Lee Ann Womack
Kan chaweilai in Phone a rawn ri a, lak loh mai kan han tum tak na a, a rik nawn tluk tluk vang chuan ka nu chuan a pawimawh ani ang e tiin a han la ve hram a, eng pawi nge an sawi tak le ka nu chu a ngui ta riau a, a awm a dawm a, a mit te lam chuan a sen a, min rawn en leh thin a mittui pawh a parawl ngiai mai, an in biak zawh hnu chuan “Nu e nge awmzia..” tiin ka lo zawt vat a mahse min chhang tam lo, “ Bawihte, reilote keimah a awm rih ka duh min lo hrethiam lawk mai aw..” a ti a, a room a luh a rual nghal mai a, a kalh nghal hmiah bawk, a ngaihna ka hre lo kher mai, ka chawei pawh a tui tawh bik lo, ka seng fel a, ka nu room kawngka bulah chuan a rawn chhuah hun nghakin ka thu ve ta tawp a. Pa tello in ka seilian a, Ka nu engkim a min chawikang a min tawiawm thin tu chu a hlim lo lai hmel ka hmu ngai lo, eng thil sual pawh ti i la, a duh loh deuh dan a ka lo awm a nih pawn tha takin min zilh hau zel thin, pawisa kan neih loh chang leh ka school fee tur pek tur kan neih loh chang a, a rilru a hah em em lai pawn a lantir duh ngai lo.
Mahse vawiin tlai khan engvang a in sum zo lo leh ka hma a mittui hial ti tla ta mai nge maw a nih le. Ka nu chu a rilru a na hle tih ka hria, keipawh chu ka lo na ve em em ringawt a, “ Nu kawngka min lo hawn teh” tiin a room bul kawngkhar ngheng in ka thu ta tawp a, ka nu chuan in sum hram hram a tum tih ka hria, mahse a tap nasa kher mai, Kum 15 liamta chhung khan hetiang em a a rilru nat hi ka hre ngai lo a, a ruk a a tap hi chu hre ve fo mahila heti tak a a lantir hi ka la hre miah lo. Ka nu ka hmangaih em em leh Ka pa ni kawp bawk chu in sum zo lo in a tap mek si, ka hrethiam lo kher mai.
Ka nu hian a tleirawllai in mipa a thlang sual a, chu pa chuan fa pai tirin a nei leh duh silo a, ka nu chuan sawiselna tinreng tuarin khawtlang endawng a rawn ni a, ka nu pa hi kohhran upa a lo ni kher bawk nen chhung te tuithlar hial a rawn hlawh ta a, chutia ka nu in tuithlar leh in tang a hnawhchhuah a tawh lai zawng zawng pawh chuan chu a fa pai tir tu chuan rawn ngaihsak a hnek in a hmusit ta zawk a, mahse ka nu chuan a fa pai lai chu tih tlak mai a duh bik lo, engpawh tawk dawn i la eng dinhmun ah pawh ding dawn i la he ka naupai hi ka enkawl seilian ngei ngei ang, ka sual tih tawh zawng zawng te Pathianin min ngaidam ang a, he naupang hian ka hming chhiat tawh na zawng zawng hi a rawn hliahkhuh vek dawn a ni tiin Naute chu a nei ta a, chu naupang hrisel lo tak chu ka nu vang liau liau a khawvel eng rawn hmu pha ve ta chu kei hi ka rawn ni ta.
Ka nu in min pai lai hian mi in ah inhlawh in a awm kual nasa a, thawmhnaw te a su a, hna tinreng a thawk a, a chang in sa a sat a, bazarah chawhmeh a thut pui a, nau a vei chhung leh nausen a pawm chhung a a in enkawlna tur daih khawp chu a thawk chhuak ve tang tang a, chutia chaw mumal ei lo leh chawlh hahdamna hun nei lo reng reng a a thawk ta chu keimah chuan ka lo tuar ta a, Naupang kal thei rual ka nih hnu pawh chuan ke in ka kal ve thei ta lo, mite sawi dan chuan Piangsual ka lo nita, mahse ka nu hnen ah chuan vuina pakhat mah ka nei lo, lawmthu hrilh hi ka ba nasa em em zawk ani, chuti chung pawh chuan ka nu chuan min ngaidam thlap a, ka chhiatna lam ai chuan ka thatna lam zawk chu a en a, nakin ah mi ropui tak i la ni ang tih thu hi min hrilh bang ngai lo.
Chutihlai chuan kanu chu kum 21 mi chauh a la ni a, a hmel te a tha in a vun te a la nalh em em a, a hleitling bawk si a, ngaizawngtu leh rimtu pawh a ngah thei lutuk mah se mipa tumah a rin theih tawh loh bakah a hmangaih chuan a tihnat em vangin hmangaih dang neih leh a thei tawh lo, chubakah kei chu min ngaihtuah tel tlat thin a, pasal neih lam reng reng chu duh chang nei thin mahse a ngaihtuah chian pauh leh a rilru ah kei ka lo lan ve fo vang chuan amah rimtu te pawh chu a lo hnar fo reng a.
Kan retheih em vang chuan tlem a ka lo leikang ve deuh hnu pawn Wheel Chair lei na tur pawh kan nei lo a, pawn a chhuah ka chak thu hi ka nu bulah chuan ka sawi thin a, tlem a ka lo rih ve deuh hnu ah pawh ka nu chuan Sunday tlai apiangin khawi emaw lai ah mi vahchhuahpui thin a, harsatak chung hian min paw lat lat thin, chtuia kan lengchhuak min hmuh fo vang chuan RammaV Foundation in wheel chair min leisak a, chuta tang chuan school ah pawh keimahin ka kal ve thei tawh a, puak pawh ka ngai tawh lo.
Tih tur hranpa ka neih chuan loh vang leh nei pawh ni i la ka tih theih chuan loh vangin lehkhazir leh lehkhabu chhiar kha a ni mai a,kan class ah te pawh pakhatna ka ni ve zel a, ka nu hi a lawm thiam em em thin, Pawl 10 pawh tha takin ka passed Top 10 ah hial ka hming a lang pha ve, lawmpuitu tamtak ka nei a thil pek pawh ka dawng nasa kher mai Top 10 a ka lan vang chuan ka naupanlai a Wheel Chair min lei sak tu RammaV Foundation bawk chuan BA/Bsc ka zirchhuah thleng ka zirna senso zawng zawng chu min tumsak tur thu min tiam a ka lawm kher mai, Tunah chuan English School ah ka lut ve thei tawh dawn a ka thiannu Duati te nen school kan kal rual thei tawh ang tih ka hriat phei chuan ka lawm zual, Pathian hian min theihnghilh lo tih ka hria a, ka nu tawrhna leh ka tan a a thawhrimna zawng zawng te kha Pathian in a lo hriatsak a ni tih kan hriat chuan lawmthu kan sawi mawlh mawlh a.
Ka nu in min enkawl a harsatna tinreng min paltlang pui lai zawng zawng leh chu kum 15 chhung zawng chuan ka pa chu ka hmu ngai lo a, vawite khat mah min hmu tur pawn a rawn kal ngai lo, a phone call tak ngial pawh kan dawng ngai lo, mahni pa te pawh hre lo in ka seilian a, Pa kha ka van awt ve thin tak, thlalakah chuan ka hmu tawh a, ka en tlawk tlawk thin mi te chu an Pa ten an pua in an koki chhuan thin a, ka nu hnenah hian Pa neih ve ka duh tih ka sawi chhuak hial thin.
All you`ve ever been is a call every now and then
From some old pay phone After you`d hang up
Lord, she`d take it rough and want to be alone
I know you from the picture of you and her together
Taken at a fair in `68
You`ve gotta lot of nerve to think
You can walk rigth in and take her place
Kha kum 15 liamta chhung zawng khan khaw nge i awm? Pa neih chak reng reng in ka hun ka hmang thin a sin, engvang nge vawikhat tal pawh min hmu tur a i rawn kal loh i rawn call dawn ro ro chuan hman a hman ah khan kan mamawh ngawih ngawih lai che ka nu in amah chauh a min enkawl seilen a harsatna tinreng a tawrh lai te khan rawn call tur che a sin, kha ti khawp a i phatsan chung pawh khan ka nu leh kei hian kan hmangaih reng thin che a, i rawn lan hun hi kan thlir bang lo, Phone i dah zo chauh kha ka nu rilru nat zia leh lunglen zia chu ka mit hmuh ah a vawikhat nan a tap hial a sin, ka Nu hnenah hian Pa neih ve ka chak thu ka sawi thin a, ka Nu rilruna leh beidawng hian ka Pa chu a thih tawh thu leh Vanram a a awm tawh thu min hrilh tawp thin, mahse he khawvelah hian min phatsan in i lo tamtal vel mai mai reng si a, ka nu nen a inthlalak dun hi ka en thin a, van lam khi ka hawi nasa thin mahse he lei ah hian nungdam in i ban phak ah kan awm reng si a, engvang nge vawikhat tal pawh min hmu turin i rawn kal loh, piancham pawh vawi 15 zet kan lawm ve tawh a sin.
Inngaihtuah harhna hun i ngah lutuk, i thluak pawh a tha a, ngaihtuahna nei lo pawh i ni lo, kan nunah hian rawn lut in a Ka Nu ai i rawn awh thei, hun tha tamtak i nei a, kan mamawh ngawih ngawi che tih pawh i hria ang, engvang nge i tih tur kha i rawn tih mai loh. ka Nu kha ka Pa a ni tel a, i tih tur ai zawng zawng pawh ka nu khan a ti vek thin a sin, Pa hmangaihna dawng lo a ka naupan hun zawng zawng ah te khan ka nu khan pa chan tak tak a chang a, ka nu hnen atangin Nu hmangaihna leh Pa hmangaihna ka dawng kawp thin a sin, i tih tur kha rawn ti ve mai la a tha tur, ka ngaihtuah chian pauh leh ngaihdam che hi harsa ka ti, engtin nge nangmah hmangaih a ring zo em em tu che kha he ti mai hian i hnugchhawn theih zawk le..?
To me you`re just a man who made my mama cry
Someone who broke a lots of promises in his time
All i know about you is how to live without you
And i can see i have your eyes
But all you`ve ever been
Is the man who made my mama cry
Tunah chuan ka lo leikang chho ve tawh a, naupang chhia em em pawh ka ni bik tawh lo, ka tih tur leh tih loh tur pawh ka thliarhrang thiam ve tawh, ka thil duh ber thin kha ka duh loh ber a rawn nih tak hi, ka tan chuan nang hi “ka Nu titaptupa” bak i ni tawh lo a, Mahni thutiam a ding lo leh mi rinawm lo mahni thusawi ngei te pawh ti leh duh lo maw i lo nih a, eng rilru nge i put a ka nu kha a that vanglai tak leh a mamawh lai tak che a phatsan thei nge maw i nih le, sawiselna leh hmuhsitna tinreng a tawn lai pawh khan nang chuan hmangaih a tan tlat tur i ni a sin, kei hi ka fa a ni lo tiin min hnawl a nih kha tiraw.? engtin nge i tih thei zawk le..? i tello a nun hi nangmah ka hriat ve dan che a ni a, i tello in kum kha leh chen kan lo awm ve tawh a kan dam kum rawn her chhuak leh tur pawh hi i tello in kan hmang liam leh thei em em ang, kum 15 kan tuar tawh a tawrh kan thiam tawh.
Kan mitmeng pawh a in ang hle a, i hmel a tha em em tih pawh ka hria, mahse kum 15 chhung teh meuh khan ka tan a i tih ve theih awm chhun chu ka Nu hi i ti tap fo a ni tih pawh ka hre tel bawk a sin, hmelah nangmah chhun che mahila thildang ah chuan nangmah an tumna pakhatmah ka nei lo a, Ka Nu chauh pawh hi ka duhtawk ka tan Pa a ni a, khawvel a Nu tha ber a ni bawk. khawvel a mi zawng zawng te hian ka Nu ang hi Nu nei ve vek se la chuan nagmah ang hi pakhat mah an piang lo tur, sualna te hi a awm lo ang a, mi rinawm lo te hi an awm lo tur a ni a.
When she took off my trainning wheels
Held a job and cooked the meals
Where were you.?
Don`t even start
She did her part
And yours too
Now you`re back to play the part
That was missin` in my heart
When i was growin` up
Well you`re little late
I don`t have the time to waste on catchin` up
Keimah ngaihtuah reng reng leh ka hma hun tur thlir reng reng ka Nu a chet buai lai te khan aw.. Hna a thawk rim rim em em a, a sur a sa hnuaiah thlantui far zawih zawih in hna a thawk a, chhun zan zawmin ka Nu chuan min chawm theih loh hlau leh mi ka awh hlau ngawi ngawih in hna a thawk thin a sin, i tih tur zawng zawng nen a thawk kawp vek a ni ber, mi thawmhnaw a suksak a, buh a thlei sak a, Nula hmeltha leh hleitling mi te pawh in a an ngaihzawn rawn luai luai thin kha in phahhniam takin mi in ah te a inhlawh thin a sin eitur tuihnai tak tak min siam sak a, a ei ai takngial pawh min ei tir chang a tam lutuk kha tih chhung zawng khan khaw nge i awm..? Wheel Chair tang a min chawisawn leh min hlankai ringawt pawh hi hmeichhia tan chuan a harsa tham a sin.
Nang chuan min enkawl tum na chhe te pawh i nei lo, min ngaihsak a hnekin ka fa a ni lo min ti thei kha mak pawh ka ti lo, Ka Nu chuan Nu anih ang a a tih tur a ti a, Pa i nih ang a i tih tur nen lam a fawm thin, tun a takah i rawn lang ve a Pa i nih ang a i tih tur hlen turin i rawn kal a. engvang nge kha kum 15 chung zawng khan Pa ka awh em em lai leh ka nun a kim lo awm thin hnawhkhat tur khan i rawn lan ngai miah loh. Tunah chuan phengphehlep a khua i tlai zo ta, ka thanglian ve tawh a, i bul a hun hmang tur chuan ka hun te hi an ui awm tawh lutuk, Nu ka nei a, ka hun zawng zawng hi ka NU tan chauh a hlan ka duh hrih a ni e. Ka nu hi ka tan chuan Ka Pa a ni e..
Darkar chanve zet room chhung a a tah hnu chuan ka Nu chu a rawn chhuak a, a hmai te chu a rawn hru hul vek a, min rawn kuah a, ka kuah let a ka tap zawih zawih a, “Nu thil dik lo a awm em ni, kan in hi min chhuk sak an tum leh tawh a mi” kati a, “Bawihte.. dawt ka lo hrilh thin che vang in min ngaidam rawh aw, mahse i rilru a nat ka hlau vang in ka hrilh duh loh zawk che a ni, Tun a rawn phone tu kha i Pa a ni a, a bul a awm turin a rawn ti che a” a rawn ti ta hlawl mai. mak tih na in ka khat a, ka lawm rual rual in ka Pa chu ka haw tak zet a ni. “Nu i rawn tel ve dawn loh chuan ka duh lo’ kati a, kanu chuan ‘ Bawihte kei chu a bulah ka awm ve thei hleinem Nupui a nei tawh a, mahse nag chu i duh phawt chuan i Pa bulah chuan i awm dawn ni a, Khawpui ah in liantak an nei a, mahse i duh loh pawn a pawi lo ka theihtawp ka chhuah nang ringawt hi chu mi puitlingah ka siam thei lutuk ang che’ a ti a. chu mi zan chuan Ka Pa nen a an chanchin zawng zawng chu min hrilh ta vek a, ka Nu chu ka khawngaih kher mai, a hma zawng ai in ka ngaihsanna pawh a nsa zawk.
A tuk ni thar a rawn her chhuak a, English School Uniform thar ngei ha in, kan school lamah chuan ka thiannu Duati nen kan in nawr phei ta a, Ka Nu ka Pa ni bawk chuan min vei liam a, Nu, Pa ka hmangaih che. ka mi ngaihsan ber i ni reng fo ang. lawm a vang in ka mittui a far ta hial a.
30. April.. 2015
No comments:
Post a Comment