ka hlauh avang chuan ka dah ta daih a, ani pawh a rawn chho ve nghal bawk a. A nui sang reng mai chu hmuhnawm ka ti, ka eitur pai chu ka phawrh a, kan ei a. Akhat tawkin kan mit leh mit chu a in tawng leh sak zel a, rei ka en ngam tlat lo. Kan ei zawh chuan a nu leh pa chanchin chu sawi zawm turin ka han ti a, ani pawh chu phur takin athu tha a,"I ngaihthlak peih ka ring tawh lo a" a han ti hmasa a,chutah,"Kum khat an inneihnu in kei hi ka lo piang ve ta a. Ka nu leh pa pawh an lawm em em a, chuan ka nu in ka hmingah Daniel Lalawmpuia Sailo tih a sa a, e ka lo sawi hmaih a, ka pa hi Sailo hnam a ni a, ka pu pu leh te hi Sailo lal an ni awm e. Ka pa in hnam dang an nei chu an hrethiam theiloa, an hnawtchhuak tawp mai a ni. Ka nu pawh chu mi inzir mi tak ani a, Mizo tawng pawa thiam ve ta vat a, a pai erawh chu a pai tho a, keipawh chuan kan inchhungah chuan Mizo tawng lo chu tawng dang ka hre ngailo. Kum 8 ka lo tlin chuan naupang thangduang tak mai ka ni a, ka lian tawh viau a ni. Nikhat chu kan khuaah chuan ka nu pa ka pu leh midang panga vel hi an lo kal thut mai a. Ka la naupan deuh avangin chiang tak chuan ka hre tawh lo, karkhat hnu vela ka nu nen an motor rawn ken a min chuan tir leh tap zawih zawih a chhungkua kan inthen chu ka hriat ani mai. Tun hnua ka nu sawi dan chuan khatia ka pute rawn kal khan dawt in ka nu an bum a, ka pi thi tepa a awm thu leh haw lawk a, ka pa bula kal leh turin an lo thlem alo ni a.ka nu erawhin ka pa tello chuan khawiahmah kal a tum lo. Mahse ka pa chuan chutia a hringtunu thichhawnga awm reng chu a ngaihtuah em em a, ka nu bulah a pa thu awih mai turin a ti ta a, an inthenna hlenna tur anih reng an ring lo. Kan haw thlak hnu chuan ka nu chu khuahkhirhna na tak hnuaiah an dah a, chhuah leh phone hman reng reng an phal lo. Keipawh chu sikul tha ber berah min kal tir a. Ka pa chu zan tin deuh thaw kan kalsan atanga kumkhat chhung chu ka mumangah ka hmu thin . Ka ngai em em a, ramhnuaia min hruai laite ka ngaihtuah a, ka tap nasa thei hle. Kum khat hnu chuan ka nu pawh tlem chuan an khuahkhirh ta lo va, nikhat chu ka sikul bang ka haw chuan ka nu chu kan phone bulah alo tap tlawk tlawk a, ka va kal chuan min kuah a, "Bawiha pa i nei ta lo" a ti a. A ngaihna ka hre lo hle. Chiang
zawkin min hrilh leh a, ka pa chu Khawsikpui in a thi, Aizawla an inah a ruang an laa, ka pa nu in ka nu chu a lo bia alo ni a. Ka pa in a diary ah heta kan in number hi alo chhinchhiah hlauh a, chuvanga rawn be thei chu an lo ni. Ka nu chuan chaw a ei theilo a, a mu thei loa, chutiang reng renga a awm avang chuan a taksa a chhe chak hle a. Ka pi leh ka pu pawh an mangang takzet a, damdawiinah te dah lutin thlakhat zet ka nu chu a awm a ni. Chutatang chuan a pangngai tak tak thei ta lova, a rilru na lutuk in a nghawng anih thu doctor te chuan an sawi a, ka pi leh ka pute chu an thiltih avang chuan an inchhir em em a, chutatang chuan ka nu rilru tihnat chu an hlauh ber a lo ni ta a, ka hming an lo thlak tawh pawh sut lehin Daniel L.Sailo tih chu ka pu nghet ta ani" ka mittui ka lo hru leh zauh thin a, Danny nu leh pa inhmangaihna chu a ropui ka ti a, ka khaangaih bawk si. Ti hian ahan sawi zawm leh a,"Ka nu chuan mizo tawng hlirin min biaa, ka theihnghilh a hlau ani ber. Pawl sawm ka pass te chuan ka nu chu a lungchhe em em a, ka pa hming lamin a tap tlaivar thak a ni. Ka pu hi Christian chu a ni naa a inkhawm ngailo thung. Fapa a neih loh avangin kei hi min siam puitlin a tum em em a, sumdawng mi nih tir min tum thei hle. Mahse kei erawh chuan thlalak hi ka tui em em a, photographer nih ka tum thung. Ka pu chuan min nawr lui duh ta lova, ka tuina ber kawng zawh chu min phalsak ta a. Osmania University, Hyderabad atang degree course zovin London ah thla thum chhung ka zir belh leh a, tun ah ka lo chhuak chho leh chiah a ni" a ti a. Chiang zetin ka mitah chuan min en a,"Niminah thla la turin henglai ram vel hi a mawi ka ring a, ka rawn kal a, helai hmuna ka hmuh che khan belhchian che ka chak ta em em a, tiang khan ka rawn pawh ta mai che anih kha" a tih zawm leh nghal a. A kianga hun hman chu a nuamin a khamawm loh hle a, naktuka Ajay te inneih tur chu hrechhuak thutin sawm ka rilruk a,"Danny, engtik thleng nge hetah i cham dawn?" ka ti a,"Saturday hian let ka tum deuh a, chuan, i chanchin hi engmah ila sawi ve lo a" a ti a. Ni dawn tak e, ka chanchin tlangpui chu tawi kim takin ka han hrilh ve a, helai hmuna ka kal chhan te chu sawiin lokal ve ngei turin ka sawm a, a han tang viau na a ka sawm lui tlat avangin a aw ve ta hram a. Ka sana chu ka han bih zauh a, alo tlai tawh hle a, Danny zawk chuan ka chezia a man thiam nghal mai a, "Ka thlah haw tawh ang che. Naktukah kan inhmu leh dawn tho a, a ni lawm ni?" a nui sang a, lo nuih let ve sak pah chuan,"I thulh leh thut anih loh chuan ka beisei" ka ti a. In lam pan chuan kan haw ta a.
Zingkar atang nilengin Ajay te inneihnaah kan buai a, Danny pawh a remchan danang angin alo che ve,a, a hmel hlim sarh reng chu en nin a har takzet. A khat tawkin min rawn melh leh zeuh thin a, nuam ka va han ti tak. Inneihna hun te kan hman zawh chuan kan chau tlang hle a, Ajay te chhung pawh ka chungah an lawm ve hle a, zanah chuan huan lamah Danny te nen kan leng a, khua a thiang in thla a eng bawk a, a nuam takzet a ni. Danny chuan ka kut chu vuan in min kai a, thutna hmun nuam tak an siamah chuan kan thu a, van lam chu ka han hawi a, Siamtu themthiamzia chu ka ngaihtuah neuh neuh a, ka bula thu pawh ka lo hrechang lo hial a,"Van lam khi i thlir zankhua mai dawn em ni?" Danny-an a tih chuan ka harh chhuak zawk a, kan nui dun hak hak a, "Danny, Siamtu kutchhuak ropuizia khi ka lo thlir a" ka tih chuan a han hawi kual ve a, boruak chu a hip vang vang a,"Ni e tiraw Emily" k mitah tak chuan min en a,"Naktukah chuan kan nang i awmna lamah i kir anga, kei ka haw bawk anga. Ka huphurh takzet ani. I kianga ka hun hman te kha nuam ka ti a, chuan ka hlim em em bawk. Engtikah emaw chuan kan inhmuh leh ngei hi ka ring tlat a ni" a aw chu a inthlahna aw ki ruih a, "Emily ka rawn zin vat ang, min lo mikhual duh angem?" a ti a. Ka ngai dawn hle tih ka hria,"Tehreng mai, ilo kal phawt chuan rawn thleng ngei ngei ang che" ka lo ti a. Darkar thum dawn kan awm hnu chuan haw zai kan rel ve ta a, ka kuta min kaih pah chuan pendrive min pe a,"Delhi i thlen hunah chauh en ang che" a ti a, ka lu chu ka bu zauh a. Gate kan thlen chuan kal hmasa turin ka ti a, lut hmasa tura min tih tlat avang chuan luh ka tum a, ka kal dawn chiah chuan ka chalah min rawn fawp zeuh a. A sa hat in ka hria, ka luhsan ta. Ka khua a har nghal vawng vawng mai. Thian tha ang chauh chuan ka lo en ve lo a lo ni, ani erawh chuan chutiang bakin min en si lo. Ka rilru ang hi a pu ve lo a ni tih ka hriat chuan keipawhin ka rilru atang hnawt bo tur a ni. A pendrive min pek chu ka purse ah ka dahtha a, Danny ngaihtuah reng chung chuan ka lo muhil ve ta siai siai a.
Thla thum lai a liam leh tawh a, chanchinthar mak tak tak avangin keipawh lungleng hman lo in ka khawsa leh tawh a, hei hi ka nuna nuam ka tih ber thin chu ani reng a ni. Nikhat chu Ajay nen kan chhuak a, tlai lamah office ah kan kir leh hman chauh a, ka thiannu Kavitha chuan chhunah min hmu turin mipa pakhat alokal thu chu min hrilh a, hetiang neuh neuh hi an awm ve fo avangin ka rilru ala lem lo, kal paha Daniel a inti in ka hria a tih zeuh ah chuan ka thin chu a phu zawih zawih a ni ber. Ka ngaihtuahna zawng zawng chu luah lo mah se ka la theihnghilh bik lo. In ka haw veleh hriatchhuah ka nei a, pendrive min pek kha. Ka haw hnu khan purse thar ka neih avangin ka dahna kha ka hmang ta ngailoa, ka lo hre chang tawh lo a ni. Ka laptop chu la chhuak in ka han en nghal a, ka thlalak hrang hrang mawi tak tak chu alo dah a. Ka hriat loh a lak alo ngah hle a, note pakhat hi alo dah a, hei hi a lo inziak a-
"Emily, "the Queen of my heart"
I thinlung luahtu han ni ve tehreng ila aw...."
tih hi, a mobile no.chu alo dah bawk a. Min ngaihtuahna nei ve miahlo ang khan ka lo ngai a, min lo duh reng maw? Mak ka ti a, ka lawm bawk si. Ka doorbell ri ka hriat chuan ka va hawng vat a, ka in ah, ka hmaah Danny chu a lo ding reng a. Ka mak ti hmel chuan a tihrilhhai ve deuhin ka hria, "How are you, Emily" ka va kuah tawp a, "Dan.. " ani pawh chuan min kuah let ve a. Ka beisei loh thil lo thleng avang chuan awmngaihna pawh ka hre lo. Inchhung lamah kan inzui lut a, "Engtinnge ka in luah hi i hriat theih a?" Ka tih chuan ti fuh in tih hmel takin min melh a,"I hnathawhna hming ka hriat chuan zawn chhuah nan che a tawk viau in ka hria" ka chum a,"Tinge i va rawn kal har si ve?" "I call ka nghak reng a, min lo call si lo a, hmuh che ka ngam tawh lo alawm. Ka thilpek che kha i en anga, ka rilru ang i lo pu ve lo anih ka ring a" a ti a. Ka rilru te chu hrilh ve in kan dawihzep luatah hrehawm kan lo ti tuar dun reng alo ni. Kan va han hlimdun tak em!
Ka ina thleng tura ka tih chuan phur takin a bungrua ava la a, a rawn insawn phei a. Ka in chu zau tak ni lem lo mahse a nuam tawk viau mai. Room pahnih a awm a, mikhual neih paehin a tawk ve viau. Chhunah ka awm hman ngai loh avangin zan lam hi kan inkawm ve theih hun ani mai a, rei tak thleng mengin hlim takin kan inkawm thin. Inngaizawng a in thlahlel tak te pahnih tan chuan lungchim taka han infawh vawng vawng te pawh kan nei a, chu ai thui kan kal ngai lo. Ni li chauh a rawn cham theih avang chuan a haw alo hun leh ta der a, a haw dawn zan chuan kan huphurh duh kher mai. Dar insi rialin kan thu a, akhat tawkin kan tawng zeuh zeuh a, ka kut chu a hum tlat a, haw chu a huphurh ve hle tih ka hria. Danny mizia ka hriatbelh leh chu hmeichhia te hi a zah a, a care bawk. Tin, ngaihzawng hi a la ngah lo viau in ka ring a, ka ring sual lo hle tih a hnu ah ka hria. Ka maimitchhing a kan inhmuh hmasak ber ni te chu ka ngaihtuah a, ka biangah chuan min rawn fawp zeuh a, "Hetah hian hna ka zawng dawn, ka hmuh chuan kan inhmu go thei anga" a ti a. Keipawh chu ka phur ve ta khawp mai. Ka lo ngaihven pui ang che ka tih chuan a lu a thing a, mahni ngeia zawn hmuh a duh thu a sawi a. Ka rin sa anih avang chuan ka nui hak a, a nui ve mai a. Zingkara a chhuah dawn avangin kan mu ta a.
Reiloteah Danny pawh chuan hna chu a hmu ta vat a, in hmu reng theilo mah ila khawkhata awm chuan thla a muang ve hrim hrim. Weekend ah chuan inhmuh hram kan tum thin a, hetiang tak hian tu mipa lakah mah ka la luangliam ngai lo. Ka kiangah a awm chuan him hliah hliah in ka inhre thin. Ajay te nupa pawh an in la zei thei khawp mai a, kan tan thian tha tak an ni. An inah kan va leng ve fo a, chawei loa haw an phal ngai lo. Nikhat chu Danny nu in min lo be hlawl mai a, ka zam ve hle mai. A fapa in ka hming a sawi ngun zia leh min hmuh a chak zia te rawn sawiin hun remchang hmasa berah tlawh turin min rawn ngen a, keipawh chuan ka hunawl hmasa bera kal ngei turin ka in tiam a. A huphurhawm hle chuan ka hria. Kan hun neih danin a zir lo a, Danny nu in min rawn biak atanga thlakhat naah hun tha a rawn in her ve thei chauh a, an chhungkaw chanchin tlangpui chu kawngah min hrilh a, a pi leh pute chuan engtiang takin nge min lo dasn saan ang ka hre lo a, zam tak hi ka ni.
Darkar riat dawn kan tlan hnuah Ludhiana chu kan thleng ta, Danny te in lam panin kan tlan lehnghal a, hmun hrang hrangah kal tawh thin mah ila he hmun hi ka vawikhat kalna a ni a. A boruak chu nuam ka tiin ka ngaina nghal ngawt a! Minute 10 vel kan tlan leh hnu chuan in ropui tak mai hi kan thleng a, Danny chuan an in kan thlen thu a sawi nghal a. Mi hausa tak an ni ang tih chu lo ring lawk mah ila hetiang taka an haisak hi ka ring pha ngai lo. A compound zau leh fai tak chu ka rah zawngte chuan khawvel chu tawp mai turah kan dah vel a. Kan thleng tih hriain Danny nu chu alo tlan chhuak vat a, min hmuh chuan min lo kuah nghal a, "Emily, ka lo lawm a che" a ti a. Danny nen an in kuah leh a. Nu ngainataam tak anih ka ring nghal. An inchhung kan han lut a, pui tak hi ani ringawt. Hetiang taka hausa tupa hian kei ve mai hi engtia min duh ngawt nge anih zawk ka ti rilru vawng vawng a. Ka room turah chuan min hruai a, tv, sofa, engkim mai chu felfai takin alo awm bek a. Kan in tak a ka room nen ka khaikhin a, pui tak hi a ni. Thawmhnaw te ka dah fel hnuah ka inbual a, inbual zawh ah a pi leh pute chu kan hmu dawn a ni. Chu tak chu ka huphurh lai ber chu a ni. Ka inbual zawh chuan inhnuai lamah ka chhuk a, an living room ah Danny chuan min lo nghak reng tawh a, min hmuh chuan a nui sak a, "Darling, i chhelo takzet. Zam miah suh aw.." a ti a. Ka chil ka lem ri khulh a, ka lu chu kaan bu ve nghauh a. A pi leh pu room kan thlen chuan ka thlan a tla leh hman! Zahna chibai kan buk a, thu tura min tih hnu chuan kan thu a. A pu chuan ka chhip atanga ka ke ler thlengin chiang takin min en a, ka khur ru der der thei nia. Chutah ka hnathawh leh ka awmna te chu min zawt a, tha takin ka chhang a, a pi leh a nu chuan min en a, min lo nuih ver ver a. Ka chanchin tlangpuite ka sawi hnu chuan a pu chuan,"Awle ka mitah chuan i tling tawk e. Ka tunu, ka tupa hi duat takin enkawl ang che" a ti ta a. Ka thaw huai mai, kan boruak rit tak chu kan pel fel ta. A pi chuan min kuah a, duat takin a tunu ang maiin ani min kuah ni. Kan zan hmasa ber chu nilenga motor kan chuan avangin hma takah kan mu a. Ka thla angam nghal zan mai chu keipawhin mak ka ti. Ka lo mu tui hle aniang ka harh meuh chuan dar 9 alo ri dawn reng mai a, hmanhmawh takin ka tho a, ka in phih fai a, inhnuai lamah chuan ka chhuk thla a. Choka ah chuan Danny te nufa chu an lo awm a, min hmuh veleh zjnglam chibai min lo buk a, breakfast kan ei ta nghal a. Hun kan ngah loh em avangin ka hmun tlawh chak tak tak pawh kan tlawh hman dawn lo va, mahse Nehru Rose Garden erawh kal hram ka duh a, Danny bula ka sawi chuan min lo phur pui viau a. A nu bulah kan hun hman tum dante hrilh in kan chhuak ta a. A hmun kan va thleng chu thlalak a ka hmuh ai a let engemawzatin a mawi a, a nuam bawk. Ka lo suangtuah fo thin chu atakin ka hmu a, ka hlim hmel chuan Danny pawh a ti lawm ve hle. Ludhiana ka kal chak chhan ber pakhat ani ve tlat a. He hmun ah hian chhungkuaa kal hmuh tur pawh an tam thei hle a, nula leh tlangval inngaizawng hmuh tur pawh an tam hle. Danny pawhin a camera a hmet mawlh mawlh a, ka duh ber nen he hmun ka tlawh thei hi ka lawm a ni.
Thingbuk hnuai ah chuan insi rialin kan thu a, engdangmah kan ngai bik lo. Danny chuan,"Emily ka chhungte chu enge i hmuh dan?" a ti a. Kei chuan fel ka tihzia leh nuam ka tihzia te chu ka hrilh a, "I chhungte hian min pawm ve angem tih hi ka ngaihtuah a ni. Min lo pawm lo ta se engtinnge niang?" a han ti leh a. Ka la ngaihtuah miah lo tih ka hria,"An pawm ngei ang che tih ka ring" ka ti a. Duat takin min kuah a, ka mitah chiang takin min melh a,"Emily ka hmangaih che" "Danny keipawhin ka hmangaih che" ka ti let ve a, kan in fawp ta vawng vawng a. Zanah chuan Danny nu chu ka room ah alo kal a, a tuk mai chu Delhi kama kan let leh hun anih avangin thawmhnaw ka lo inrem mawlh mawlh a. Ka hmuh veleh ka lo ko vat a, ka bulah chuan rawn thu in ka kutah a vuan a,"Bawihi, ka fapa hi i hmangaih ve tiraw?" a ti a, keichuan ka hmangaih thu te chu ka hrilh a,"Danny hian a hmangaih takzet che tih ka hria. Apa nen kan chanchin chu a hrilh vek tawh che a, keini lam atang chuan in pahnih hian kan pawm thlap cheu a, i chhungte rilru chu hre lo mah ila nang hi ka monu ni thei ngei la ka duh hle a nk. Ka hmuh tirh atang che khan thinlung takin ka pawm chea, kan inzawm nghal thlapin ka hria ani. Hlim takin awm ang che u" tiin duhsakna min hlan chungin a chhuak ta a. Keipawhin an chhungkua hi ka ngaina tak meuh a ni. A tukah chuan ngai tak chungin kan inthen leh ta a.
"Emily, i awmdan ka pa puian a hre thawi ania aw" fon atang ka cousin Hriati chuan a rawn ti a, "Engtinnge ka awm vak a" ka lo ti a, ani chuan,"Hnam dang mi i ngaizawng a ni lawm ni? Pa puia thin i ti rim ang tih ka hlau ania, lo then vat rawh" a rawn tih zawm leh nghal a. Chiang taka Hriati chu hrilh tul ka tih avangin Danny chanchin chu ka hrilh ta vek a,"Chu pawh nise a nu vai ani tho a, a dang chuang lo" a la ti fan a. Ka ngaihtuah chhunzawm nasa hle. Ka pa chuan awlsam tak chuan apawm hauh lo ang tih ka hria. Hrilh dawt dan erawh ka bangbo hle a, anmahni sawi chhuah hun ka nghak ani ber. Hun akal ve zel a, Danny nen kan inkar pawh a tha a, inhmuhthiam lohna em em kan nei ngai lo. Han inhnial ve zauh chang erawh neilo kan ni bik lo. Zankhat chu ka pa in min rawn fon a, rawn zin a tum thu a sawi chuan ngaihdan ka lo nei thiam ve mai a. Danny nen kan chungchang chu hmaichhanah min sawipui a tum tih ka hria. Alo thlen zanah ka rindan chu a dik tih ka hre nghal bawk. Ka hna atang ka ban hma lem loh avangin ka pa chuan rawng alo bawl a, mizo chawhmeh a rawn hawn nual avangin ka chawei pawh a tui hle a. Kan in lam chanchin te min hrilh pah a, chaw kan eikham chuan ka huphurh ber hun kan thleng ta. Kan tv en lai chu a hmet tawp a, "Bawihi, ka lo kal chhan chu rin dan i nei thiam tho in ka ring. Pasal neilo a awm tur hian kan duh miah lo che, mahse mizo dik tak nise kan duh a ni" a ti charh charh a. A sawi zawm leh a,"Tuna mi nen hian engang takin nge in lo inkawp tih chu ka hre lo a, mahse in inkar hi ti tawp turin ka ngen che ani" "Ka pa, enge a rem lohna? Danny pa chu Mizo ani tho a. Enge a danglam vakna awm?" Ka mittui a parawl nghal der. Ka pa chu a chek tlak tlak a,"Ka fanu hian pasal anei dawn anih chuan a mona tur chu Mizo chhungkuaah ngei ani tur ani. I naupanlai ata tawh ka thu hi i zawm ngai loa, englai mahin ka duhna i la tihhlawhtling ngailo. Doctor ni tura ka tih lai che in tuna mi hi i thlang a, khatih lai khan ka rilru hi ana lo in i ring em ni? Ka fanu neihchhun i ni a, i hlim loh hi ka hlau ber thin. Ka rilru natna pawh ka ti lang ngailo anih kha. Tunah tal hi chuan khawngaih takin ka thu hi zawm ve hram ang che" a mittui alo luang ngiai a. Ka pa mittui a tla; keimah vangin.
Ka ngaihtuah nasat pauh leh ka pa sawi chu a dik ka ti. Ka tuina ber ka zawh theihna turin ka pa chuan rilru na tak chungin min zirtir a. A duhna hmuna lut tura min tih laiin kei erawh chuan hmun dang ka thlang a, ka pa duhzawng hrim hrim kha ka kalh emaw tih mai tur ka ni thin. Ka pa thu ka zawm dawn chuan ka hmangaih ber ka kalsan a ngai dawn si. Ka rilru ipik lutuk chu ka muhil thei loa, tumah chan ka duh lo. Mahse thil theih ani bawk silo, Danny leh ka chhungte buk chuan ka chhungte buk chu a rit zawk si. Engtinnge ni ta ang? Ka tal ka tal a, chhin khat mah ka chhing lo a, ka tlaivar chiang hle. Hnaa ka chawlh avangin nilengin ka inkhung a, thil tam tak ka ngaihtuah hnuah Danny nen kan inkar chu tihtawp ka tum ta. Danny chu bia in hmuh ka duh thu ka hrilh a, lokal vat a tum thu in min chhang a. Ka huphurh luatah ka khua te chu a sik in ka hre rum rum. Tlaiah chuan hlim deuhin Danny chu alo kal a, tuna a hlim hmel hi engtin tak nge a inthlak ang tih ka hre lo. Ka awmdan atang chuan kan borual chu a hrethiam ve deuh chuan a lang a, tjildang min sawi pui a, a chet chhiatna te chu sawiin min tih hlim a tum ve hle. Atawp atawpah chuan ka sawi duh chu min zawt ta a, ka pa nena kan sawi zawng zawng chu ka hrilh chhawng a, atawpah,"Danny, ka hmangaih che a, ka chhungte pawh ka hmangaih. Ka chan phal lo chea chutiang bawkin ka chhungte pawh, mahse chu chu a theih si loh. Ka pa rilru hi ka ti na thei tawh lo ani, kan inkar hi kan tihtawp mai a ngai ani" ka mittui chu tla lo turin ka dang hram hram a, Danny chuan engmah a sawi lo. Ka inchhung chu a reh tlawk tlawk a, a hrehawm takzet a ni. Minute 5 vel aliam hnu chuan a ding a, "Emily min hrethiam rawh aw. Engmah sawi tur ka neilo ani" tiin a chhuak ta nghal a. Ka room ah lutin ka tap ta hawm hawm a. A tukah chuan hma takah Danny chuan min rawn call a,"Emily... ka lo nghak reng ang che. Pasal i neih hma chuan ka beidawng lovang.. emily, ka hmangaih che" tiin fon a dah nghal a, keipawhin ka hmangaih che ka ti sap a, mahse a hre pha ve ta lo.
Mi hlim thei tak ni thin kha ka lo danglam zo a, englaimahin Danny kha ka theihnghilh ngai lo. Mizoramah haw in ka chhungte kiangah hun ka hmang a, mahse ka hlim zo chuang lo. Engmah hian ka rilru an la peng thei lo ani ber. Ka chhungte pawhin min khawngaih tih ka hria, ka pa thu an hnial ngam bik silo. Ka tuar tlawk tlawk a, engtikah emaw chuan k la tuar chhuak ve maithei asin. Ka chawlh neih chu ka hmang zo a, ka kir leh a hun tawh. Nidanga phur taka awm thin kha ka ngui bar a, ka u te chuan airport thleng min thlah a, min khawngaih hlawm hle tih ka hria. Tih theih erawh an nei bik silo. Ka theihtawp chhuaha tha taka awm tura intiam chungin ka ngaih em em thin ka u te chu ka thlawh liam san ta.
Ka lunglenna leh hrehawmna te chuan min kiansan vek lo mahse mahni chunga alo tlak chuan alo tlak chuan tuar dan te pawh alo awm ve zel a. Khuareiah heng min delhtu lunglen khawharna te hi chu ala kiang ve mahna le! Ka chawhmeh lei avangin ka bawr hle a, ka kawngka hawn ka tum pawh chuan ka ti fuh maitheilo, vawilehkhtah Danny alo lang thut a, ka thil ken te chu min lak thlak sak a, kawng chu ka hawng sawk sawk a, ka chawhmeh ho chu lak tumin ka ban a, mahse alo phal lo. Inchhung luh pah chuan,"Min va hmu peih lo awm ve aw... ka hmuh chak tehlul che nen" a ti a,"Chutiang pawh a ni chuang lo" ka ti a. Chutih lai tak chuan ka fon a rawn ri a, ka en chuan ka pa alo ni, ka han la vat a,"Bawihi.. Danny chu alo thleng tawh em?" enge thil awmzia hi ni ngai,"Ka pa.." zawhna aw ki tih a hai lo,"I hlimna hi ka duh ber ka fanu, hlim takin awm rawh. Danny chu i nei fawn nia" ka mittui chu a tla zawih zawih a, tun tum erawh chu lawm avang ani thung. Danny chuan min lo kuah vat a,thil awmzia ka zawh chuan,"Kan khuaah ka haw a, ka nu bulah engkim ka hrilh a. Ka nu chuan i chhungte hmu tur leh theihtawp chhuaha nanghi nei ngei tur chein min ti a, i address chu Ajay-an alo zawh che kha" ni tak e, min zawt ngei alawm. A chhan erawh a sawi duh miah lo anih kha. Amah vek chuan,"I chhungte chu ka hmu ta a, atir chuan a harsa khawp mai. Mahse i pa kha thinlung sak tak anilo tih ka hre tawh a, chuvangin thinlung takin nang hi ka dil ngawih ngawih a. I hlim lohzia te min hrilha, hlim takin ka dah ngei ang che tih min intiam tir a. Chuan thil pakhat ka intiam bawk a" "Enge" ka lo ti vat a. A ni chuan,"Eng dinhmunah pawh lo ding la, ka hmangaih reng ang che. Chhan awm in ka hmangaih ngai lo chea, ka hmangaih em avang chauh che hian ani nang hi ka thlan chea, ka hmangaih che. I chhungte leh nang hi hrehawm ka tuar tir lo ang che u tih ka intiam a ni" a ti a. Kan in pawm vawng vawng a, "keipawh hian engdang vang mah nilo in ka hmangaihna avang chauh hian ka hmangaih che anga, eng dinhmunah pawh ding la, ka hmangaih reng ang che" ka ti a. Hmangaihna mitmeng mawi taka in melh ralh in kan hma hun chu kan thlir dun thei leh ta a.
~the end~
No comments:
Post a Comment