Wednesday, 20 May 2015

-FAHRAH NUN-



-FAHRAH NUN-

Peki Fanai



Engtin nge bul ka tan ang?Ka chanchin ngaihnawmlo zet hi in hriat ve atan ka duh rualin in awihloh hialte pawh ka ring.Mahse engtin pawh lo ngai ula ka dem hauhlo ang che u.


Kan khua hi la lianlo ve tak kan ni ve a,mahse khaw lungrual leh inhrechiang tawn tak kan ni ve thin.Keini chhungkua pawh harsa takin chu khuaah chuan kan inbengbel vea,keini chhung hi member 5 niin,unau 3 zinga a naupang ber leh hmeichhe awmchhun ka nia,min duat ve thin hle ani.Rethei hle mahila kan hlim ve thin asin.Ka pa leh ka u mipa te pahnih chuan nitin Lo lam hna an thawk a,ka nu hian chawhmeh leh thildang ilo a zuar a,kei erawh In min nghahtir thung thin.Hetihlai hian kum 16 mi choh ka la ni a,tlangval inleng pawh neih min la phal ngailoa,thenrual pawh ka kawm ve vak ngailo.Ka unaute nen kan inkawmngeih a,kan chhungkua kan in ngainat avang hrim hrim hian midang mamawhna ka nei ngailo kati ngam.


Inchhungah chuan ka pangchang em em a,ka duhdan a ka awmloh chuan emaw ka thil duh min tihsak loh anih chuan ka nuar chiam a,tlanbo ah te ka vau thin.Ka kawlh em avang hian leh an farnu neihchhun ka nih avang bawk hian min hlau thiam a,min duatin ka duhzawng chu min tihsak ngei ngei pawh an tum thin.Chutiang bawkin ka nu leh pate pawhin an fanu mal ngawih ngawih ka nih avang hian min ngaihsakin min duat thei hle bawk.Chhungkaw hlim,inlungrual,tangrual leh inhlauthiam tawn tak kha kan va ni chiang tak em!Mahse khawvel hi chu kan kumhlunna tur aniloa,englaipawhin a hlim theih siloh!


Ka kum 17na ka hmang mek tih hian nikhat chu ka pa leh ka u te ramkal chu an rawn damlo haw vak maia,tin hetihlai hi fur ruahtui tamlai anih avangin khawsik serh serh te a tam hrim hrim a.Karkhat hnuah ka u te chu an dam mai a,hna pawh an thawk leh thei mai,ka pa erawh a zual zel thung.Thla khat lai kan theìhtawpa kan enkawl hnuah pawh awmzia a awm lemlo khawp mai.Nitin a chau tial tiala,thla khat leh chanve zet a nat hnuah phei chuan min peihloh san ta ani.


Ka pa a boral hnu chuan kan inchhung chu a rehin ka khuahar sawt a.Ka nu pawhin awmngaihna a hrelo ani ber mai.A tap deuh reng bawk a,khawharna namenloin kan chhungkua chu min tuam hlup hlup a,hrehawm tak ani ringawt.Kapa boral atanga kumkhat liam hnuah chuan kan upa ber pawhin kan khaw nula chu nupuiah neiin tiam tlat e ati ve ta a.Chutianga kan inchhunga mo hmel te kan han hmuh chuan tlemin kan hlim veleh deuh a,fa pakhat an neih hnu phei chuan khawhar a hnemin kan naute chuan mi ati hlim ve thin khawp mai.


Hun leh kum te a liam zel a,ka u pakhat zawk pawhin nupui anei veleh a,he ka u nupui neih kum hian ka nu chu insawisel na anei ta fo maia.Nitin a atih thin thil zawrh pawh ati tha peih ta meuhloa,ka ute pahnih thawh choh chu kan ring si a,kan harsa sawt khawp mai.Tin,hetihlai mek hian ka ute pahnih chu an zia a danglam sawt hle tih ka hrethiam a,a chang phei chuan an awmpui satliah ang mai te a min en chang an nei ta zoh zoh bawk.An nupuite lah kan khuaah pawh awmthei pawl,an nulat lai pawh a kei kani inti ve chin deuh annia,han that vak ngaihna a awm biklo.An bula awm chu a hahthlak tulh tulh a,hetihlai pawh hian ka nu avang choh a la khawsa ve mai mai ka ni ber.Thawhchhuah ka neih ve loh avang chuan ka tan a hrehawmin a hahthlak a,ka chep tulh tulh ti ila a fiah ber awm e.


Nikhat chu ka damchhunga ka theihnghilh tawh loh tur thil ka tawng ta a.Chaw ei turin kan insiam sang sang a,kut ka sil lai hian kan upa ber chuan "Dinsangi pawh nula ini ve tawh a,awm mai mai tur ini tawhlo,sum thawkchhuak turin khawpui lamah te hian kal ve la a tha ang"a rawn ti ta khauh a.Chuveleh ka kut sil lai chu ka tawp hmak a.Kanu chuan"ekhai mama,i nau hi chu in farnu neihchhun ania,kan la dam tek tek chhung hi chuan kan hmuhphak loah a awm kan phal hleinem.I pa thuchah che pawh kha i hretawh lo emni?In nau hi chu phut reng reng suh u" a rawn tih chuan ka u chu a thinrim hmel hlea,vin fahran hian "Kan damchhungin kan chawm dawn tihna mi?Kei chu ani tan hian hna ka thawklo,engmah ati ve dawnlo anih chuan ka thawk tawh bik lo ang.chu chu nimai" ati ta zek a.Ka rilru a nain,ka thinrim hlea,hetiang hian ani maw ka unaute hian ka chungah rilru an lo put a?Khawvela unau zawng zawngte hi hetiang annih chuan unau neih hian hlutna avan nei awmlo ve.Min huphurh tih chu a hriat ta khawp.


Chaw pawh eilo in ka tlanchhuak a,Lo lamah ka kal zela,thlamah chuan kalo insumna zawng zawng chu bunruakin ka tap ta hawm hawm mai a."Pa,ka van ngai tak che em! La dam la chuan hetiang hian ka chungah anti miahlo tur asin.Lo kir leh rawh pa,ka ngai takzet che ani.Ka awmdan hi a hrehawm emai" tìin nileng deuhthaw in ka tap a.Ka tah zawh hnuah pawh thlamah chuan kalo muhil veng veng a,ka han harh leh meuh chuan khua alo thim thiap tawh a.Ka han hawi vel a,ka awmna chu ram(lo)reh tak ania,ramriak an awm miahloh avangin a reh hian a reh tlawk tlawk a,tlem chuan hlauhna hian min rawn tham ve ar ar a,mahse ka luhlulna chuan chutiang lampang chu min ngaihtuah thui tir duhlo.


Kan chhungkaw khawsak d an vel kalo ngaihtuah ngut ngut lai chuan thlam chhak atanga patling rual tawng nawk nawk thawm chuan min tiharh zawk a.

Ngawi rengin ka ngaithlaa,tute nge annih a,eng nge tih an tum tih ka hriat siloh avang chuan ka hlau deuh a,ka tha pawh a khur nasa kher mai.Minute 10 hnu velah chuan meichher nen thlamah chuan an rawn lut ta khup khup maia! Ka phu nasa kher.An hmel ka hmuh chuan min zawngtute anni tih ka hrethiam nghal a,ka thaw huai nghe nghe."E,hetah ilo awmdaih vang anih hi,iva huai reng reng vea,i chhungten an ngaihtuah tawh lutuk che,min zuila,haw vat ang u"an rawn ti lung lung a.Haw chu huphurh hle mahila a tul miau bawk si.Tichuan phurlo fahranin ka zui haw ta a.


Inchhung ka lut chiah,ka u chuan ka biangah min beng nghal thuai a.Chutihrual chuan ka nu alo te tuarh bawk."Hmeichhia te te,titau chungin min nawr tum reng reng suh,hetia i a awm vel vang hian i laka kan awmdan a danglam dawn chuanglo,kan sual tulh tulh ang,hre rawh.Ve khanglang che hian"tiin pindanah min nawrlut a."Mu hmak la,engmah rawn sawi ve suh ang che,mu hmak rawh"tiin min chhuahsan nghal a.Ka lungchhe lutuk chu tah chiam ka duh a,mahse ka mittui farkhat pawh a tla eihlo.Ngawirengin ka mu a,ka muhil ve ta maia.


Chu thil thlen hnu atang phei chuan kan inchhungah hian ka chepin ka rethei tulh tulh a,ka unaute chuan min zahderna eih an neiloa,a tul chuan khawlaiah pawh tawngkam chhe tinrengin min ankhum duh a,ka tan khawvel chu a hrehawmin a nunrawng sawt hle ani.Kanu lah a zual tulh tulh a,reiloteah min kalsan veleh mai bawk si.Kanu boral atang phei hi chuan fahrah diktak kalo ni ta a.Ka tih dik rengah pawh kati dik ngailoa,ka thiam ve na ngawih ngawihah pawh thiamloh chantir ka ni thin.Ka unaute mai nilo,an nupuite pawhin min diriamin,min hmusit hlea,min zahderna chhete mah annei hek lo. 


Ka unaute tan chuan chhiahhlawh diktak ka ni,an tih duhloh leh peihloh apiang ka tih alo tul a,keiin hah taka ka thawh lai hian an nupuite erawh an mu a,anihloh pawhin an leng mai mai thin.Ka thusawi engahmah an ngailoa,an thusawi erawh a kawi a ngila ka zawm angai leh thin si.An thu chu vawikhat pawh ka hnial anih chuan vawikhat tal kut min thlak lo hian a tu amah chu an awm ngailo.Hei hi chu hrehawm bultanna choh ala ni.

Kan khuaah chuan vawikhat chu nupui sun tawh pathlawi pakhat hi Aizawl atang palaiin a thiante nen an rawn zin a.Amah chu zirtirtu hnathawk ania,fa pahnih anei tawh bawk.Ka u te nem chuan vanduaithlak takin an lo inkawmnel hlauh maia,kan inah te pawh a rawn leng ve ta fo mai anih chu.A hmel leh a mizia reng reng chu ka ngainat chi anih lemloh avangin biak pawh ka be ngailo.


Zankhat pawh alo leng leh a,chumi zan chuan min be vei luam lehnghala.Ka chhan duhloh vaih chuan a hnuah ka tuar leh nasa dawn tih ka hriatchian em avang chuan ka chhang hram hram zel ani.A haw hnuah ka ute chuan "Dinsangi pawh naupangchhia ini tawhloa,pasal te hi nei ve tawh mai rawh.Tunlaiah pasal tha hmuh a har a,tun ami ang ngat phei kha chu sorkar hnathawk ania,khawiah nang hian kha aia tha kha i hmuh dawnloh avangin ani kha itan a tha ber ang.Ani pawhin a iai lo che tih a hriat a,alo len leh hunah kanlo sawifel dawn nia"ati ta mai a! Chhan ngaihna pawh ka hrelo.Ka tanghma ngai ang deuh hian in awm a,in sum duh vang mai mai kati rilru neuh neuh a.Engmah pawh sawilo in pindanah ka luhsan ta hmak a.Chu mihring lah chu a cham rei phian lehnghal a.A rawn leng tluk tluk reng mai bawk si.Ka ute ho nen chuan an inbetha tulh tulh a,an inrem em em mai lehnghal.Luak anti chhuak takzet ani.

Thla khat lai an cham hnuah an haw ve ta a.ka thaw huai hman.Mahse thlakhat pawh a liam hmain palai hmel kan hmu ta mai a.Ka pasal tur chu nimahse ka duhdan leh ka rilru engmah sawithei ka niloa,ngawih reng chu ka chantawk ani.Hreh eng ang mahila pasal chu ka neih angai ta si a,vawikhat nulat ve manah mahni duhzawng pawh neilo in ka mi ngainat chi pawh nimiahlo lehnghal ka neia,rilru chu ana ani.Hreh tak chungin pasal nei tur chuan kan khua chu ka chhuahsan ta a. Vawikhat khua ka chhuahsanna ania,kan inchhung kha hrehawm viau mahse ka ngai ve vawng vawng tho mai.Atirah chuan ka pasal chu a tha in a fel em em a,mipawh a ngaihsak hluau hluau khawp mai.Ninawm khawpin min care! Ka hmangaih leh ka mipa duhzawng pasal a nei ka nihloh avang hian nupa nun pawh ka hmanpui lawk theiloa,anihna takah chuan ka tui hlawllo alwm.I chanah han dah ve teh,ka awmdan tur chu i hriatthiam mai ka ring.Mahse nupa ni ve ta chu chutiang ringawt chu alo ni theiloa,thla 5 kan inneih hnu chuan ka ruaklo tih ka hre ta a.Ka pasal chhungte hi mifel tak an lo ni lemloa,a fate pahnih nen erawh kan inmil phian mai.


Nau ka pai tih an hriat hnuah pawh chuan ngaihsakna tha ka dawngloa,ui chuang ang mai ka ni.Ka pasal lah chuan a zia a chhuah tan a,hna atanga alo haw apiangin a rawn rui haw ta fo a,atirah chuan rui mahse min duata,engmah buaina a awmlo.Mahse nitin zantin zu in a taksa chiah takah chuan a sual sawt hlea,ka tan pawh a hahthlak sawt khawp mai.



Zan khat pawh tlai takah hian rui zetin a rawn haw a,kei chu ka nawmsam vak loh avangin kalo la meng a,pawr fahran hian "mu ang!" khum lam chu hreh zet hian ka pan a.Mumallo zet a alo mu kawisawi nuaih chu siamtha chung hian "ilo haw tlai thei leh lutuk,ka tan a nuam lo ania"katih chuan thawklehkhatah ka samah chuan a rawn tham thut a,"khanglang che chuan,nang mi fahrah hian ka zilh e te min tia maw?zak chai lo mi a?Ngawi reng khan mu rawh,he in a ila awm ve duh anih chuan ngawi ngam ang che" min ti ta zek a.Ka thin chu a rim takzet.Mahse ka chhang anih vaih chuan buaina liantham zawk a thleng ngei dawn si a,ngawih mai chu ka tan a tha ani.Diktak chuan a bula khawsak hi ka thlahlel viau emaw ati emni aw? Ka thin hi a rim a,a chhungte chungah pawh ka lungawilo takzet,mahse sawi kher ka tumlo.


Khami zan atang khan zantin deuhthaw kan zuruipa chuan kut min thlaka,anchhe tinreng min lawh bawk a,eng ang pawn min sawisa mahse a chhungte chuan engman anti ngailo.Hrelo ang hmiahin an awm thin.Ka hrehawmna,natna,lungngaih thlaphanna zawng zawng chu a rukin ka tuar a,han insawi thawvenna tur thiantha pakhat te mah ka nei bawk silo.A rukin ka tap a,ka tan hlimni hi a awm ve ngai dawnlo anih hi.Nie,a awm ngailo,ka pa boral hnu atang khan kumtin hian ka hringnun kawng hi a pikin a thim tial tial a,pasalte ka neih hun chuan a reh ve tawh ang tia ka beiseina chu engmah lo maiah a chang leh a,khuanu'n ka tana a ruat dan hi mak katia,hetiang em em tuar tur hian eng pawi nge ka sawi a,eng pawi nge ka khawih ka hre silo.Mi vanduai diktak chu kalo ni.


Zankhat phei chu rui fahran hian a rawn haw leh a,chumi zan chuan tih lungawi hram hram ka tum a,tawng pawh ka tawnglo min biakloh chuan.Mahse vanduaina a kaltluang ani ngei ang.Chaw a eikham hnu chuan ka bulah a rawn thu a,chutihlai chuan anu leh pa leh a fate pawh t.v enin kan bulah chuan an awm thap a.

Chutah kan zuruipa chuan "vawiin eng nge ilo tih"min ti chuar chuar a.Kei chuan ka insuk thu ka hrilh a.A ngawi leh vang vang a.Chutah le,ka inrin hman hmain min kek ta lawp maia.Hemi tum hi chuan ka insum thei ta biklo,thinrim zet hian "min thlah teh,i duh duh huna kut i thlak tur hi ka ni miahlo ania,nang zurui kut thak hnawihna tur ka ni lo,min thlah vat rawh "kati ve a,chu chu a haw kher mai."Khanglang chuan,nang fahrahnu,tih pah hian min kek na sauh a,min beng pawp pawp bawk a,pindan lamah min hnuklut a,ka hlauthawng tawh kher mai.Khumah chuan min theh thal thuai a,ka samah rawn kek lehnghalin "khati khan ka chhungte hriat laiin min ti vei amaw? Ngawi tak rawh,i châk lo ang zawngi"ti chung chuan min kek thoa,chhuatah chuan min nemthlu leh tawp a,ka insiamthat hmain min rawn chhir zui bawk,"i unauten min tihluih nasat em avanga nei mai mai che ka nih hi hre rawh,ve mai mai che chuan,engtinpawh ti che ila tuman an rawn chhan lovang che,i hria maw uicho fahrahnu!" ti chung chuan min chhir zawt zawt a.Kei chu ka nat em avangin ka che theilo,ka tap dawn a ka tap hleitheilo.Ka hnang lek lek a,chutia anchhe tinreng nena min ankhum pah chuan ka pumah chuan dimna tel map lo hian a rawn pet ta pawp mai anih chu! Awi ana lutuk! Ka mit sulh a,ka khawhmuh pawh a phe ruai,ka rak thawt bawk a,a bak chu ka pa (ama pa zawk)pindana a rawn lut lai chu ka hmuh hnuhnung ber leh ka hriat tawp ber ani.


Ka harhchhuah leh chuan damdawiin khumah ka mu tawh a.Chiang vaklo hian ka bula awmte chu ka hmu thei a.Maktak maiin ka unaupa chu alo awm ve reng a."Ilo harh ta maw?" tiin ka pasal pa chuan min lo be vat a.Thawh kan mai ka tum chu ka che thei manglo.Ka taksa chu a na chhuak vek a,a awm ve lutuk.Kut ka tuar nasa em ani."La che vak suh,i taksa ala chak lo ania"tiin nurse chuan min lo hrilh vat a.Zawimuangin ka bula mite chu ka enkual leh phawt a,ka chhing leh ta riai riai a.Ka harhchhuah leh chuan tlai lam alo ni tawh a,ka ril pawh a tam tawh khawp mai.Chu hmun atanga chhuah vat vat chu ka chak ber a,damdawiin hi ka ngaina thlawtlo.Zanah chuan ka unaupa chuan min riahpui a."I pasal pawh police in an kawl a,nangpawh kan bulah i awm hrih dawn nia"min tih chuan an hmingthat nan anti ve mai mai tih ka hria.Diktak chuan an bula awm tur hian min duh ngailo tih chu kei baka hrechiang an awmlo.

Tichuan karkhat hnuah damdawiin chu chhuahsanin kan khaw lam chu kan pan ta ani.Heta kalo sawihmaih chu ka nau ka chhiat thu hi ani.Min hrilh tirh chuan na ka ti ve khawp mai.Mahse ka duhtak fa pawh aniloa,chubakah a lo piangchhuak anih pawhin a nuamsa dawn chuanglo tih ka hriatin ka thawveng ta hawk zawk a.

Kan khua ka awm leh hnu chuan ka pasal nunrawng tak kha ka ngaihtuah ve reuh reuh thin a.Jail atanga chhuak tawh tihte kalo hre ve a.Mahse a nun a sim hma loh chuan neih leh pawh ka tumlo bur.Mahse thilmak tak alo thleng leh ta! Nikhat chu ka u te chuan "i pasal pawhin a nun a sim tawh a,a rawn ko leh bawk che a, i haw leh mai aniang chu"min ti thut mai a.Kei chuan ka hnial nasa,hreh takte in ka hreh ani.Ka hnial nat poh leh ka chhuntge chu tawh an khirh a,ka chungah chuan an sual leh tan a..



An tawngkam pawh a chhe leh sawt khawp mai.Nitinin an mi diriamna leh hmuhsitna tawngkam chu ka dawng leh ta a.Ka khawvel ve hi a zimin ka duhdan a awm ve tur hian dikna ka neiloa,tihtheih reng reng ka neilo.A rukin ka tuar a,ka tap a,ka na vawng vawng a,hnemtu ka nei ngai heklo.Ka pa ka ngaia,ka nu pawh ka ngai vawng vawng.An thlarau tal chuan min tawrhpui ve ka beisei ani.


Tichuan hreh tak chung chuan ka pasal bulah bawk chuan ka kal leh ta a.Ka haw leh hnu phei hi chuan a mizia a chhuah leh vat a,a hma aiin a tawrhhlelhawm tawh zawk a.Zu a rui emaw,ruilo emaw min sawisa reng a,a tawngkam chhuak pawh a chhe zual a,mahse damdoiin luh ngai khawp chuan ka awm tawh lo,chu chu a hma aia a nepna chu ani mai.Thla 7 zet kan awmdun hnu chuan ka tuar thei tawh nganglo a,a muthilh laiin pan lam tur pawh hrechuang lo chuan ka arkawhchhuah ve ta tawp mai ani.Chu zan khaw vawt leh thim zetah chuan ka vak ka vak a,ka pasal neihna hmun hi kan khua tal chu nise a thlamuan thlak tur a.Mahse he khuaah hian mi chuang,mi vakvai fahrah mai ka ni si.Zan lai ani tawh a,khawlai reh leh thim takah chuan pan tur neilo in ka vakchhuak ta a.Mite chu tun ang hunah hian mahni in lumah tui takin,thlamuang takin an mu siai siai ani si a.Ka mit hmuh a fiahlo tan a,ka mit atang chuan tuifim a rawn hnam tiam tiam a,kawngsir thim laiah chuan ka thu hnawk a,tha reng reng ka neilo.Chakna chhuantur ka neiloa,ka hmalam pan tur hian chakna leh theihna engmah ka nei tawhlo ani.

Chutia kalo thut lai chuan zan lam duty VDP rual hian min rawn hmu fuh ta a.An zinga pakhat chuan pawr fe hian "Hei,nula,tun ang zanreiah eng nge hetah itih a? I rui ani maw?nge i inzuar zawk?" min ti ta duah a.Thiamthu ka sawiloh chuan a dik dawnlo tih ka hria.Thiamthu sawi tum a ka an zuau lai chuan pakhat leh chuan "Aw,engmah sawi angailo,i nihna chu kan hre thoa,mi awmtha duhlo hi chu han hlap deuh ila an harh mai" ala rawn ti zui a.Ka hlau kher mai.Min pawt tho lawp a,an hmunpui lamah min hruai a.Ka thiamthu sawi pawh nghak lovin hmeichhe awmtha duhlo angin min sawisa ta anih chu! Ka tap zawih zawih ringawt.Ka tap te chu ka ruih lungpuam vangah min puh zel bawk a.ka khawvel em em hi chu aw..


Zing khawvar hnuah choh min kaltir a,ka rilru a na takzet ani.Chhuah zalen ka nih hnuah pawh pan tur ka hre chuangloa,chu Aizawl khawpuiah chuan ka vakvai leh ta.Khuaa haw tur lahin pawisa kawl pakhatmah ka nei bawk silo.In a haw leh erawh ka tum tawhlo bur.Ka haw leh anih chuan natna leh tahna,kut thlawn tawrh bak hmabak ka neilo tih ka hrechiang.Chuvangin engpawh tawk dawn ila ka haw tawh lo ang tiin ka intiam bur mai ani.Nilengin ka vak kuala,hnathwh tur emaw ka inhnawhpuarna tur emaw ka zawn angai ani.A tawpah ka beidawng lutuk chu In pakhatah ka tlu lut ta rawih mai a.Anni hnenah chuan engkim ka hrilh a,min lainat takzet tih ka hria.Tun thleng hian an bulah ka khawsa a,ka na pawh a dam ve zel a,ka "FAHRAH NUNKAWNG"zawh chu alo tawp ve ta ani.Lalpa,ka lawm e.

THE END#


Ziaktu : Peki Fanai
Writer : Zo Writers`

Visit our Blog : http://zowriters.blogspot.in/

Posted by at
Labels: ,

No comments:

Post a Comment

Subscribe to: Post Comments (Atom)