DOCTOR KA NI VE SI LO

DOCTOR KA NI VE SI LO

    Khawdur khuih leh chhum dum chhah takin vawin boruak chu hneh takin chiahpiah mah se ka nitin eitur ka thawhchhuah tho a ngaih avangin a ngai te bawkin ka hnathawhna tur hmun lam chu ka pan leh ta a. Ka mihringpui dangte pawh keimah ang tho an nih hmel, chung khaw awmdan chuan an thil tih tur a chawlhsan tir bik hauh lo a,nunphung lah a ti khaihlak hek lo. Motor tlan tam tak karah chuan kei erawh chu ka thlenna tur lamtluang zawhin ka ke dinglam leh veilamte chu pen chhawkin chung lirthei hmanga hahdam taka tunram pan ve mek te ka mamawh bik loh zia chu ka lantir a.

  
    Ka rilruah tukin zing lama Radio a ka ngaihthlak ruahpui nasa tak a sur tur leh t,ek nasa taka a tlak tur thu thupuangtuin a puan chu a puangtu aw nen lam a rawn lan tak ah chuan ka ke pen te chu a hma aia chak zawk a pen a ngai a ni tih ka hrechhuak a. Tichuan,midang kawng kal pawh mitmei em em hran lo chuan chak takin ka pen hlawk hlawk a.


    Ka hnathawhna hmun thleng tura hmun pakhat chiah kal pelh ngaihna hmun station ka thlen chuan ka hah ve ta ngang a ni ang muangchang a kal chu tha in ka hre ta zawk a. Chulai hmunah chuan mipui thahnem tak an awm reng ti ila kan sawi sual loang, ka thlen pawh chuan an lo kat nuk hlawm a. Hmelhriat nei hek lo,tumah pawh melh hran lo chuan ka kal ta zel a, ka hmelhriat tha tak pawh hmu nawlh mahila ka biak hman pawh ka ring chiah lo. T,ek leh ruahpui hmachhawn hlauhna avangin ka hnathawhna hmun thlen vat vat chu ka nghahhleh ber a ni.


    Chutia ka kal mek lai chuan ka ke pen vawilehkhata tiding nghal tawptu leh ka lungphu chhiar hman loh tur khawp a ranga rawn siamtu mipa hmeltha em em, sang thlerh thlawrh tak, a mitmeng fiah kalh ka en nin theih ngai loh, apian mawina min hip em em tu abula kal chang a inchhuan rukna min neihtir fo tu, a hmui lah vawi tam tak a fawh ka dawn tawh ka kham theih ngai hauh loh chu ka dinna atanga pen nga pawh tling loah a zin bag khai chung chuan a ding vauh mai.Ka mumang nge a tak tih hre turin ka mit ka han chhing a, ka meng leh pawn angai te bawkin che sawn hauh loin ka mit ah tak min lo en reng a. Pen thumin ka han pen hnai a, a tak ngei a ni si. Kuah vawng vawng a,ka chhipin a chen tawk a awm zawn a ka lu nghah a, a lungphu ri hriat leh chakna in ka khat a, ka hmuite chu vawt tih vang ni
miah si loin a rawn khur a, ka kutte chuan awmngaihna an hre tawh lo ka hum a ka pharh leh thin. Ani chu ka mamawh takzet a ni.Kum hnih liam ta kha chu nise a t,angah sawn ka bei hle hle ni tur.


    Ka mittui rawn tla tur chu dan ka duh mahse kum hnih chhung ka tawrhna te, amah vanga hun leh ni pawh chhiar thiam lo khawp a ka nun hmandan te chu ka rilruah an rawn lang a. Tin,amah ka beiseina vang chauh a ka beidawnna ata kaih harh ka nihna chu ni reilote an la nih na te chuan tap lo thei loin min siam si. Chutih lai chuan ruahsur ka ngainat loh em em te chuan ka mittui an hliahkhuh mahna tiin ka biangah chuan an rawn dir zawih zawih a. Ani chuan ka mittui te hi a hai ka ring lo achhan chu hun tam tak liam ta mah nise ni zaruk chuang ngawt ka hlim hmel, ka lungngai hmel leh ka tap hmel hmu hnem bertu a ni thin.Chutia ka mittui tla min en reng lai a abag khai lai a thlah chu hre awm pawhin a lang lo. Mittui leh ruahtui vanga fiahlo ka mit hmuhte chuan kan nunhlui liam ta ka mitthla a lo lang te chu an ti fiah lo zo ve lo.


    A dar a lo chelhtu kut no tak ka hmuh chuan ka harh zawk a, a ni pawh chu pangai hmel takin a rawn awm nghal a.Chunu hmeltha tak,zaidam leh ngainatawm tak hmelpu chuan a nihliap chu rawn zawnin zawhna mimeng chuan min rawn melh tawn a. Ka hmangaih chuan a mitah tak lo en letin vawikhat a mit a chhing sak a,a kawngah kuahin hmangaihna mitmeng thikawm hliah hlaih chuan a melh ngawih ngawih a.Chung ang mitmeng chuan hmanah min melh ve thin asin. A bag chhar sak tur a chunu kun chu dang vatin a darah chelhin a din tir vat a, a pum raipuar kawh ve lah tawh chu a melh zeuh bawk a. Chunu chuan a pum chu dawm vatin a that thu hrilh ni awm takin a nui sak a. Ka awm ve tih pawh hria anga lang lo chuan bag chu la in ka hmangaih chuan a hmangaih dara kuah chung chuan anni pahnih chuan min kal pel ta a.


    Ka ngaihtuahna te chu a kal buai vek a, ka thingthi hnawk a ka en ngai chu ka en ngawt ngawt a. A hnu ah chuan ring takin ka tap a,ka rum bawk a.Chutih lai chuan t,ek nasa tak chuan zan ni si lo chhun khaw thim chu a rawn en zuai zuai a, khawpui ri bur burin a rawn zui nghal a ruah lah ahma aia nasa zawkin a rawn sur a. Anni chuan min tawrhpui ve nimai hian hriatna ka nei a.


    Ka thin tawt chuan min hnawh tup tup a, ka mitmeng chu a fiah lo ruai a mipui leh ruahsur thawm pawh chuan min hlat tial tial hian ka hria a, k lu chuan chu station chhuat char tak a deh chu ka hriat tawp a lo ni ta.


    Ka harh chuan ka lu chu a rit bur a, ka mutna khum chu damdawiin khum a ni tih ka hre thuai a. "Engtin nge he tah ka awm theih le?" ti a ka in ngaihtuah lai mek chuan hmeichhe pakhat min hnungchhawn zawng a ding leh doctor in biak lai chu ka va hmu a. Ka chung chang an sawi tih hriat takin doctor chuan min rawn melh zeuh zeuh a. Chu tih lai chuan a biak nu chu ka lam a rawn hawi a ka lungphu darkar sawm kal ta ata tawh thlamuang reng reng lo chu a ti rang ngei mai, vawiin a ka hmangaih bula ding raipuar ngei kha a ni. Thil hi hriatthiam a va har em.


    Ka bul hnaihah chuan a rawn kal a, nui hmel pu sang hian
"Nono tui i in duh em?" Nono tih hi a pasal min koh duat na bik a ni.
Bah nuai chuan "Aih, ka duh lo, ka kal a ngai" tiin khum at,ang chuan chhuk ka han tum a. Ka ban chu a rawn thip zawk a, hriau alo in vit reng chu niin. "Fimkhur rawh" alo ti vat a. Ka rilru chhiat chu a rawn chhuak thut a vin hrak hian "Min khawngaih a mi?" ka ti tuar a, kan ward a awm ho chuan min rawn melh hrek hrek hlawm a, mahse chung chu ka pawisa tawh lo. Ani erawh a hrilhhai hmel em em a.


    Ka lo khawngaihthlak a nih dawn hi tiin ka ngaihtuah a. Naupangte ka nih in ka nu leh pa in min boral san a, ka ni bulah awm in theih tawp in lehkha ka zir a. College ka rah tan ve dawn chuan hnathawh pah theihna ka duh avangin phai lam panin call centre ah te thawk pahin lehkha ka zir a. Hetah hian ka hmangaih hmasa ber leh tawpna ni turin Lalnuntluanga nen hian kan in tawng a, kan in hmangaih thin asin. Ka mipa ngaihsan leh zah ber a ni a, ka pa nen hian inan na tam tak an neih avangin ka ngaina in nitin ka hmangaih zual deuh deuh thin. Kum 12 mi anih in apa hnathawhna vangin Mizoram an chhuansan a ngai a, hun rei tak a hmu tawh lo a ni. Ani nen chuan kan inneih hun a Mizoram a kan awmdun tur thu te chu kan sawi nasa thei em em a,kan va hlim t,hin em.


    Kum hnih lai kan inzui ve hnu chuan vanduaithlak takin a unaupa neih chhun chu a boral hlauh mai a. Engmah pawh min hrilh chiang hman loin Kolkata lam pan chuan a haw ta a, an vanduaina tawh chu ka hriatthiampui khawp mai. Mahse, Delhi khawpui a zirlai pakhat ve mai, a mamawh pawh phuhru thei t,awk t,awk ka tan chuan tih theih kha a vang em a ni. A haw at,anga ni nga ni ah chuan phone call hi ka dawng a ka han lak chuan, Tluanga hi a lo ni a, number dang a rawn hmang chu mak ka ti ang reng hle a

"Nono"
"Awih... i t,ha em?"
"Aw, tha e.. ka nu ina be duh che a".. ka phu zawk a, ka zam em em bawk, lai tak chuan
"Aw, khawi ka lo bia ang"
........................................

"Hello, rinzuali em ni??"
"Aw.. ni e, enge i an a pawi ka tih pui khawp mai che u"
"Ni e,kan t,ha ve zel, hei mama bulah kan monu doctor tur chu ka va be duh ve ka lo ti a" a nuih har har a.. ban chap chuan
"Doctor maw?" Ka rilru chuan doctor zirlai ka ni si lo a tiin ka ngaihtuah a
"Aw, ni e.. a unaupa nupui hual pawh kha doctor zir zo hlim chauh ania, mahse vanduaina kan tawk leh ta sia, a kawm chak ngawt ang che"

"Ani maw.." muang chang chuan ka ti a, mak tih na in ka khat a,a thu sawi lai pawh ngaihtuah lo chuan ka phone chu ka off ta ringawt a.


    Enga tinge Tluanga khan doctor zirlai anga min sawi le, chungte chu ka tlin phak bak a ni a. Ka graduate chuan zirlai lam chawlhsan a part time ringawt nilo a hna pangngai zawn mai ka tum thu pawh chiang takin ka hrilh si a. Ka rilru chu a buai em em a, chhungkaw pangai leh hausa tak an nih avangin min zahpui a ni thei a ngem. Engkim hi sawi chian a ngai a ni. Zanah chuan ka call ta a
"Aw hello , nono"
"Enge vawiin kha awmzia??"
"Nia, line alo in cut daih a, ka nu in nidangah ka be leh mai ang a ti che a"
"Nilo, doctor zirlai tih thu vel kha"
"Ee... ih nono i hriat angin, ka nu leh pa ten min hmangaih em em a, ka tan chuan hmeichhe t,ha tak pawh zawn an huam dawn a"
Ka thinlung chu vih ang mai hian ana a, "ka awm mai mai hi a tan a lo t,ha tawk lo hle a niang maw.." tiin ka ngaihtuah a
"I dawt sawi chu man chhuan loh a nih i ring em ni?"
"Delhi a hna kan thawh te chuan engmah an hre dawn hleinem"
"Tluang"
"Enge?"
"Min hmangaih lo"
"Ka hmangaih che"
"Dawt.. min zahpui a ni ti raw.."
"Teuh lo, kan innei ang"
"Doctor ka nih hunah le" tiin ka phone chu ka off a, a aw ka hriat tawpna a ni ta.


    Chutia mittui tling puama ka inngaihtuah lai chu ka bulah nurse lo kal thawm ri ah chuan ka harh zawk a, ka bulah chuan raipuar pawh chu ala t,hu reng a. Inthlahrun hmel tak hian
"Pawnah sawn va titi lawk ang hmiang" tiin min rawn bia a. Nurse in ka kut a hriau in vit a phawi zawh chuan kan in zui chhuak ta a. Ka chau lutuk chu kal pawh chu ka tan a harsa hle a, nilum in alo en iar t,hutthlengah chuan kan t,hu dun ta a.

"Ka hming chu Debbie a nia" tiin bul a han t,an a
"Doctor em ni i nih?"zam lo tak chuan ka han ti a
"Aw, mahse hmeichhe pangai ve mai ka ni tho nono"
Kan ngawi dun vang vang a kan piah lawk a khawpui chu en vang vang pah chuan
"The fool tih hla Lee Ann Womack sak kha i hria em" a rawn ti a. Ka nuih a za kher mai, nu ni ve tawh mai turin chutiang min han zawh chu.
"Aw hria e"
"Kha hla dinhmun ang chiah kha ka dinhmun a ni asin"

  
    Ka ngaihtuah vang vang a kha hla kha chu a pasal in a hmangaih hmasa a theihngilh theih lohna hla niin, chu a pasal hmangaih hmasa tan a a hlan a ni tih ka hre bawk.
"Zanah i hming lamin a la t,awngvai fo asin, nang hmu tur hian ka huaisenna zawng zawng sawm khawmin ka rawn pan che a, mahse chu ti chung chuan ka huaisenna zawng zawng ai hian ka hlauhthawnna hian he thinlungah hian buk rit zawk nihna a chang si" a rawn ti zawi sap a
"A ni thei lo" tiin ka phun sep a k kut chuan k hmui ka hup a, ka mittui chu a rawn luang chung chuan a hmel chu ka han en a, khawngaihnain ka khat a ni. Kei ni lo in ani hi a ni khawngaihthlak zawk chu.
"Mahse, i na ngawt ang ti raw.. Debbie" tiin alam en chung chuan ka sawi a.
T,ahnui hmel pu chuan "Umm.. mahse ka nghak thei a, kan t,ha ve zel dawn laiin..." a ngawi ta daih a, a sawi tur chu ka hria a ni, ka lo lan leh hi Debbie tan chuan natna a ni.


"Debbie"
"Umm"
"Tluanga'n a hmangaih thu a hrilh tawh che em?"
"I sawi awmzia chu..??"
"Aw Ronalda'n a hmangaih thu a hrilh tawh che em?" Tluanga tih hian a tam zawk chuan an ko ngai lo a ni.


    A chil a lem ri kawlh a "Um nizanah a vawi khatna a tan"
Inthiam lohna in ka khat a, nizanah hun hlimawm tak an hman dun hnu ah keimah vangin rilru thlamuang lo takin an awm chu a ni si a.
"Debbie ani hi ka hre chiang a , a hmangaih thu a hrilh che a nih chuan a thlah tawh ngai loang che"
"Anih i hnenah pawh a sawi ngei awm si a"
"Kei chu doctor ka ni tlat lo alawm"
"A sawi ang chiah ini, hmeichhe luhlul tak, eng dang mah aia zahawmna ngai pawimawh ber thin. Nono, nang nen hian kan mizia a in an loh zia Ronalda'n a sawi tawh asin, chumi vanga min nei anih thu a sawi bawk a.."

"Ni e, a hmeichhe mamawh tak ini anih chu, a mamawh tak nupui atan a nei tih hrilhfiahtu ni mawlh ang che aw" tiin dim te in ka va kuah a.
"Theih se chuan in tan a hlimna siamtu nih ka duh ngawt mai" tiin a rawn phun sep a
"Ti hian ka hlim tawh khawp asin keichu, hlim takin awm ula chhungkaw ropui tak in din dawn nia aw" tiin tawi takin ka nuih seih a.. Rei lo te kan inkawm leh hnu chuan ka in luah lam ka pan ta a


    Ka nun chu ruak in khawhar mahila Tluanga ngaihna ka nei tawh ngai lo thung. Ani ka ngaihtuah dawn apiangin Debbie raipuar kawh lah tawh a mit meng pawi sawi lo tak at,anga mittui luang chu ka ngaihtuah chhuak a, Pathian awmpuina an tan ka dil zawk ta thin.


    October ni 26 zingkar hma takah chuan ka phone chu a rawn ri ral ral a, meng t,ha thei mang lo chuan ka han en a, ka rilru chu a hnual sawt mai. Vawiin hi tluanga nen kan inngaihzawnna champha phone calendar a ka save a lo ni. Ka phone chu dah leh mai ka tum lai chuan a rawn ri nawn leh a ka en chuan number save loh hian thlalak hi min lo thawn a, ka han en nak chuan naute piang tir duhawm em em mai thlalak hi alo ni a, a hnuai ah chuan "DOCTOR NI VE MIAH LO TUR MISS LALRINZUALI" tiin a rawn chhu tel bawk a. Ka hming ang chiah naute hming atan an phuah a ni. Ka hlim lutuk chu au chhuah vak mai ka duh a, mahse ka la insum thei hram a, ka hmui phun rem pah chuan
"DEBBIE KHAWVELA NU ROPUI BER I LA NI NGEI ANG" tiin ka va thawn let nghal a........


Ziaktu : Rengpuii
Author : Ram zuun leh D Zuun a uai”