NGHILH RUAL LOH NUNHLUI

Mami Dekhenez Chawngthu


NGHILH RUAL LOH NUNHLUI


Proloque

Ruah chu a tla cherh cherh reng a, ka room tukverh atang chuan dakchhuak in khawlaia mi chetla vel chu ka thlir a, ka hnathawh lai chu thawh chhunzawm pawh tum lovin kan nihliap ka la a, kalna tur lam pawh hre chuang lovin ka chhuak a. Kan veng kawnah chuan chhuak pheiin field lamah ka let leh a, thingkung ngheng chuan ka han thaw halh halh a, ka thinlunga thi thei lo leh kum tam tak ka mittui luantirtu chu ka rilru ah lo tharin ka suangtuahna khawvelah ka let leh ta vang vang a.

"Tunah chuan kan inthen hi a tha ber in ka hria, kan inthen avang hian ka hmangaih lo che tihna ani lo bawk ania" ka mittui kar atang chuan ka han melh tawk tawk a. A ni pawh a bang bik lo, a mittui chu hruk zeuh pahin a nui lui sak a, a nihliap chu min pe a ruah sur hnuaiah chuan a kal ta. Ka thlir reng a, chelh din duh ngawih ngawih mah ila chutianga ti turin huaisenna ka lo nei tawk si lo.



Thlasik a in tan chho mek a, Aizawl lam boruak erawh ala zia viau thung a. Ka pa office bang pawh a dan pangngaiin motor horn a han pe leh that that a inchhungah awm zawng chu kan kawtah kan tlan chhuak a, lungawi lohna pawh lo nei ru mah ila hetiang hunah chuan dah bo in hlim hmel takin ka pa chu kan lo dawngsawng thin. Hei hi kan chhungkaw dan ve reng a ni a, ka pa pawhin hmel hlim sarhin a nupui fanau te chu min han nuih anga, kan naupan deuh lai phei chuan ka nau nen min pawm lut anga, kan thil duh te ngen na hun atan keinin kan lo hmang thung thin. Hemi tlai pawh hian ka pa chu hlim takin kan lo dawngsawng a, ka nu in thingpuite a siam zawh hnu chuan kan unau in min ko a, ka nu chu a rawngbawl lai dah lawk turin a han ti bawk a, chutah ka pa chuan,"Hei Mampuii nu, thingtlang lamah min sawn thut mai a, order pawh vawiin khan a lo chhuak nghal a, thla a thar veleh kan insawn dawn a nih chu" a ti a. Ka rilru a lo hah nghal em em a, a chhan chu thingtlang a awm turin ka la inngaihtuah chhin ngai loh vang a nih bakah thingtlang mi nih kha thing dawn riaua ka inhriat vang a ni. Ka nu chuan phur hmel takin ka pa chu a titi pui a, hetiang taka ka nu in ka pa a thlawp thin erawh ka lo chhuang ve viau thin. Ka pa chuan kan unau in min han melh leh zawk a, "Kan vannei a, thingtlang kilkhawr lutuk ani lo a Zohmun khua te chu, sikul pawh pawh sawmpahnih thleng a awm a, in han kal ve nawk nawk anga, in pass hunah in duh leh phaiah ka dah dawn che u ania" a tih chuan ka hlim veleh ta deuh a. High sikul ka kal tan ve chiah a ni a, Aizawlah pawh sikul tha pawlah kan kal a, chutia han insawn leh daih chu kan zirtirtute pawhin min ui pui ve hle. Mahse ka pa hi chhungkaw inenkawlna duh khirh tak mai a ni a, a hmuh phak lo a awm tur chuan hun a la ti tlat lo a ni.



Kan awmna tur hmun lam chu pan in kan chhuak ta vang vang a, kan bungrua vel chu truck kan phurh tir a, ka pianna leh ka ngaih em em ka thiante awmna Aizawl chu kan chhuahsan fel ta. Ka lung a leng em em a, ka mittui chu ka hru leh zauh thin a, ka pa chuan a side glass atang min rawn melh leh thin chu ka lo hmu ve reng a, min khawngaih tih ka hai bik lo. Kan unau hi pahnih chauh kan ni a, ka nu hriselna a that loh avangin fa dang la duh hle mah se doctor ten in siam mai turin an ti ta a ni. Ka nu leh pa hi nupa an nih piah lamah thian an ni a, engkimah an tuina zawng chu an in thlawp em em zel thin. An fate hmuh ah an in hau ngai lova, kan unau zilh kan ngaih pawh chuan an tangrual a, tin, ka nu hian ka pa hi a zah hle a, a chhe zawnga kan hriat tura a sawi kan hre ngailo, chuvang chuan kan unau pawhin kan zah em em a ni.



Kan awmna tur Zohmun khua chu tlai ni tlak rualin kan thleng a, ka pa te office quarter lam chu kan oan ding a, ka han hawi vel a, ka lo rin ang ngawt chu ani lo hle tih ka hre chawpchilh nghal bawk a. Thingtlang khua ah chuan a changkang pawl tak an niin ka ring, in pawh tha tak tak hmuh tur a awm nual. Kan in tur kan thlen chuan mi an lo awm deuh nak nak a, ka pa chuan min lo hmuaktute an nih thu ka nu chu a hrilh a. Kan bungruate chu mi an lo hlan thlak sak zung zung a, kan in bul lawk dawrah chuan eitur ka lei a, inchhunga ala luh theih chiah loh avangin dawr atang chuan ka thlir vel mai mai a, dawr nghaktunu chuan dawr chhunga thu ve rih tur chuan min ti a, a felin keipawh chuan a bula awm chu nuam ka ti nghal hle. A fanu keimah ang rual vel tur hi a lo lut a, "Mami hei i pa te office a an pu ber fanu a nih hi," ka lam chu rawn hawi in" i hming ka lo zawt miah lo che a?" A ti a,"Zorinmawii ka nia, Zorin tiin min ko thin a" ka lo ti vat a, "Anih chu, hei ka fanu hi Lalfakzuali ania Afaki tiin an ko mai thin a, kei hi Nu Hmun tiin min ko dawn nia" a ti zung zung a. Afaki pawh chuan min han chibai a,"Thian ka neilo lutuk a, ka thiante hi hmundangah lehkha zirin an awm bo a, in lo awm chu lawm awm dawn hle mai" a ti a. Ka rin ai in a tawng duh a an nufa chuan ka nel nghal em em mai a. Nu Hmuni chuan kan bungrua dahfel vel chu min pui turin Afaki chu a ti a, kan in thar lam chu panin kan inzui a. Ka nu le ka pa in min lo hmuh chuan an lo khi suk a, thian siam hi ka awl viau hle thin reng a. Bungrua chu a theih ang ang kan rem fel a, khua a thim tak avang leh ei rawngbawl te a ngaih avangin a tlangpui kan rem zawh chuan kan duh tawk a. A tuk leh lama chhunzawm atan kan ti ta a ni.



School kan kal hmasak ber ni chuan min en duh hlawm hle a, kum tawp lam tawh a chutia mi thar an hmu chu mak an ti ve pawh a ni mahna. Afaki kha kei ai pawl khatin alo pawl hniam a, kal lam leh haw lam chu kan inthurual thei a, class ah erawh thian ka la nei lo thung. Chhun chawlh ah inah kan haw thin avangin thian dang pawh ka mamawh hran chuang lo a, Afaki nen chuan kan in zui deuh chawt mai a ni.



Krismas a lo thleng ve dawn ta reng mai, kan khuaah chuan ka tlangnel ve tawh hle a. Thian pawh ka nei ve ta nual a, han kawm tak tak erawh Afaki bak ka nei lo thung. Aizawl lamah Krismas hman tumin kan chhungkua pawh kan inbuatsaih a. Ka thiannu chuan ka awm lo tur chu hrehawm a tih thu a sawi ve kauh kauh a, hmundanga awm a thiante an rawn haq dawn avang erawh chuan ka ngaihtuah lutuk lova. Ka pa in chawlh a nei mai theih loh avangin ni 23 ah kan haw thei dawn chauh a, ka thin a rim ru angreng tawh viau a. Kan haw hma ni chuan Afaki te inah ka leng a, an dawr chu kan nghak a, kan titi mai mai lai chuan pawn lam chu ka va hawi a, ka la hmuh ngai loh mipa chu kan awmna lam pan chuan a rawn kal mek a. Ka vawikhat hmuhna anih vang chuan Krismas hmanga rawn haw anih ka ring nghal a, Afaki nen an inhmuh chuan a thiante zinga mi ani tih ka hre nghal mai a, "Hei ka thiannu thar ka tih Zorini chu anih hi, Zorin, hei Hruaitea anih hi" a ti a. Kan in chibai a, a han vei nuih sak a, hmuhnawm ka ti kher mai. Shillong ah lehkha zirin a awm mek a lo ni a, pawl sawmpakhat a zir mek a, chawlh hmangin a rawn haw alo ni. Reiloteah chuan midang pahnih hi an rawn kal belh a, Chhani leh Lani te an ni a, Aizawl lama sikul kal an ni thung a. Kan vawikhat inhmuhna ni hlawm mahse an fel in ka tlangnel ve nghal mai a. Kan mizia chu a in ang tlang kher mai. Chawei a hun tawh avang chuan ka haw a, zan lamah kan ina inhmuhkhawm tumin kan tin darh ta a. Ka chawei lai te chuan Hruaitea chu ka lo ngaituah leh neuh neuh thin a, a hmel chu tha tih hluah hluah tur chu a ni chiah lo, hmelchhia a ni chuang hau si lo. Ngaihnobei tawk lekin a hang a, a fai em em thung. Mipa a rualpui ah chuan a sang tawk hle a, a tawng tam lo na a a khi ve suk zel chuan min hneh ru tlat a. Mak ka in ti, hetiang hian mipa ka ngaihtuah zui vawng vawng tur ka la tawng tlat lo va! Ngaihzawngte chu nei ve tawh mah ila naupang inngaizawn satliah, thiante hmehbel chawp ang kha a ni mai a. Chutianga ka tum loh lutukna hmuna mipa ka tawng chu mak ka ti viau reng a ni.

Zanah chuan ka thian thar te pawh an lo kal a, Hruaitea hmel erawh ka la hmu lova, ka phurna te chu a reh duakin ka hre hial! Kan kawt ah chuan mei kan chhem a, Krismas boruak chuan kan khua chu a chiah hneh tawh hle a, tlang lamah tleirawl ho pawh an kal sap sap a, a then Krismas hla play a sak pui rawng rawng thawm lah bo lo, a vawikhatna atan he khuaah ngei Krismas hman chu ka chak thar ta riau a! Eitur lei tura kan chhuak tur chu Hruaitea alo thleng hlawl a, chawp leh chilhin ka hlim nghal em em a, min chik tu tak chu awm se ka hmela danglamna awm chu an hmuh hmaih hauh lovang. Kan meituah chu a chhawm tha mawlh mawlh a, ka lo en reng a, a raan hawi thut kan mit leh mit intawng chu ka lai kher mai. Ka hawisawn vat a, ka zak ru hle a, ka bulah chuan rawn thu in min nuih sak a. Kan thiante chuan min ngaihven hmel an pu lem lo. Aizawla kan awmna veng te min zawt a, engengemaw sawiin kan titi dun ve melh melh a. Ka phone no.min zawt a, ka hrilh chuan a save a, min call nghal in ama no.chu min save tir bawk a. Zan a rei tawh avangin hawzai an rel ve ta a, Hruaitea chu a tawi khawmuang hret a, "Muttui aw... tluang takin in kal dawn nia" a ti sap a. Ka lu ka bu zeuh a, a kal ta. Ka thlir reng a Afaki te in kawi a a kal tur chu a rawn hawi let a, a ban a rawn vai a, ka vai let ve lauh lauh a.



Ka thlakhlelh em em thin Aizawl pawh nuam ka ti ta lo, Krismas zo thuai se haw leh tawh ila ka ti thei em em a. Ka chhungte pawh chuan min fiam ve leh laih laih thin. Ka pi leh pute chuan an that deuh laia ka pa hnathawhna hmun hmuh ve an chak avangin Kumthar hmanga min zui an tum a, Krismas te kan hman zawh chuan kan khua Zohmun lam pan chuan ruai theh tukah kan chhuak ta a. Ka rilruah Hruaitea hlir a awm a, a khat tawkin kan inbe ve reng a, kan haw tuka kan inbiak chuan min duh thu leh haw vat tura min duh thu te a sawi a. Chu chuan haw min ti nghakhlel takzet a ni. Ka muhil ka harh chuan khua kan lo lut tep tawh a, kan kal tirhte ka ngaihtuah let a, awm ka huphurhzia leh tuna nuam ka tih leh si zia te chu ka ngaihtuah a, ka nui suk a.



Kan thleng tih hriain Afaki chu a rawn kal nghal vat a, ka thil hawn sak chu pe in Krismas an hman dan te min hrilh bawrh bawrh a. Hruaitea te inah urlawk zan an hman thute, ka awm lo chu nuam lo atih thute a sawi a. Mak tak maiin Afaki nen hian kan in mil em em a, inkawm tur dik tak kan niin ka hre thin. Thiandang aiin ka pawh zawk a, ka ring em em bawk a ni. Zana lo kal leh tura intuam chungin a haw ta a, keipawh inbual turin bathroom lam ka pan nghal a. Ka inbual zo ka phone ka en chuan Hruaitea miscall alo awm a, ka call back vat a, kan thlen tluan leh tluan loh te, ka chau em tihte min rawn zawt a, zanah lokal tumin kan inbiakna chu kan ti tawp ta a. Ka chhungte chu an chauh deuh hlawm avangin an mu vat a, kei erawh ka thiante lo len dawn avangin sitting room ah sikri ai pahin tv ka en a. Kawngka kik thawm ka hriat chuan ka va hawng vat a, Hruaitea chu a lo ding reng a, lut tura ka sawm hnuah alo lut a. Ka zam thar kher mai, ka hmu hmasak ai khan ka hmu tha lehnghal a! Krismas ka man dan te min zawt a, "Rawn haw leh i peih lo viau ang a, Aizawl lamah char bet tu an tha awm si a" a ti a. Chhan ngaihna ka hre lova, ka nui tawp a. Ka bulah chuan a rawn insawn a, ka khur ru dwr der a, a hriat loh hram chu ka beisei. A aw chu a thian kharh kharh a,"Zorin..." amah en chuang lo chuan,"Um.." ka lo ti vat a, "Ka rilru ah i awm reng thin. A mak ka ti, tun Krismas hi rawn haw ka tum miah lova, mahse nikumah ka haw tawh siloa ka rawn haw leh thut a. Ka hmuh che khan mak ka ti zual, ka vei nghal tawp che a. Tiang hian ka la awm ngai lo" a chawl dat a, a sawi leh tur chu nghakhlel takin ka lo ngaichang a, "Ka duh che tih chu ka hrilh tawh che kha, i rilru hriat ve ka duh a ni" a ti a. Ka biak dan atang ka rilru putdan chu a hre vekin ka ring a, han sawi chhuah chu ka huphurh kher mai. Ka hmui chu ka han liak huh zeuh a, "Hruaite, ka rilru te chu i hre vek lo mi?" Ka ti a. Ka en a, min lo melh reng avang chuan ka mit ka la sawn vat a, ka kut chu meiluma ka em chu a la a, a hum vang vang a,"I tawngka ngeia min hrilh ve hi ka phut ani" a ti a. Zak tak chung chuan,"Ka duh che alawm" ka ti a. A nui ta var var a, tawng keh tumin a ang zuau a, kawngka lamah thawm kan hriat avangin kan inthlah vat a, Afaki chu a rawn lut zui nghal a, Hruaitea a hmuh chuan mak a ti deuhin ka hria, mahse a insiamrem nghal vat a. Nui awr awrin Hruaitea bulah chuana rawn thu a,"I tuan ava tha em kan lalhruaia chu" a ti a, an infiam zui nghal bawrh bawrh a. Rei tawk fang an len hnu chuan an haw ve ta a, ka mu tur chu ka nui deuh reng mai a, ka duh ruk em em nen chutia bul kan tan ta mai chu mak pawh ka ti hial zawk a!



Krismas leh kumthar vuakvet a zo tan a, a tam zawk chu ram lamah an feh leh tawh a, Hruaitea pawh a zirna chhunzawm tura a kal a hun leh tep tawh a. Ka huphurh ngei mai, inkhawmna leh zaikhawmna thlengin kan in zui ngawrh ve viau a. Khua a la te tham bawk a, kan inkar chu rin ai takin a darh chak lehnghal a. Kan rualpui thenkhat chuan min sawiselna leh min sawichhiatna an nei zeuh zeuh reng a, bar ah ka khawn duh lem lo. Mikhual nula in chutia an khaw tlangval hmeltha nen boruak kan nei chho chu min thiktu an lo tam ve hle alo ni. Keini aia rual u deuh zawk te phei chuan lerh leh zaktheilo tia min sawi ka hre thin a, nuam lo ti ru viau mah ila ka haw duh bik lem lo. Hruaitea nen kan inkar a that chuan a tawk ka ti.



Nikhat chu Afaki nen kan sikul tlangah vawkchaw chhumna tur thing han fawm mai mai ang kan ti a, chaweikhamah kan chhuak a. Thing ka la phurh ngai loh avangin nuam ka ti hle a, Hruaitea chuan min rawn phone a ka awmna te min zawh chuan rawn kal ve a tum a. Ka thiannu Afaki ka hrilh chuan a hmaa a phurna kha a reh deuh hlekin ka hria a, ka ngaihbel vang pawh a ni maithei. Reiloteah Hruaitea chu alo thleng a, min rawn fiam bawrh bawrh a, Afaki chuan,"lalhruai midang hmuh laiin in nu fiam reng suh" alo ti hmarh hmarh a. Chutianga ka thiannu in a tih avang chuan a zak ve deuh ani ang, a ngawi ta hle hle a. Kan haw dawn chuan ka em phur tur chu a la thla lawk a, aman a phur ta daih a. Chhuhsak ka tum chuan alo phal lova, "Ka phur ve chak alawm, khaw chhung luh dawnah i phur dawn nia" a ti ta tlat a. A ruk tak chuan Afaki lakah chuan ka inthlahrung hle a, tawngkam mei nei deuha a tawng tawh avang khan nuam ka ti lo a ni. Mahse kan boruak chu a pangngai ve leh viau tho a, Afaki chu a titi bawrh bawrh a, a khat tawkin kan nui a, a hmaa kan boruak te pawh ka theihnghilh veleh ta mai a. Afaki chu an inah a peng ta a, Hruaitea nen kan inlamah kan in zui phei hnak hnak a. Ka nu in ka em phur min lo hmuh chuan a nuih aza hle a, ka phurh ngai loh avangin ka lo phur sawi viau a ni awm e. Thingpuite kan lum a, ka nu chuan ka thing phurh vel chu kan vawk in bulah a lo remtha mawlh mawlh bawk a. Hruaitea chuan,"Afaki hi a danglam deuh i ti ve em?" A han ti chhuak phawng a, "Chutiang a awm pawh ka hrw hleinem" ngaihsam zetin ka lo ti a. A aia thutak deuh zawk chuan,"Kha chen kan lo inkawm ve tawh a, mak ka ti deuh mai mai mawle" a ti a. A sawi awmzia chu ka hre chiah lo na a kripawhin vawiin lama a tawng dan vel chu mak ka ti ve tho. Thingpuite kan in zawh chuan a haw ta a, nilai zan inkhawm hun ni mah se tunkar chiah a awm tawh dawn avangin kan in ngai ve em em a, zan lama rawn len ngei chu a tum a. Chaw kan eikhama thleng ka sil zawh chuan ka nu leh pate chu an inkhawm a, ka nau erawh a room ah computer a khel a, ka pi leh pu pawh chanchinthar an en zawh chuan an mu ve nghal mai a, a tuk maia haw an tum tawh avangin an mu hma a ni. Hruaitea chu a rawn kal har ka ti tawh hle a, kalkawng lam chu ka thlir leh dauh dauh thin a, a thawm reng a awm thei lo. Inkhawm an rawn bang ta mai lehnghal a, ka thin chu a rim urh tawh a. Atawp a tawpah ka phone ta ringawt a, vawikhat a ring quit a, ka phone chu ka khum ah ka paih tau sawk a, ka mu ta daih a. Ka muhil lo chiang kher mai, hetiang hian kan la awm ngai si lova ka na a ni. Ka lo chhing sek ni ngei tur a ni ka phone ri ral ral ah chuan ka harh zawk a, Hruaitea a lo ni. Pickup loh chu ka han tum zet na a ka muthilh theih ka rin chuan loh avangin thinrim ru teuh chuan ka han la a, kan kawtah a din reng thu leh chhuak lawk tur chuan min han ti nghal a. Ka thin a rim ve em avang chuan ka hnial a, zankhuaa min nghah a tum thu a sawi tlat avang chuan ka va chhuak ta nge nge a. Kan kawngkhar ngheng chuan a lo ding khur bauh bauh a, ka khawngaih viau rualin ka haider lui tlat thung a. Ka thinrim hmel a hmuh chuan a nui deuh sawng a, chu chuan min ti thinrim zual sauh thung a. Thutthlengah chuan kan thu a,"Kan chawei lai in ka u pum ana thut a, damdawiinah kan kal a, rin ai takin kan rei ta phian a, ka phone inah ka charge daih sia engmah pawh ka lo hrilh thei lo che a" a han ti dam thlup a. Ka thinrim tehreng nen ka nem nghal duai hi a ni mai. Chu lo rengah natna avanga chutia an buai laia lo thinrim chu nuam lo ka ti hle a,"Hruaite.. chan che ka hlau em a ni" ka sawi tum pawh ani lo, ka sawichhuak ve tawp. Chuti taka ka duh tih hriattir chu ka tum ngai miah lo, ka kut chu a la a, a kut vawt ngiai chu ka lo hum lum vang vang a. Inngheng rialin kan thu a, a khat tawkin kan in fawp leh vawng vawng thin. Zan a rei tak zel avang chuan kham lo tak chungin kan in mangtha ta a.



Hruaitea pawh Shillong lam panin a kal leh tawh a, keipawh pawl sawm ka nih ve tawh avang chuan lehkha ka zir ngawrh ve hle a. Zantin kan inbiaa, kan pahnih tan tiin theihtawpin kan zirlai chu kan zir be thin. Afaki nen chuan kan la inkawm reng a, a hma ang tak erawh chuan hun ka nei tawh lo thung. Ka pa chuan matric ka pass chuan ka duhna hmun bera awm min phalsak a, Hruaitea ka tawn hma zawng kha chuan Delhi ah ka cousin te bula awm ka tum ruh ve hle thin. Tunah erawh chuan chhan tha tak avangin Shillong ka thlang ta thung. Hun a kal bek bek a, hriat loh chhungin Krismas kan thleng veleh reng mai. Hruaitea pawh a rawn haw a, kawr nalh zet mai min rawn hawn a, ka lawm kher mai. Kumthar tir maia exam ka neih vang erawh chuan kan in zui tam thei lova, zantin reilote tal erawh a rawn lang thin. Krismas ruai theh zawh chuan kan inah min thlah a, thingpuite ka lumsak a. Kan in dawn chuan Afaki a rawn lang hlawl a,"Ka zawng nasa lutuk che u, nangni lah hi mi in thlim reng mai" a rawn ti lut a. Ka lo nui mai mai a, Hruaitea ka va melh chuan a nui hauh lova, enge a rilru ah awm tih chu ka hrethiam lo. Thingpuite kan in zawh chuan Hruaitea chuan haw a tum a, Afaki chuan rang tak hian,"Keipawh kan chhuak ange Zorini lehkha zir kan tibuai ang" a ti a. An chhuak ta a, tukverh atang chuan ka thlir zui reng a, Afaki te in bulah chuan an han ding a, engemaw an sawi a, inchhungah chuan an inzui lut a. Thian an ni a, mak ah ka ngai hran lo.




Kum alo thar a, mahni tuanna mual ah theuh kan kal darh a, Hruaitea nen pawh in ngai tak chungin kan in then leh a la tul a. Ka exam turah duhsakna sang ber min hlan chungin kan khua chu a chhuahsan leh ta. A hmaa ai mahin ka ngai a, inzui tam theilo mah ila khawkhata awm chuan thla a muang ve em em a, kar a hla leh ta vawng vawng si. Phone a kan inbiak pawh chuan ka tap leh ringawt thin a, min hnem mawlh mawlh thin. Exam pawh kan tan thuai a, a hmaa ka lo in zir lawk nasat avangin tan han lak thar vak chu ka mamawh lova, chutih rualin ka theihtawp erawh ka chhuah ve reng tho. Thla khat dawn kan exam a, tha pangngai tak chuan ka zo in ka in hria.



Hetih lai chuan kan khuaah Aizawl lama kan hmelhriat hnaivai tak U Mathana chu higher zirtirtu ah an rawn post thar ve a. Kan in hi inpui ber ah a rawn nwi nghe nghe. Amah hi tlangval la upa lo tak, MA zo fel chiaha rawn thawk a ni a. Hmai fai ving veng, tawng tam lo tak mai a ni. A rawn awm tirh atang thawm a nei lian nghal hle a, amah phei chuan ngaihzawng nghet tak Aizawl lamah a neih thu min hrilh tawh a. Mi polite tak mai hi a ni a, kan khaw nuho chuan chaweiah an in sawm chhawk ani ber. Unau ang maia ka en a ni a, ka nau hi ala chumchiap deuh hlek avangin u mipa ka awt hle thin a, ka u ang maiin ka ngai a,ka thlamuanpui ve hle a ni. Exam kan zawh atan chuan kohhran lamah ka phak tawk tawkin ka inhmang ve a. Afaki nen pawh kan inzui leh chawt tawh a, U Mathana nen kan pathum in kan in zui nasa hle. Hruaitea chu an exam zawh ah training tur a neih avangin a rawn haw lawk thei lova, lunglengin hrehawm ti viau thin mah ila kan karah min dodal tu an awm lem loh avangin harsatna dang chu kan tawk hran lo. Keimah zawk hi ka thikthu a chhiat luat ah han tih tauh zeuh zeuh chu kan nei ve a, mahse min hrethiamin kawng engkimah min dawhthei a, a thiam thu a sawi zen zen ngai lo.



Kan result a lo chhuak ve ta reng mai a, keipawh first division ah ka lo passed ve hlauh a, kan lawm kher mai. Ka pa chuan ka nu vawk vulh lai chu talhin ka thiante leh a thawhpuite bakah kan thenawm hnaivai te sawmin min lawmsak a. U Mathana pawh a tangkai hle a, ka nu leh pate hi a nu leh pa ang maiin a en ve a ni. Hruaitea pawh chuan min lawmpui hle a, a rawn haw veleh min lawmsak a tum thute a sawi a, ka rin loh tak maiin chumi a sawi tukah kan khua a rawn thleng a, mak ka tiin min surprise a tum chu a hlawhtling hle. Zanah a lo leng a, sitting room ah ka chhungte nen an inkawm a, choka ah tihfel tur ka la neih tlem chu tifelin ka awm a, ka pa chuan min ko vat a, “Hei Hruaitea pawh a lo len hi inlengte an awmbosan ngailo” a ti a.Hruaitea ka va melh chuan a lo khi vur vur a. Ka nau homework enpui turin ka nu chu an room lamah a kal a, ka pa pawh rei thu lovin a hnathawh tur chhuanlamin room lamah a kal zui nghal a. An kal veleh chuan Hruaitea chu ka bulah a rawn insawn vat a, kan in kuah vawng vawng a, ka lo thlakhlelhzia ka inhrechhuak zui nghal a. A aw dam thlapa kan hma hun kan sawidun te chu a tak(real) bik hliah hliah hian ka hre thin. Chutia kan titi mawlh mawlh lai chuan kawngka khik thawm a awm avangin kan inthlah vat a, U Mathana a lo ni. Zantina kan inleng neih anih avangin tlangnel takin a rawn lut ve a, a bialnu nen an inkar a that loh pawhin a sawina ber chu ka hnen a ni a, keipawhin chuitiang bawkin Hriuaitea nen kan inkar chu ka hrilh ve thin. Ka nu leh pa an awm loh bakah chutia inleng ka neih avang chuan rei pawh thu lovin a chhuak leh ta mai a. Hruaitea chuan fiamthu in min chhaih a, ka hmui ka tihpawrh khum a, rang takin min rawn fawp zui nghal a. Ka pass lawmna atana a thil min hawnsak chu a phawrh a, sana mawi zet mai alo ni a, ka sana bun lai chu phelh in min buntir a. Chawlh an nei lo chung chutia a rawn haw chhan chu anmahni khuaah ngei chuan kan pahnih leh Pathian hriatpuia intiamna neihpui turin a lo ni a. Zanrei tawh takah biakin lam kan pan a, kan inneih hma loh chuan sex kan hmang lovang tih chu kan intiam dun a, kan chhungte hmuh phak loha kan awm duh dawn avangin kan hmaa thil lo thleng laka kan lo in ven lawk a tul tih a sawi a, ka ngaisang kher mai.



Ka college luhna tur buaipuiin ka pa nen Hruaitea rual chuan Shillong lamah kan liam a, chutianga ka luh tumna hmasa aia ka thlang zawk chu a tirah chuan ka pa in a remti vak lova, humsual kan dai te pawh a hlau tih a sawi nghe nghe. Mahse a hnuah min rintawk thu leh ka duhna hmun tak chu a remtih thu a sawi a, ka lawm kher mai. Keipawhin ka pa thil hlauhthawn chu a awm ka tihpui a, mahse Hruaitea nen kan thutiam kha ka hrereng a, ka hlauthawng hran lo thung.



Shillong kan thlen thlak atang kar hnihna chiah a ni a, ka school luhna tur St.Anthony’s ah engkim kan tifel tawh a, chawlh chhung ala tam deuh avang chuan ka pa rualin ka haw leh hrih a, Hruaitea erawh class an tan tawh avangin a awm tlang a, Aizawl ah ka pi te bulah zanthum vela wm ka tum avangin ka pa chuan min hawsan a.Zanah chuan U Mathana’n min rawn biaa, Aizawl a ka cham tur thu ka sawi chuan a ni pawh Aizawlah a haw lai a lo ni a, a bialnu nen lo len chu an tum a. Keipawhin ka hmu chak ve reng tho, a chanchin kan sawi ngun bawk a, a takah engtiang chiah nge tih chu ka hre chak a ni. An rawn kal ta ngei a, thlalak a ka hmuh ai daihin a bialnu chu ka hmu tha a, a fel siam siam viau lehnghal. Vawikhat kan inhmuhnaa kan inkawm ve nghal bawrh bawrh thei a, U Mathana’n nula fel tak atih kha a ni tak tak anih dawn hi ka ti hial ani. Reitawkfang an len hnu chuan an haw ve taa. Room lamah ka phone ka charge avangin ka en ngal vat a, Hruaitea miscall pathum lai alo awm a, rang takin ka call back vat a. Ka inlengte chungchang ka sawi chuan a ngawi reng a, a hnu deuhah chuan,” I u chhar thar nen in inhmuh hi chuan mi pawh hi I hrechang lo thin anih ber hi” a ti nghat a. Ka inthiam chiah lo chu ka ngawi ve reng a, amah zawk chuan,”Ka tihpalh, I rilru nawm lohna tura ti kher tur che ka ni lo. I duh duh i kawmin I be thei alawm, vawiin nilengin kan la inbe silova, ka ngaih em vang che anih hi aw” a ti leh thluam a. Tha tak chuan kan inbe zo ve ta a.



Kan khua ka thlen leh hnu lawkah chuan mitthi kan lo neih vangin Afaki nen kan kal zui nghal a, lumen tur anih avangin kan hmanhmawh hran lo. Kawnah chuan nula leh tlangval an lo thukhawm deuh thap a, fiamthu an thawh a an nui leh huk thin a. Mitthi in a hnaih tawh avang chuan mawi lo ka lo ti hle a, mitthi chhungte hriat atan a nuam in ka ring chiah lo a ni. Kan kal pel dawn lai chuan hmeichhe pakaht hian Afaki chu a rawn ko a, an inbe luam a, street lai eng ah a hmel chu ka hmu thei a, ka la hmuh ngai pawh ka hre lo, a hleitlingin a hmeltha hle tih ka hre nghal mai a. Kan kalsan hnu chuan Afaki chuan,"Hruaitea bialnu hlui Nunui anih kha, an induh ve thei thin khawp a, mahse an chhungte ve ve ah remlohna a awm avangin an inthen tawp a, mahse an la inbe zeuh zeuh tho" a ti a, ka nghing deuh lawih in ka hria. Tui lo zetin ka zai ve a, kan ep chiahah Hruaitea bialnu te chu an thu lehnghal a, ka rilru chu a nuam mawlh lo. Chhuanlam siamin ka haw ta ringawt a, Afaki chuan min hawpui a tum a, ka haw thei ka tih tlat avangin min haw pui ta lova. Thuilote mahnia ka kal lai chuan ka hnung lamah min ko ri ka hria a, ka va hawi chuan U Mathana alo ni a, Aizawl atang arawn let leh chiah mitthi an lo awm avangin a rawn kal ve nghal a lo ni. Kan in thleng min thlah hnu chuan a ni chu tlaivar turin a let leh ta a. Khumah chuan ka let ka let a, namen lovin nichin lawka kan hmeichhe hmuh kha ka thik a ni. Han tihlan vak erawh tlawm ah ka la ve bawk si, zing lam khawvar dawnah chuan ka lo chhing sek a. Chawdi dawnah ka pa in min kaitho a, ka nawmsam loh thu sawiin ka tho chhuak peih ta lo. Ka ngaihtuahna chuan a chhe ber thleng a ngaihtuah a, Hruaitea chu chan mai tur ang tein ka indah chhin a, ka rilru chu a na vawng vawng a. Tlai lamah min rawn phone a, pangngai tak chuan kan inbia a, tasngpawng ngaihthat loh vak chu ho ka ti thar thut a, ka tho a ka in phih fai a, computer hmaah thuin kan chanchin te chu ka ziak leh ta malh malh a.



Class tan a hnaih tawh avangin Shillong lam panin ka liam leh tawh a. Counter ah Hruaitean min lo hmuak a, kan hostel ah min thlah leh thlap a, a hmel ka hmu chu ka hahdam huaiin ka hria. UCC ah daih a awm avangin rei pawh awm hman lovin a kal leh a, remchang hmasa berah lenchhuah tumin kan in vai liam leh ta rih a ni. Ka chhungte tel lova ka awmhran vawikjatna anih avangin ka rin ai takin ka lung a leng a. Ka chhungte chu min rawn be rih lo turin ka ti hial a ni. A rukin ka tap fova, ka nu chu ka ngai zual hle thin. Ka awm atanga thlakhatnaah chuan ka damlo vak mai a, ka that leh mai ka rin avangin ka chhungte pawh ka hrilh lova, mahse ka rim ai taka ka lo nat avangin ka pa chu ka bia a, min ngaihtuah hle. Hruaitea chu test an neih avangin ka hrilh ngam silova, ka pa ka biak tlaiah kan hostel ah chuan Hruaitea chu arawn lang hlawl a. Ka pa in ka chanchin a lo hrilh a ni awm e, ka hrilh loh avang chuan a lungawi lo hle a, ka khua a sik deuh reng avangin thinrim theih pawh ani chuang lo. Damdawiin lamah min kal pui a, min lo admit nghal a. Hruaitea chuan min awmpui chawt a, damdawiin kan luh ni chuan ka harh that theih mang loh avangin a lo hlauthawng hle a, mahse tlai lamah chuan ka harh tha ta khawp a, ka bulah thu in min vil tawp mai a ni. Ka roommate Eli chu min ruahpui tura ka lo sawm lawk tawh avangin a rawn lang ve mai a, Hruaitea erawh chuan min riahpui chu a tum nghrt bur thung a. An test neih chu a pawimawhzia ka hriat avangin min riahpui loa hostel lama let turin ka ti a, kir erawh a tum lo hle tiha awmdan atang chuan ka hria a. Ka tir lui duh ta lova, Eli chuan hostel lamah min letsan ta zawk a. Haw tura ka tihluih avanga la lungawi vak lo chuan ka bulah lehkhabu a bih ngur a, a phone a rik chuan a en zawk a, 'excuse me' tih leh pawn lam chhuah a rual a. Rei vaklo hnuah a rawn let leh a, a thiante an nih thu a sawi a, tlem chuan biak pawh a nuam leh deuh tawh. Ka chauh deuh avangin ka muhil vat a, zanlaia ka harh chuan Hruaitea pawh chu a lo muhil bam a, ka en reng a, ka ban bul lawka a phone dah chu la in ka enkual vel mai mai a. Ka hmehsual azarah call log chu ka hmetchhuak hlauh mai a, ka thil hmuh chuan mi ti phu zawk a, zantira rawn betu kha tudang nilovin Nunui ngei a ni tih ka hre ta tlat !



Ka thin chu a phu zawih zawih a ni ber, an phalna la hmasa lova mi phone en hi ka duh ngai lo, mahse en ngei ngei chu ka duh ta tlat a. Msg vel chu ka chhoar a, Nunui chuan ala hmangaih reng thu leh alo nghah reng tur thu vel a thawnna a ni a, amah chuan a chhang lo nge a delete tawh tih ka hre lo, engmah a thawnlet ve lo thung a. Zinga ka harh chuan Hruaitea chu alo tho fel tawh a, ka meng tih a hroat chuan,"Gud morning" tih pahin ka biangah min fawp zauh a, ka rizai chuan ka in lukhuh a, lehlam ka hawi hmak a, ka puan chu rawn hawn a tum a, ka lo pawtbet tlat thung a, "Enge i hriat a, i tho fuh vak lo mi, na i nei em?" A ti mawlh mawlh a, ka tah a chhuak takzet. Ka khumah chuan a rawn mu ve nghal a, ka puan chu dim tein a hawng a, ka mittui tla a hmuh chuan a hrilhhai hmel hle a, "Eli a rawn kal dawn, hostel ah let leh rawh" ka ti hmak a, "A chhan min hrilh rawh, engvanginnge ti hian i awm a?" A tih chuan,"I theihnghilh theih loh i bialnu hlui hnenah chuan i duh leh let rawh, min ngaihtuah ka ngai lo" a tawp lam chu a ri chhuak chang chang a ni. A lam hawi chuan min kuaiher a, ka mitah chiang takin min melh a, "Zorin... chu thil chu kan sawidun thei ang" a ti dam thlup a, ka ngawi reng a, amah vek chuan,"I hmangaih hmasa chu theihnghilh har i ti ve tho ang, chumi avang erawh chuan kan la duhin kan la hmangaih tihna a nilo. Min la rawn be thin tih chu ka pha hauh lo mai, mahse nangmah chiah hi ka duh che tih hria la ka duh a ni, a msg pawh i duh chuan i check vek thei ang ka chhanglet ngai lo" a ti a. Dawt sawi hmel reng a pu lo," Mahse nizanah pawh..." ka tih lai chuan alo pawt chat vat a,"Um.. min rawn call ngei alawm, mahse min rawn tibuai tawh lo tura ka hrilh duh vang chauha lo chhang ka nih kha" a ti a. Chawplehchilhin ka ring nghal hmiah a, dawt a sawiin ka ring thei lo a ni.



Damdawiin atang kan chhuak a, a putea te happy valley a awm te inah min lenpui a, an fel hle a a pitei pawh la naupang ve tak a niin ka ring. Chawei turin min ti lui tlat a, chawhnu atang chuan ruah a sur cherh cherh reng a, len kan tum pawh kan thulh ta ringawt a. Chaw kan ei dawn lai phei chuan a sur tam viau tawh a, a putea chuan riak mai turin min ti a, han hnial vak dawn pawhin hnial theih anih tak loh avang chuan riah chu kan tum ta a. Mikhual room ah chuan ka mu a, Hruaitea erawh sitting room thutthlengah a mu thung. A chhungte chu an mu fel tawh tih ah ka room lam chu a rawn pan duk duk a, "Ka lo mu ve mai dawn.. a vawt rap ka mu lum zo lo" a ti a, "Ngai lo, ka duhlo" ka tih pawh chuan a rawn in thawlh nghal kuk a, ka hmel a hmuh chuan ka hlauthawng tih a hria a ni ang, a nui suk a,"Lungngai suh, kan thutiam kha ka la hrereng alawm" a ti a. Lai deuh tak chuan,"A... chutiang lam pawh ani lo" ka ti ve tawp a, ka mu ta a. Muhil lo chuan kan titi mai mai a,"Ti hian innei tawh ni ila ka ti e" a ti a, min kuah zui nghal a, amah vek chuan,"Ka graduate veleh innei mai ang" a han ti leh a, "Thawhchhuah i neih loh te chuan engtinnge kan awm ang?" Ka ti a, "A ni tho a, mahse ka neih hnuah che pawh hna te chu ka zawng mai ang, midangin min neih khalh ang che ti ka hlau alawm" a ti a. Ka nui ver ver a,"Nge i nuih a? I graduate ve kher pawh a ngai lo, ka graduate chuan class 12 ilo pass tawh anga, i duh leh kan inneih hnuah BA te chu private pawhin i ti mai anga ni mai" a ti a. Ka chhang tawh lo, ka maimitchhing tlat a, keipawh hian midang tan ka phal lo a, ka ta chauh ni se ka duh a ni. Ka hmui a rawn fawp zeu a,"I muhil tawh a mi?" Ka meng a, ka va melh a, nui sen sen chung chuan min rawn fawp ta vawng vawng a.



Hostel lamah keipawh ka let leh tawh a, lehkha zir ka induhthawh ve tan viau tawh a, Hruaitea nen pawh kan inhmu zen zen thei lo. Phone ah erawh kan inbe ve reng tho a, kan exam laiin vawihnih min hmu turin a rawn kal a. Kan exam zawh tlaiah a rawn kal leh a, khuaah haw a tum thu leh rawn chhuk leh vat a tum thu min rawn hrilh a. Exam chawlh kan nei ve dawn loh avangin ka haw thei ve dawn lo a ni. Tluang takin exam ka zova, Hruaitea pawh khuaah a awm tawh a. Kan inbe ve reng a, a tum aia rei awm a ngaih tur thu a sawi chuan ka lo huphurh viau a. Mahse thlathar bak chawlh an neih loh avangin a rei tak a awm tawh dawn lo tih ka hria a, ka hlim viau tho. Afaki nen pawh a khat tawkin kan inbe ve reng a, kan khaw chanchin te a rawn sawi thin a, Nunui pawh Aizawl mi hausa fapa in a ruk thu te a rawn sawi a, a hlim hmel viau a. Chutiang chuan kan boruak pawh a tha ve zel ah ka ngai a ni. Zankhat chu ka nu call ka dawng a, ka pa chu office a awmlai a luhai a tlu tawp a, Aizawl ah an phur a, ICU ah an dah tih min rawn hrilh a, ka mangang lutuk chu mu leh mal pawh ka ni lo. Ka roommate chuan ticket engkim min buaipui a, counter ah min dah thlap a, driver bulah ka chancjin te hrilhin a theih chuan kawng laka chawl vakloa tlan turin a ngen a. Tluang takin kan kal a, chawei chhung leh zun ram thiar tih loh ah chuan kan tlan par par a, zing dar 6 ah Aizawl kan lut a. In lamah pawh kal hmasa lovin damdawiin ka pan ding nghal a, ka nu chuan min lo hmuak a kan inhmuh chuan kan tap dun hawm hawm a. Ka pa chu a la harh chhuak thei lo tih min hrilh chuan hlauhthawnna in ka khat. Ka pa hi awm ta lo se.. ka ngaihtuahzui ngam lo.



Kan driver chuan in lamah min hruai a, ka inbual a, chawte ka eikham chuan damdawiin lamah bawk kan kir leh a, Hruaitea pawh kan chanchin a tira ka hrilh bak chu ka hrilh ta lo. Ka rilruah thildang ka ngaihtuah thei lo. Min rawn call bik lem lova, mak chu ka ti ru ve deuh viau na a ka pa avanga ka buai em avangin ka lungawi lo hman lo a ni ber. Hospital pawnah ka thu a, ka rilruin ka tawngtai mawlh mawlh a, ka dara vuantu an awm avangin ka han meng a, U Mathana chu ka bulah a lo ding reng a, kan inbiak khat zia ka hrechhuak nghal bawk a. Keimah pawh min en lo chuan kan hmaa lirthei tlan vel chu a thlir dauh dauh a,"I pa chu a tha leh ngei ang tih ka ring tlat a ni, hlauthawng lutuk suh aw" a ti a, ka mittui chu a rawn tla leh zawih zawih a, a awm ngheng chuan ka tap ta bawrh bawrh a, min lo kuah ta hle hle a. Engtia rei nge chutia ka awm ka hre lo, ka mittui chu ka hru sul a, ka hawi chhuah chuan ka mittui karah Hruaitea ni awm tak kal liam tur chu ka hmu phe vuai a



Ka umzui nghal vat a, mahse Hruaitea hmel awm reng ka hmu lo. Ka phone ka phawrh a, ka call nghal a, a ring quit thak thak a. Beidawng zetin ka let leh a, U Mathana chuan mak tih hmel tak hian min lo en reng a, a bulah chuan ka thu hnawk a, ka phone chu ka en ta ngawt ngawt a. Ka pa harh thu ka nu in min rawn hrilh chuan rang takin kan kal nghal a, ka lawm ngei mai. Min kalsan tur anga ka ngaihtuah ringawt pawhin ka a thei takngial dawn in ka hria a, chutia biak theih a a awm tak aangin ka lawm em em a ni. Ka pa pawh a zia ve zel a, ward ah an dah tawh a, ka awmpui deuh chawt a. Ka nu in min rawn thlak ve zeuh zeuh a, ka pa hmu phak loa awm ka duh lo a, amah phei chuan ka zirna ka chawlh rei tawh avangin chhuk tawh turin min ti reng a, damdawiin chhuahsan hmaa kalsan erawh ka tum lo. Karkhat zet damdawiin lama kan awm hnuah kan chhuak ve ta a, keipawh Shillong lama let leh tumin ka inbuatsaih a. Ka kal hma zan chuan Hruaitea chu ka call leh a, a la thei ta chuang lo. Ka beidawng takzet tawh a, ka pa chanchin pawh vawikhatmah min zawt lo chu ka dem ru hle bawk. Ka pu phone chu la in ka call nawn leh ta ngat a, a ring quit tep tih ah a pickup ve ta hlawl a, engmah ka sawi thei lo, a bula hmeichhe nui ar ar chu ka thiannu Afaki ngei a ni tih ka hria, ahmaa ka biak khan Huaitea nen an inhmuh ngai loh thu kha chiang takin min hrilh si a, dawt min lo hrilh reng tihna em ni ang? Phone chu ka dah leh tawp a, ka na takzet a ni. Ka pa avanga rilru hah taka ka awmlaia chutianga ka innghahna pakhat a lo awm chu hriatthiam har ka ti a, ka tap ta hawm hawm a.



Amah avanga ka awm chakna hmun Shillong pawh chuan nawmna reng a nei ta lo, engvanga hetianga ka chunga awm nge tih ka hre lova, biak ka tum tawh lova, Afaki ka be ngai tawh hek lo. Krismas chawlh kan nei pawh chuan Aizawlah ka hmang a, pawn ka chhuak ngai lo. Ka nutei nen ba,ar lamah kan chhuak a, Israel point ah Hruaitea nen kan in hmu hlawl a, ka hamhaih zawk. A ni pawh chutia kan han inhmu thut chu mak a tih ve hmel deuh a, biak chu ka tum lo, amah zawk chuan,"Engtikahnge i rawn chhoh a?" A ti a. Tha takin ka chhang ve mai a, "Krismas rawn hman i tum em?" a tih chuan ka tum loh thu chauh ka sawi a. Sawi duh la nei ni awm tak hian a ang deuh zuai a, mahse kan kalsan ta. Ka thinlung chu a tap takmeuh a, ka lo hmangaihzia ka hriatbelh bawk a.



Ruah chu kumdang ang lo takin a tla siap siap a, hetiang huna ruah a sur ngai awm pawh ka hre lo. Pawna mi chetla vel chu ka thlir reng a, kan kawtah chuan car a rawn ding dat a, englaimaha ka theihnghilh ngai loh Hruaitea chu a lo chhuak a, ka in ring hman lo ka tlan lawk a ka va pawm ta thlawp a. A motor ah chuan min luhtir a, kan veng kawnah chhuak chho in field lamah kan let leh a, motor a luh theih loh avangin field pawnah motor chu a dah a, nihliap la chhuakin thingkung buk leih hnuai chu panin kan thu a, engvanga min be duh lo nge anih tih chu ka zawt hmasa ber a, chutah hraitchhuah nei ni awm takin a ding hluai a, a thaw ta halh halh a, "Zorin... min ngaidam rawh aw" "Engvangin maw? Enge i tihsual?" Ka lo ti vat a, "I tan ka tling tawh lo a ni" a ngaihna ka hre lo kher mai. Ka bulah chuan a rawn thu tha leh a, "Ka haw chhoh hnu khan Saitluanga u khan nupui a nei a, keini pawh kan thianho kan kal ve a, beer ka hawn kha ka keng chhuak a, tlangah khan kan in a, Saitluanga te khan a sen chi an lo keng tel a, ka in ngai loh avangin k tem ve chhin chak tlat a...ka tihsual lian ber a ni" a kun ngaih a, chutah muangchangin min en a, hnuai lam a bih leh a,"Afaki hian min ngaizawng tih chu i hre chiah lo maithei" mak ka ti lutuk chu ka ang phuau ringawt a,"Chance alo zawng ve ran alo ni a, ka rui ka haw ngam lo kha an inah min hruai haw a... tum loh dduhin kan chesual ta a ni. Hmuh chu sawi loh biak takngial pawh ka be ngam tawh lo che a, mahse ka ngai thin takzet che a ni" ka melh ngai chu ka melh reng a, awih har ka ti. Chuvang alo nih chiah hi mak sak taka alo awm fo ka ti rilru a. Ka thiannu tia ka lo chhal berin ka hmangaih ber min lo chuhpui chu mak ka ti a, na ka ti a ni. "Ka ngaidam thei ngai lovang che" ka phun sap a, ka mittui chu a rawn tla ta zawih a, "Ni e, min ngaihdam theih hi ka ring lo a ni... " a ti a. A ding ta hluai a, "Kan inthen dan hi a lungchhiatthlak ka ti, ka thiam loh vek a ni. I pa damdawiin a awmlai khan ka rawn kal a, Mathana tanga bei chunga i tah khan ka natzia ka sawifiah zo lo, mahse kha aia na khan i awm dawn tih ka hriatthiam phah thung" a ti leh a. Ni e khami ni a ka hmuh kha ka mitvai mai alo ni lo, amah Hruaitea ngei a ni. Mahse kan inkarah thil thleng a tam tawh lutuk, "Kan inthen hi a tha ber chu a ni tawh, ka hmangaih loh vang che anilo tih erawh min hriatsak rawh aw.." a mittui chu a kutin a hru a, a nihliap kenlai chu min pe a, ruahsur hnuaiah chuan a kal ta. Kal lo tura chelh din chu ka duh ngawih ngawih a, mahse tlawmthlak ka ti ngawih ngawih bawk si.



Thinlung kehsawm leh rilru na takin ka hun ka hman a, ka pasal atana ka lo thlan tawh, ka innghahna chu a tliak zo ta. Chutiang kara lehkha zir chu a har takmeuh a ni, exam hnaih tawh avang erawh chuan zir lo thei ka ni si lo. Ka chhang ve thei tawk tawk a ni ber e, ka chhan that leh that loh pawh ka hre lo. A tawp atawpah chuan ka tlingtla ve thei ta hram a, ka in ziak pass ve em ang chu maw! Haw chakna pawh ka nei tawh hek lo. Vawi tamtak Hruaitea nena kan inkar chu ka ngaihtuah a, ka then hlen thei takmeuh angem tih chu ka in zawt fo thin. A chang chuan ka chunga a thil tihsual te chu ka ngaidam a, a changin ngaihdam theih a niin ka hre lo leh thin.



Nikhat chu Police bazar lamah kan chhuak a, haw kan tum avangin ka thiannu nen chuan kam bazar ve nual a, UCC lama kan thiante nen kan in hmu hlawl hlawm a, Hruaitea hmel hmuh chu ka in beisei hle. Ka hmu ta mai lova, mahse a hnu deuh ah a rawn kal ve ta hnak hnak a, a hmel chu a hlim lo hliah hliah hian ka hria a. ka hmu chak em em a, ka hmu ta cheng a ka hlim phah chuang hauh lo. Ward's lake ah kal ang u an ti a, ka thiannu nen chuan min sawm lui ve tlat a, ka thiannu bialpa ve deuh a awm ve avang chuan ka thiannu pawh chuan kal alo duh ve mai a, kan kal ve ta nge nge a. Lawnga chuan an tih chuan ka peih ve lova, lo nghah pahin mi che vel chu ka thlir mai mai a. Ka bulah chuan Hruaitea chu a rawn thu a, ngawi renga reife kan thut hnu chuan,"Ka ngai thin khawp mai che" a rawn ti chhuak phawng a, chhang lem lo chuan ka lo nui huk a, "Zorin.." "umm.." ka lo ti vat a "Hun hi pawh kir theih nise ka ti. Kan hlimdun em em lai te khan kha aia nasa khan i hlimna turin ka bei ang" "Mahse a theih tawh si lova" ka ti a, "Min ngaidam turin ka beisei ngam lo che, hlim takin awm la tih hi ka duh ber a ni" a tho a, kal a tum ta a, kumkhua atana inthen turin min kalsan a tum ta. Ka ding ve ta hluai a, "I tellova ka hlim theih i ring em ni misualpa... " ka hnuk a ulh teuh a, "Min kalsan suh" a ding chat a, a rawn hawi let a, min rawn pan hnai a, kan in pawm ta vawng vawng a. Ka hmangaih ber kumkhuaa kal tir aia chuan a vawikhat tihsual chu ngaihdam mai ka thlang ta zawk. Hmangaihna hian thil a va lo ti thei em! Ka mittui chu a hru a, "Ka tisual nawn tawh ngai lovang, min ngaihdam avang hian ka inchhir tir ngai lo bawk ang che" a ti a. Ni e, mihringte hi zawng thil ti sual thei kan ni miau a.



Ka haw tum ni pawh sawnin Hruaitea chu ka nghak a, haw rual turin ticket pawh kan tifel ta a. Nun thara bul tan tumin Shillong chhuahsanin Aizawl lam chu kan pan ta vang vang a. Ka pa hriselna a that loh avangin Aizawl lamah an post leh tawh a, Hruaitea pawh an khua ah haw mai lovin Aizawl ah chuan a cham ve ta reng a. Kan hma hun tur te kan ngaihtuah ve nasa hle thin. Zankhat a rawn leng chu a pa in a rawn phone a, an inbe rei hle a, arang a ranga haw turin alo ti a lo ni. A chhan kan hre lo sun hle a, an remtihnaa la cham kha ani a, chutia hmanhmawh tak a an rawn chah leh chu kan ngaih a tha lo hle. A tukah chuan a haw ta nge nge a, chanchin inhrilh zel turin kan ti a, kan in vai liam ta lawp lawp a. A thlen in min rawn bia a, chhungkaw inhmuhkhawm a ngaih thu sawiin zan lamah chuan min rawn be thei lo maithei tih a sawi bawk a. An menrei ka rin avangin min rawn biak leh pawh ring lovin ka mu ta vat a. Chhun lama ka chauh deuh avangin ka mu tui nghal hle. Zanlaiah ka phone a rawn ri a, ka harh chu ka thin chu a phu hlawp hlawp a, a chhan pawh ka hre lo,k phone chu ka en vat a Hruaitea alo ni a. K pickup hma in a tawp a, call back ka tum lai takin amah chuan a rawn ti leh , 'naktukah ka rasn kal dawn, thil sawidun ngai kan nei' a ti a. Ngaihthat lohna pash nei lovin kan in biakna chu k titawp a,ka muhil lwh nghal bawrh bawrh a.



A sawi ang tak tak chuan a tuk zanah kan inah a rawn lang nghal zat a, a hmel chu a thutak viau lehnghal. Hetianga a hmel a awm hian ka ngaina lo a, boruak tha lo awm turah ka ngai tlat thin. Ka chhungte mut hnu chuan a haw chhan te chu ka zawt a, ngawi rengin thlan lam veranda ah a chhuak thla a a thu ta daih a. Ka zui ve zel a, kan boruak uap churh chu hahthlak ka ti, "Zorin... ka thilsual tih chuan min umzui ta zel a nih hi" beidawn hmel zet chuan a ti a, "Enge i thusawi chu a awmzia?" Ka ti chuai raih a, "Afaki kha a lo rai a alo zep char char a, mahse zep rual lovin a langchhuak ta si a, sawn man an lo dil a, ka pa in a tu lo piang tur tih fahrah a phal loh avangin an pe lova, keimahmin chan haw chhan pawh kha a ni a, kan inneih vat tul a tih leh palai kal dan tur chungchangah a lo ni a. Zorin... i lakah hian la inthlahrung ngawih ngawih.. ka zak bawk a ni" a ti a, a mittui chu a biangah a luang thla ngiai a, ka khawngaih kher mai, ka rilru pah a na takzet, mahse keimah lam ka inngaihtuah hman lo. Hruaitea tana a hrehawm turzia chu ka ngaihtuah thleng ve vek a, "Hawh.. tlan daih ang" a tih chuan inngaihtuah fim lova zui ve mai pawh ka duh hial a, mahse thil theih a ni silo. Kan hlim veleh tan dawn chauh a, kan chunga thleng tura kan duh ngai loh chu a lo thleng mek zawk si, "Hruaite ka damchhungin ka hmangaih reng tawh ang che, mahse... i fa lo piang tur hi kan ti fahrah thei lo ang" ka tah chu a chhuak takzet a, "Afaki pawh chu i nei ngei tur a ni" ka han ti leh a. Kan rilru natna te chu in hrethiam tawn takin kan ngawi dun vang vang a, ka kut chu la in a hmer ta vawng vawng a, "Ka thil tihsual vawikhat avangin inchhir reng rengin hun ka hmang kumkhua tawh dawn a nih hi" a ti a. Engtikahmah ka fawh theih ngai tawh loh tur a hmui chu ka han fawp zeuh a, ka biangah dawmin min lo fawp let vawng vawng a. A haw tur chu ka thlah a, gate bulah ah kan ding reng a, inthen chu kan hreh a ni. Kan in pawm leh vawng vawng thin a, ka mumang ni mai se ka va ti em! "Tlan daih mai ang" a han ti nawn leh a, kan mittui chu a tla zawih zawih a, ka han zui thuak thuak a, mahse rilru fim chu ka pu leh vat a, kumkhua atan tiin kan in mangtha ta zawk a.



Hruaitea leh Afaki pawh an innei tawh tih ka hria a, fapa duhawm zet an nei tih ka hria a, ka lawmpui hle. Mahse kei ve thung hi khawhar leh rilru na reng rengin hun ka hmang a, tlan daih ang tia min sawm laia ka lo zui lo te kha ka inchhir fo thin. Mahse pawi sawilo naupang lo piang tur chu a pa ka lak sak thei si lo. Pawl sawmpahnih ka passed tuma ka mittui tlak hnem zia te kha! Hruaitean ka pass veleh kan innei an atih te kha ka hrechhuak a, engtikahmah chu chu alo thleng ve dawn ta silo. Ka sikul kal pui thinte nen Aizawla kan inhmuh tum chuan Hruaitea chu a khawngaihthlak lutuk, a hlim lo si, an nu ah hian a bet ngang lo tih an sawi te chuan hrehawm ka lo ti ru ve em em a, mahse khuareiah fate nu na na na zawng ala duh chho ve zelin ka ring a.



Kum nga lai alo liam ve tawh a, nula puitling tak ka ni ve tawh. Ka phak tawk hna pawh ka hmu ve tawh a, chutih rualin ka thinlung ruak erawh hnawhkhattu an la awm lo. Bazar lamah chakkhai lam tura ka kal tum in Hruaitea nen kan inhmu hlawl a, an nu pawh a tel nghe nghe a. A hmel hlim lo ngawih ngawih tih hriat lutuk chuan min ti na takmeuh a ni. An fapa chu a hmeltha hle mai, Afakin min hmuh chuan a inthiam loh hmel em em a, min melh tha ngam lo. Chutia hmangaih hmasak ber leh la awmchhun ka han hmu leh chu ka rilru a thar hle a, in ka thlen chuan ka room ka pan ding nghal a, khumah thu in engtikahmah ka theihnghilh theih tawh loh tur kan nunhlui ngaihtuah chung chuan ka tap ta zawih zawih a...